1 Timothy 5

Tautaubada tabu u ribasuui: u lauhasahasai doha ia tamam: eo tatao hewahewaridi doha em tataoyao; Sinesinebada doha isi sinamyao, hasahasara doha isi louloumyao, ma nua’aam.

Sisine se wabu, ena se wabu mamohoi, u nanabuedi. Na, ena sine wabuwabu esau ia nanatunayao, e ia tubunayao i abidi, isi edi numa eai se heatadi edi abi abo se lolo, eo tamadi, sinadi abo se heasisiedi; paana teina ta i lolo Eaubada matana eai, ia hinage i henuaaririei. Na, sine wa ie wabu mamohoi, eo ia gogogesagesa sinena, Eaubada i sunusunumaei, eo maiona to asubena i miatahitahi, i aiaiboda, eo i laulau‐uura. Na, ia ena miamia eai iabom amnana i helolo mo, ma maurina na ia mo doha ie mate. Teina riba ta u laulauhesomdi, isi abo nige edi aba hegihegirudi. Ena esau ia mo enana nige i aiainauiaidi, ia ena numa tataodi hinage nige i aiainauiadi, sunumana wa i harereyao, tau nige i sunusunuma wa ena baaea nige doha meta.

Tabu sine wabuwabu se hinerigaibuidi, isi mo edi borimai se lau tatao‐haiona‐se‐mate, eo isi hinage monediyao esega dumaduma. 10 Sine we ana paisoa tatao se ita abo se riba sine moidosiei, ena ia nanatunayao headi i suidi, eo ena laolaoma tataodi headi i haihaitalaidi; eo ena hetabu tataodi aedi i deudeuridi, eo ena tatao nuanuadubu i tautaubigaidi, eo ana paisoa lolodi gamagamagari i abiabidi ma nuanuaadidirina. 11 Sisine wabu hasahasaradi mo u otaotaedi, isi sora abo se hetubu Keriso se gudugudui, abo se tawasora. 12 Isi abo se mate, paana ede edi sunuma bagubaguna se abihaiyao. 13 Hinage abo se babawa gaibu mo, se elielitatausi hari numa, hari numa eai, hinage nige se babawa gaibu mo, isi abo se gagagari gaibu mo, eo tatao se hemohemodedi, eo edi ribariba nige se lolo. 14 Egu nuatu ea ’ne, sisine se wabu hasahasara abo se tawasorauio, nanatudiyao abo se laulaulabauio, eo edi numa se itawatai, eo edi laulau aridi eai eda waiunu tabu edi aba hegirudi. 15 Paana ede headi se sinibuio, na se lu senauri Satani arinai. 16 Ena tau esau, e sine esau, tauataataiena isinewabuwabu headi se abidi, isi abo se tautaubigaidi, tabu ekalesia se nuatuidi, isi sinewabuwabu mamohoi ekalesia abo se tautaubigaedi.

17 Babada ena se itaitawatalolo abo au heasisi‐labulabuiedi, isi ede se paisoa guguia, eo laulauheata aridi eai. 18 Paana ede uriuri eai si ene, “Bulumakau wa sitona tauututawatawaina tabu awana au au:” eo hinage si ene, “I lolo taupaisoa ena maisa i abi.” 19 Tautaubada ena se hegiru, tabu oabom riba wa u ataiei, witinesi labui e haiona hinage matadi eai isi ia abo se hegiru. 20 Isi taulaulaubaaea u ribasuuidi tatao gamagamagari matadi eai, headi hinage abo se matausi. 21 Eaubada matana eai, eo Guiau Iesu Keriso matana eai, eo aneru se hetorononohaidio matadi eai, ea lauhesom, teina riba ta u laulauwatawataidi tabu tau esau u nuatunapai mo, am paisoa eai tabu tau esega mo enana u toro. 22 Tabu nimam u saosaeheulai tau esau boruboruna eai, tabu hari tatao edi baaea u sagusaguidi: ma nua’aam eai u laulau, oabom u heaauioim.

23 Goila ahaaha mo tabu u nom: waina hinage begana mo u nom, bogam wa eo am asiebo kamanim wa u nuatui.

24 Tatao headi edi laulau baaea se hemahemasarahanonohaidio, se lau baguna edi aba hedudurai eai; tatao headi edi laulau baaea abo hinage se hemasarahamuritaedi. 25 Hinage doha tatao headi adi paisoa lolodi se hemahemasarahanonohaidio; eo tatao headi enadi sora nige se hemasarahadi taba nige edi aba toreyamuidi.

Copyright information for `SWP