1 Peter 3

Iu ara wero nuai amira ge.

Bama, nimorekare da ago ine sane. Nikare ema nisokarera ge dipinoise noiwo. Awa ema nisokare eni Tuara ge doro tepo nowera awa numorekare ge kaka samu Anutu azu inoise etutiro nuawa ema nisokare meni nuai nisokare giro amire duba nusokare kapetenarise ago wewo. Nikare nitopekare simamu wero tamara simai oko kotumawe — giti tu simaita nena zuma bamure duyaita, tama woi owere wosuniro nuai — tamara simai ago ine awa oko kotumawe. Tamara simai kota dubara simai kotumuwo. Duba-ozai me duba mokara bezai ami simai nisokare waise. Simai awa sisai ine tepo awa. Simai awa Anutu meni gawi zuma bamure inowia awa. Tuara gegenai bama gita noisowa nukare Anutu tuma didinoise simai da awa puro nutopekare sipinoise noisowa awa. Ago inoise ibana nusokare sou inoise noisowa awa. Nusokare nana zo Sara meni Abrahamra ge dipinoise noisonua awa. Ago inoise ema tua asinoise noisonua awa. Are nikare tani ewanana inoise sai azu wai tepo o kotumu-katumu wai tepo nuamunowa, awa mai awiso nuso wero mia ine wero nuamunowa.

Ema nimorekare da ago ine sane. Bama nukare putou osaire awa, are ema nikare numorekare dai saitiro kotumaire noiwo. Ago inoise nukare kora inoise noiwo. Nera kota, nikare daba kota, nukare dai nuai me ewanana potai awa topetamunowa awa. Isa nisokare witiro beu dai azu, ago ine noiwo.

Ina-da wai kota, otao-gamao wero nuai amira ge.

Are poti dara niro sane. Nikare dapikarago duba da wero zo amai ina-wa inoise noiwo. Ago inoise gera otao mamai nisokarere dumi pupinoise tama puro witai tepo noiwo. Tani waya nimorekare wara ina oko wawe. Nikare sero isimara ina oko isimawe. Tepo awa. Nikare ina samu wero giro gawa ge potiu. Nera kota, nikare Anutura gaware nuawise nu nikare zawa senua awa. 10 Amira ge gayai zo ego itia awa,

    • Zo nu nuai ewananara ara tapinoya, ota be ewanana tamamu kotupinoya, ami iwawa nuso dia waise ge waya zo oko sae.
    • Ota be nuso meni ge opi zo oko saise.
11 Nu pasina doro poti atune niro tani ewanana waise. Ago wero begare noise amira bua zewai wero waise. 12 Nera kota, Tua nu ema saramai amira nana giti moka potiro nowia. Nu dana poti nusokare nana niro isa nusokare ninitinowia. Ota pasina ema meni awa Tua meni giro be dumu inowia.

Iwo waira ge.

13 Are nikare tani ewanana wamu duba-duba inoise nuawa ai meni nimorekare waya wamunoi? Tepo awa. 14 Ota nuai saramai ami emo wero iwora tame witamunowa, awa giu duba ewanana wae. Iwo nimorekare wara nikare azu oko wawe. Ota kotumai oko sisawe. 15 Duba nisokare meni “Kristo nu Tua saramai awa” asinoise noiwo. Ago nuawa “Nikare nogoro Tua tuma didinowewi?” amira susu awa zo meni gamu sero nikare atata wai giro peu wero amira ge kapeteniro sewo. Ota saitiro duba-ozaire ge kapeteniro sewo. 16 Moka nisokare meni nikare gera potai azu, saitiro noiwo. Ago wawa Kristore dai noise tani ewanana wawewa nikare zuzu towera ema awa opi sai nusokarera susu kei awai giro menamunora. 17 Nikare tani ewanana inoise nuawa Anutu meni ninai te wai yaya nimorekare potamunora, amira gena wititinoya. Ota pasina tamawa amire waya nimorekare wamunora amire meni awa gana osamunoya awa.

18 Kristo nu saramai ami nu nutope pasina nasokai emo wero be daimata betenu tepo wenua awa. Nu saramai ami ema waya-kawaya nakai emo wero ago wenua awa. Nu nakai Anutura nana susumamu ago wenua awa. Nu tama aisore noisonua are dewa betenua. Ata ititi nuso meni awa seka dago itinua. Are nu utura tama aiso puro seka wero erinua. 19 Ititire noise ititi benaira itisowa amira nana baro ge tugata wenua. 20 Nukare ami gita Noa wa gapinoise noinu Anutu meni nukare awa-didinoise dia wenu ge nuso dewa awa. Are ema bama etokaka, 8 daba awa, nukare wara witiwa ou meni soga wenu oura kaka sisamu wewa. 21 Tani Noa mai awisore nana kei awenua awa tani ge ou gutai awa etete wenua awa. Nikare ge ou gutinoise ewanana wewa awa. Ge ou meni tama ina oko sewinowia. Nikare ge ou gutinoise Anutu meni duba nisokare sewai saramaise nu zawa towewa aw. Korawai awa Yesu Kristo meni betaira ena seka ziro eritinoise amire tamunua awa. 22 Nu nutope utura witiro Anutu nana wana mera nowia. Ago nuawi angelo putou bamureta osaire nukare dapikarago osai nuso nowera awa.

Copyright information for `SUE