1 Corinthians 15

Keriso se hetorouioi; tausunumaena hinage abo se hetorouioidi.

Egu tataoyao e, Evanelia ta ea hemasarahayao arimiu eai, ea guguiaimiu wa, omi au ataiei, arinai au toro, arinai hinage au mauri, ena egu guguia wa au sogohi eo ena nige au sunuma gaibu.

Riba ea leawa bagunai, ia ede se leama arigu eai, ede Keriso ita eda baaea debadi eai ie mate, doha uriuri tabudi eai se ribanonohaiyao, eo ia se toreyao na i torouio asubena hehaionana eai, doha uriuri tabudi eai se ribaei, eo i taumasaraha Kipasi arinai, abotai saudoudoi‐labui wa aridi eai. Abotai i taumasaraha eda boda tataodi aridi eai, isi taudi handere haligigi i dioi, edi huia itana esega, isi maudoudoidi mamiadi wau ta, headi mo se eno’o. Abotai i hemasarahauioi Iamesi arinai, abotai aposotolo maudoina aridi eai. I lau e i taumasaraha murimurita‐ariri eau arigu eai, eau doha nige egu huia mamohoi eai na se labasigu ta. Paana aposotolo aridi eai eau mo ea gagiri ariri, nige i lolo se ribaegu aposotolo, paana Eaubada ena ekalesia eau tauheamamnadi. 10 Na Eaubada ena ainauia eai eau ede ina, ena ainauia i leama wa nige i taru gaibu arigu eai. Nige’e, egu paipaisoa adidiri eai isi gamagaridi ea dioidi, ia mo eau nige’e, Eaubada ena ainauia ede, eau arigu eai. 11 Arinai ena eau e isi, iaede ai lauguguia wa, omi au ataiwatai.

12 Na ena ema guguia wa ai ene Keriso mate eai i toro, edohana omi heamiu au ene mate nige torouiona? 13 Na taba mate torouiona nige’e, besi Keriso nige i torouio; 14 eo Keriso ena nige i torouio ema guguia nige aniona, omi emi sunusunuma hinage nige aniona. 15 E, abo ai hinage se lobaimai Eaubada enana tauriba boraboramai, paana ai ribaei ai ene Eaubada Keriso i hetorouioi na nige i hetorouioi, ena ta ene taumatemate taba nige se hetorouioidi. 16 Paana ena taumatemate taba nige se torouio, Keriso hinage nige se hetorouioi. 17 Taba ena Keriso nige i torouio, omi au sunuma gaibu, eo mamiamiu emi baaea boeadi eai. 18 Eo isi Keriso boeana eai se mateo, hede se lautomaririo. 19 Ahani, ena teina eda huia mauri eai mo Keriso abo ta sunusunumaei, tatao gamagaridi boeadi eai itabom mo ta nuatoatoa ariri.

20 Ia mo mamohoina ede, Keriso mate eai i torouio’o isi mate eai taueno’o uaua bagubagunana ede ia. 21 Doha tau esau debana eai mate i laoma, tau esau debana eai hinage mate torouiona i laoma. 22 Doha Adamu debana eai gamagaridi se mate, Keriso debana eai gamagaridi se mauri. 23 Esa, esa, ena huia mamohoi eai: Keriso ia uaua bagubagunana, abotai isi Keriso enanayao wa, ena laolaoma eai. 24 Abotai abo huia anasigana i lagema, huia ne basileia abo i mosei Eaubada arinai, Tamana ede, sora tanutanuagana, laugagaeo, gigibori, maudoidi i helautom‐bagunaidi. 25 Abo iabom Wasawasa, i lau e ana waiunuyao gamagaridi aena eai i ututawatawaedio. 26 Waiunu murimurita‐aririna abo se unui wa, iaede mate. 27 Eaubada ginauri gamagaridi aena ubuna eai i ututawatawaedio. Si ene, “Ginauri gamagaridi abo se toredobeidi ia awaabina eai,” na iabom mo nige’e, paana ia ginauri gamagaridi tautanuagaidi ede. 28 Ginauri gamagaridi ia awaabina eai se laulau, abotai abo Natuna hinage i awaabi, wau ginauri gamagaridi tauheawaabidi wa, bena Eaubada i abiheohida eo iabom i sae ariri.

