1 Corinthians 4

Tatao taba se nuatuimai doha ina: ai Keriso ena heaheari tataomai, Eaubada ena ribayamuyamui tauitawataidi. Hinage tauitaitawata ena se hetorodi, ginauri bagubaguna ede isi bena abidudurai tataodi. Na eau mo ena au itasipoigu, e ena tatao se lauhetalaigu meta i gagiri. Eamoisa eaubom nige ea lauhetalauioigu. Nuagu eai egu beruberu aisana nige ea nuatui, taiede nige ea ene ea dudurai. Tauitasipoigu ede Guiau. Arinai tabu au hekirainomaodai, sora Guiau ena huia uioma eai ginauri masimasigiri se miayamuyamui, abo i hemasarahadi, eo tatao edi nuatu hinage abo i hemasarahadi. Abotai hari tau, hari tau, Eaubada abo i hedebasaei, ena laulau debadi eai.

Egu tataoyao e, teina ta ea uriuriwa, ea hepatu bagunai eaubogu arigu eai, eo Apolo arinai, omi debamiu eai; bena miamia doha uriuri tabudi eai se heatada, au italobaidi arimai eai, eo au lauwataidi, bena tabu tatao au ribatausaedi, eo pele esau, e pele esau, au ribatausaedi. Eai i hetorom i ene oa mo udoi? Saha ue abi na nige se leawa? Na ena se leawa edohana u ribapasipasiei, doha nige se ainauiaim?

Omi gamagarimiu au monauo! Monamonaune tataomiu omi! Ai nige’e na au hemala wasawasa! Au awa‐tanuaga i lolo meta, bena ai hinage ai patulaowa emi awa‐tanuaga arinai! Eau ea ene nuana Eaubada ai aposotolo i hetoromuritaaririemai, doha tatao se ribahematedio; ai hemala tanoubu tataodi edi abaaiewa, aneru enadi hinage. 10 Keriso debana eai ai ai eauyaure, omi Keriso boeana eai au sonoga. Ai beruberu, na omi au adidiri. Omi se heasisiemiu, ai mo se isugaraemai. 11 I laoma e ina mahana eai ta ai guriam eo gadomai se magu, nige ema lulu, eo se oiheahearimai, eo nige ema abamia, 12 eo ai paisoa, nimamai eai ai paipaisoa. Se riba hebaaeamai, ai riba helolo; se heamamnamai ai nuapaipai mo; 13 wasamai se hebaaea, ai aipate ai ribahedudurai; ai hemala tanoubu ena wenu biibiina, ginauri gamagaridi edi puropuro baaeana, i laoma e teina asubena eai ta.

14 Teina ta nige ea uriuri arimiu eai bena ea hetaumaeamaeamiu, na paana omi doha nanatuguyao, ea gadosisiemiu, arinai ea ribahesanapuemiu. 15 Hage ena tauheatamiu Keriso arinai tausani saudoudoi, taba nige tamamiuyao se gamagari. Eau tauhetubumiu Keriso Iesu boeana eai, evanelia ta arinai. 16 Arinai ea awanorilaowa arimiu eai, bena au lauwataiguma. 17 Paana ede ina Timoteo ea hetamariyawa, ia natu‐eogoyogoigu ede, Guiau arinai ena abi se lolo, egu laulau Keriso miamiana eai abo i henuaisinimiu, doha dimo gamagamagari eai ea laulauheata, dubu gamagamagari eai. 18 Headi se nuasaesae, doha si ene taba nige ea laowa. 19 Na abo ea laowa, nige baeaona, ena Guiau ena nuatu doha nei, abo tatao eauyaure wa edi riba taba nige ea ataiei, na edi gigibori mo abo ea lauita. 20 Eaubada ena basileia nige ribariba eai, na gigibori ede. 21 Omi edohamiu? Abo ea laowa ma‐nimapidipidirigu, e gadosisi eai, eo ma nuabigabigagu?

Copyright information for `SWP