Genesis 24

Isaako Monena se Abi

Aberahama i tautaubada’o, ena borimai se gamagari’o, eo ginauri gamagaridi eai GUIAU Aberahama i ainauiai, Aberahama i ribalau ena heaheari tauna arinai, ia taubagubagunana wa ena numa alona eai eo ena ginauri maudoidi ia tauitawataina ede, i ene, “Nimam u tore gotugu ubuna eai. Ea henua bena u riba aigora GUIAU debana eai, ia galewa eo tanoubu Eaubadana, taba nige natugu monena u eooi Kanana nanatunayao sisinedi boeadi eai, isi wa boeadi eai ea miamia. Na u lau mo egu eanua tahunuana eai eo agu bogaoyao aridi eai, nei eai abo natugu Isaako monena u abi.” Heaheari tauna wa arinai i heuio i ene, “Ena taba sinena wa nige i eari bena i hemuriwataiguma eanua eai ta, abo natum eo woeauioi eanua ne arinai u laoma wa?” Aberahama i ribalau arinai i ene, “U komakomani, tabu natugu u woeaiuioi nei eai. GUIAU, galewa Eaubadana, ia tamagu ena numa eai eo egu eanua abalabasigu eai i woeahaiguma, i ribalaoma arigu eai ie riba aigora i ene, ‘Am isimurita aridi eai abo tano ta ea mosei’, ia abo ena aneru i hetamari mugaiem, natugu monena abo u lobai nei eai. Na ena sinena wa nige i eari bena i hemuriwataim, besi ina aigora ta arinai abo ea earihaim; ia mo natugu tau tabu u woeauioi eanua eai ne.” Arinai tauheaheari wa nimana ie tore tanuagana Aberahama gotuna ubuna eai, riba ta aigorana i aigoraei.

10 Abotai heaheari tauna wa tanuagana ena kamela saudoudoi i abidi i torohai, ainauia lolololodi gamagaridi tanuagana i mosedi, bena i laedi nimana eai; na i torohai ie lau Mesapotamia eai, Nahora ena eanua eai. 11 Abo kamela i heturibonodi, eanua murimurina eai goila huana gegesina eai maimailahi huiana sisine edi huia pesama bena goila se oi. 12 To i ene, “GUIAU e, tanuagagu Aberahama ena Eaubada e, wau ta bena egu laoma aniona i tubu, ea aibodaim ta em gadosisi otaotahaina tanuagagu Aberahama arinai wa bena u hemasaraha ina. 13 U itagu ea totoro goila bunubunuwasina eai ta, eanua tataodi nanatudiyao sisine se laolaoma bena goila se oi, 14 taba mo siuna arinai ea riba, ea ene, ‘Agutoi em ledu me u dobeiama bena ea nom,’ eo ia ena riba i ene, ‘U nom eo em kamela adi hinage abo ea oi,’ ia ena taba sinena ede, ia u tauribaei em heaheari Isaako enana. Teina arinai abo ea nuatui, em gadosisi otaotahaina ede u hemasaraha tanuagagu arinai.”

15 Na Rebeka ie ita, sora ma ribaribana, Betuela natuna, ia Mileka natuna, Nahora Aberahama ena tau wa monena. Siu wa i pesama dabayarona eai goila leduna i bahei, i laolaoma. 16 Sine wa ana ao i lolo ariri, ia sine nuanuasupuna, sora nige tau esau abina i ata; abo ie dobi goila huana eai wa, ena ledu i hemonau to i saema. 17 Heaheari tauna wa abo i taulau bena i hailobai, i ene, “Agutoi, goila begana agu u leama em ledu eai me.” 18 Sine wa i ene, “Taubada e, u nom” — abo ena ledu nimana eai i laudobei heulai i mosei ie nom. 19 I mosei e i nomlautom abo i ene, “Em kamela adi hinage abo ea oiyama i lau e se nomohi.” 20 Arinai ena ledu i hegoiheulai edi abanomnom arinai i aitautau bena huana arinai i hedawadobei i oiuioi ena kamela gamagaridi adi ie oi. 21 Tau wa i monomonou eo i aiaiewai i nuatu dadaasaeai, GUIAU ena lauwasi ta i heanio e nige’e.

