2 Timothy 3

Teina hinage abo u nuatui, asubena murimuritana eai huia baabaaeaariridi abo se lagema. Paana ede tatao isibom abo se gadogadosisiuiodi, eo ginauri abo se gadosisiedi, eo se ribapasipasiedi, eo se ribatausaedi, eo Eaubada se ribabaaeaei, tamadiyao, sinadiyao se awayagaraedi, laulautoi nige abina se ata, nige se hetabu. Nige edi gadosisi, nige nuadi si ene ai laubiriedi, se hegirunapaidi mo, laulau baaea se nuahaiedi, eo se manamanabara, eo tatao lolodi se isuewaedi. Isi taumoru, eo nuadi se heuheula, se awapokiedi, laulaugaibu mo se kodedi, edi gadosisi meta, Eaubada nige se gadosisiei doha. Nenedi doha Eaubada ena laulau se nuatuidi, na ena gigibori mo se hekahekau; tatao meta doha u lauudoiedi. Ia ede teina doha se awasae mahimahihi numa alodi eai, sisine eauyauredi ma baabaaeadi se woealaedi, nuatu gerogeromadi se laulauwataidi. Huia gamagamagari se lauheataedi, riba mamohoina nige abina se ata. Doha Iani eo Iameri taudi labui Mose se gudugudui, teina ta hinage riba mamohoina se gudugudui, tatao wa nuadi se bii, eo sunuma wa ribana arinai nuadi nige se dudurai. Isi taba nige se lau darudaru se lau mo, tatao gamagaridi edi eauyaure abo se ita, doha hinage wau tataodi labui isi enadi wa.

10 Egu riba u itakomakomaniyao, eo egu laulau hinage, eo egu nuatu adidirina, eo egu sunuma, eo egu nuatoatoa i laulau mo, eo egu gadosisi, eo egu nuapaipai, 11 egu amamna hinage, eo egu nuadubu ea hearodi Anitioka eai, eo Ikonio eai, eo Luseta eai, amamna ea hearodi wa gamagamagaridi ne aridi eai Guiau i hemaurigu. 12 Mamohoi isi gamagaridi Eaubada ena laulau tauabidi, Keriso Iesu boeana eai, amamna abo se hearodi. 13 Na tatao baaea, eo tatao borabora abo edi baaea se hetubu helailai, tatao se boraidi, eo isibom hinage se borauioidi. 14 Ginauri wa se heatamo eo abidi u ataaririo u laulauwataidi, u nuatui hinage eai arinai ue abidi. 15 Eo ma gagirim eai wa uriuri tabudi abidi ue ata, isi ede abo se hesonogam mauri arinai, sunuma debana eai, ia ede Keriso Iesu boeana eai. 16 Uriuri tabuna gamagamagari Eaubada i mosemosedi tauurina aridi eai, lauheata arinai abo i lolo, eo ribasuu, eo ribahedudurai, eo laulaududurai lauheatana hinage. 17 Eaubada ena tau abo i loloesegai, paisoa lolodi gamagamagari abo i abikomakomaniesegaidi.

Copyright information for `SWP