Genesis 17

Heperitome, Ribahesunuma Heiheinoina

Aberama ena borimai se lage’o tatao‐hasi‐se‐mate‐saudoudoi‐harigigi‐hasi GUIAU i taumasaraha Aberama arinai, i ribalau i ene, “Eau Gigibori‐aririna Eaubadana; matagu eai bena u laulau eo nige aba hegirum. Egu aigora oa eo eau matada eai wa abo, ea hemamohoiei, eo oa abo ea hegamagari‐aririem.” Aberama abo i duludobi tano eai, abo Eaubada i ribalau arinai, i ene, “U ita, egu aigora wa u abiyao, oa abo basileia gamagaridi tamadi ede. Esam taba nige se ataiuioi Aberama, esam abo se atai Aberahama, paana ea hetorom basileia moutuadi tamadi. Abo ea ainauiaim u ua ariariri; basileia arim eai abo se tubu, eo wasawasa abo boeam eai se laoma. Egu aigora, oa eo eau matada eai wa, abo ea hemamohoiei am isimurita se tubu‐muritama aridi eai, i lau e hari isi to hari isi, aigora miatahitahina, eau abo em Eaubada, am isimurita enadi hinage. Em aba‐tautausi tanona ta abo ea leawa oa arim eai, eo am isimurita se muritama aridi eai, Kanana tanona maudoudoina ta, abo enamiu i lau e huia nige nosina; eau hinage abo edi Eaubada.”

Eaubada ie riba Aberahama arinai i ene, “Na oa mo, oa abo egu aigora ribadi u sogohidi, oa eo am isimurita se murimuritama wa, isidi gamagaridi eai. 10 Egu aigora heiheinoina ina, abo au abiwatai, eau eo oa eo am isimurita murim eai, enadi, boeamiu eai tatao gamagaridi abo se peritome. 11 Abo se heperitomemiu opimiu bulumadi eai, eda aigora heiheinoina abo, eau eo omi duaduarida eai. 12 Eai boeamiu eai ena asubena hehaligigi‐haionana eai abo se heperitome; merumeru tatao, am isi gamagaridi eai, numa eai se labasidi e em moni eai ue uneidi murimuri tauna esau arinai ia nige natumiu mamohoi. 13 Ia wa em numa eai, eo ia wa em moni eai se unehai, taudi labui abo se peritomedi. Arinai abo egu aigora wa bulumamiu eai, aigorana taba nige i lautom. 14 Tau esa nige se peritome bulumana opina eai abo ena tataoyao boeadi eai se tomhai; egu aigora i utusi ede.”

15 Eaubada abo i ribalau Aberahama arinai, i ene, “Na Sara monem wa, tabu esana u atai Sara, ia esana abo Saraha. 16 Ia abo ea ainauiai, hinage oa natum abo eo leawa, ia debana eai; abo ea ainauiai to i hemala basileia gamagaridi sinadi; tatao edi wasawasa ia boeana eai abo se tubuma.” 17 Aberahama abo i gurisalaoba matana eai, to i maruhi iabom nuana eai, ie riba i ene, “Abo merumeru se labasi tau ena borimai handere esega arinai? Abo Saraha natuna i labasi, ia i lage’o borimai tatao‐hasi‐se‐mate saudoudoi?” 18 Abo Aberahama i riba Eaubada arinai, i ene, “Ae, taba Isamaela i mia matam eai mo!” 19 Eaubada i ene, “Nige’e, na monem Saraha abo natum i labasi, eo esana abo u atai Isaako. Egu aigora abo ea hemamohoiei ia arinai, aigora miamiatahitahina eo ana isimurita murina eai enadi hinage. 20 Na Isamaela wa, em riba ea ataieiya’o; u ita, abo ea ainauiai hinage, ea he’ua eo ea hegamagari aririei; wasawasa saudoudoi‐labui ia abo tamadi ede, abo ea hetoro i hemala basileia saesaena. 21 Na egu aigora wa Isaako arinai abo ea hetoro, ia wa Saraha abo enam i labasi, inata arinai ie lau borimai esega.”

22 Maena se ribariba lautom, Eaubada i laugabaei. 23 Aberahama natuna Isamaela abo i woeai, maena ena heaheari tauauau tataodi ena numa eai se labasidi, eo ena moni eai se unehaidi, tau maudoina Aberahama ena numa tataodi, to bulumadi opidi eai i heperitomedi asubena esega eai ne, doha Eaubada i heriba wa. 24 Aberahama ena borimai tatao‐hasi‐se‐mate‐saudoudoi‐haligigi‐hasi huiana ne bulumana opina eai se heperitome. 25 Natuna tau Isamaela ena borimai saudoudoihaiona se lauo abo se heperitome bulumana opina eai. 26 Asubena esega eai Aberahama eo natuna Isamaela se heperitome esegaidi. 27 Eo tatao gamagaridi ena numa eai se labasidi, eo isi wa moni eai se unehaidi murimuri‐tataodi aridi eai, maenayao se heperitome esegaidi.

Copyright information for `SWP