29 Ena nige’e, isi taumatemate debadi eai se hebapatisoidi wa edohadi, ena taumatemate taba nige se torouio? Paana saha enadi se hebahebapatiso? 30 Eo paana saha ai mahana to mahana baaea i hanahanauimai na ai totoro? 31 Ea ribanuahimiu, egu tataoyao e, omi egu aba kode Keriso Iesu eda Guiau boeana eai, eau ea mamate asubena gamagamagari! 32 Ena doha tatao edi ribariba eai, maegu liona hemahemanabaradi ai haiabiabio Epeso eai, edohana abo i helologu, ena taumatemate nige se hetorouioidi? Besi ta ai mo, ta nom mo, paana maraitom abo ta mamate. 33 Tabu se boraimiu: awaeha baaeadi abo iila lolodi se hetatagorigoridi. 34 Au siliata, au torohai laulau dudurai arinai na au baaea lautom. Paana headi sora Eaubada se hekau. Teina ea ribaei ta emi abataumaeamaea.

35 Na headi abo se hesio, “Edohana taumatemate abo se hetorouioidi? Abo taudi sahasahaidi eai se uioma?” 36 Oa tausupusupu! Tuma tano eai se hesuru, taba nige i mauri ena nige i mate baguna. 37 Na saha u hesuru tano eai wa, nige u umai ana ao doha maraitom asubena, na tumana mo, ata bena sitona, e tuma esau. 38 Na Eaubada tauna abo i mosei, iabom ena nuatu lolona eai, hari tuma taudi udoi udoi. 39 Buluma udoi udoi, nige adi ao esega, adi ao esau tatao bulumadi, esau suisui bulumadi, esau eama, esau manu. 40 Headi taudi galewa, headi taudi tanoubu ta; wau galewa enana ena namanamari udoi, tanoubu enana ena namanamari udoi. 41 Mahana namanamarina udoi, nawalai namanamarina udoi, hinage ipora namanamaridi udoi; hari ipora hari ipora, edi namanamari udoi.

42 Mate torouiona ana ao doha meta. Se umai ma posaposana, se hetorouioi taba nige i posa. 43 Se umai nige heasisina, se hetorouioi ma ana tepo saesaena. Se umai ma beruberuna, se hetorouioi ma gigiborina. 44 Se umai tauna tanoubu ta enana, se hetorouioi tauna earua enana. 45 Arinai ede se uriyao, “Tau bagubagunana Adamu i hemala tau ma earuana maumaurina”; na Adamu murimuritana wa ia hemahemauri earuana ede. 46 Earua nige i laoma baguna, na buluma, abotai abo earua. 47 Tau bagubagunana wa tano eai i laoma, ia tano tauna; tau helabuina wa galewa eai i laoma. 48 Isi tanoubu, adi ao doha tano tauna wa; isi galewa enana, adi ao doha galewa tauna wa. 49 Doha ita tanoubu tauna wa tautauna ede, hinage doha galewa tauna tautauna bena i hemala ita ada ao. 50 Egu tataoyao e, ea heribamiu ina: buluma eo osina taba nige Eaubada ena basileia i abi enana, eo taba nige ginauri posaposana, ginauri taba nige i posa, i abi enana.

51 Au ita! Ginauri eamuyamuina esau ea hemasaraha arimiu eai. Gamagarida taba nige ta eno, na gamagarida abo ta ori, 52 ma‐esega, doha mata hekampoina eai, bogigi murimurita‐aririna eai. Paana bogigi abo se iuhi, eo taumatemate abo se hetorouioidi taba nige se posauio, eo ita ada ao si ori. 53 Teina posaposana ta nige‐posaposana abo i lui, eo teina buluma ta maurina, abo mauri nige nosina i lui. 54 Nei huia ne posaposana ta i hemala taba nige i posa, eo buluma ta maurina i hemala mauri nige nosina, abotai abo riba wa se hemamohoiei, si ene: “Saesaepoina wa mate i domyao.”

55 “Mate e, haedi em nuri ede?
Bousa e, haedi em aba unuimai?”
56 Mate ena nuri ede baaea, baaea ena gigibori ede laugagaeo. 57 Na Eaubada ta lautoiei, ia baaea saepoina i leamao eda Guiau Iesu Keriso debana eai.

58 Arinai egu tataoyao e, egu nuanuai, au toroesegaimiu, taba nige se hemoimoiumiu, huia gamagamagari Guiau ana paisoa au helahelai paana au nuatui taba nige au ene ami paisoa nige aniona, Guiau boeana eai.

Copyright information for `SWP