22 Kamela se nom lautom abo tau wa nima’au gold porohena sekela tupona, eo arima gold labui, porohedi sekela gold saudoudoi i abidi, 23 to i ene, “Ea aibodaim bena u heribagu, oa eai natuna? Tamam ena numa eai susuana arinai taba ai mia?” 24 Siuna i ribaheuio i ene, “Eau Betuela natuna sine, ia Mileka natuna tau, Nahora arinai i labasi.” 25 Hinage i ene, “Arimai eai lei aba‐aibai, eo aiai gonoana, eo numa susuana hinage, arinai taba au mia.” 26 Tau wa i dulu dobi, GUIAU i aihelahui, 27 I ene, “GUIAU, tanuagagu Aberahama ena Eaubada ea hedebasaei, ena gadosisi ota’otahaina, eo ena abilolo tanuagagu arinai nige i nuagabaei, na eau, GUIAU egu eda eai ta i woeaigu, ea lage tanuagagu ana bogaoyao edi numa eai.”

28 Siu wa abo i aitautau sinana ena numa taumiana ginauri ta i heribadi. 29 Rebeka louna esau esana Labana i aitautau ie lau goila huana wa arinai, wau tau wa hesabana. 30 Nima’au ie ita, eo arima louna nimana eai, eo louna Rebeka ena riba i ataiei i ene, “Tau ta ena ribariba arigu eai doha ina” abo ie lau tau wa arinai; tau wa ie ita ena kamela hasaridi eai i totoro goila huana eai. 31 I ene, “GUIAU ena helolo tauna e, u awasaema; paana saha murimuri eai u totoro? Em abamia ea henonohayao, eo kamela aba‐toredi hinage.” 32 Arinai tau wa i awasaema numa eai, eo Labana kamela mainadi i iairidi, lagau lei, eo aiai i mosedi, eo goila ie oi bena aena i deuridi, eo tatao maenayao aedi hinage. 33 Abo aiai se tore matana eai bena abo i aiai, na i ene, “Taba nige ea aiai, na sora egu laoma mata paana ea riba bagunai.” I ene, “U ribariba.”

34 Arinai enaba, “Eau Aberahama ena heaheari tauna. 35 GUIAU tanuagagu i ainauia aririei, i hemala taulailaina, mamoe eo bulumakau eawoidi i mosedi, silver eo gold, heaheari tataodi, eo heaheari sisinedi, kamela eo asini. 36 Na Saraha, tanuagagu monena, tanuagagu natuna i labasi na i sinesinebada’o, eo ena gogo maudoina i moseyao. 37 Tanuagagu i lauhesomgu gena ea riba aigora, i ene, ‘Taba nige natugu monena u eooi Kanana nanatudiyao sisinedi aridi eai, isi wa edi tano eai ea mia ta. 38 Na abo u lau tamagu ena asa eai, eo agu bogaoyao aridi eai, metai abo natugu monena u abi.’ 39 Ea ribalau tanuagagu arinai ea ene, ‘Ata bena sine wa nige i henua i hemuriwataiguma.’ 40 Na i ene, ‘GUIAU, ia matana eai ea laulau ta ena aneru abo i hetamari maem, em eda eai abo i helolom, na oa abo sine u woeaiama agu bogaoyao aridi eai, eo tamagu ena asa eai abo natugu monena u abi. 41 Arinai abo em aigora arimai ea eairihaim; ena u lage agu bogaoyao aridi eai na nige se eari bena se leawa, taiede, em aigora arinai abo ea eairigabaem.”

42 “Wauta ea lalage goila huana eai ea ene, ‘GUIAU e, tanuagagu Aberahama ena Eaubada e, taba egu lauwasi bena u heanio. 43 U itagu goila huana gegesina eai ea totoro ta, ena taba siu esau i pesama goila bena i oi, na ea ribalau ea ene, “Agutoi, goila agu begana u leama em ledu eai me ea nom.” 44 Ena egu riba i heuio i ene, “U nom, em kamela adi hinage abo ea oiyama.” taba ia bena sinena ede, ia ede GUIAU i tauribaei wa tanuagagu, natuna tau enana.’

45 “Nuaboeagu eai ma ribaribagu na ne Rebeka ea ita i pesama ledu dabayarona eai i bahei, ie dobi goila huana ie oi. Ea ribalau arinai ea ene, ‘Agutoi, taba ea nom.’ 46 Ena ledu dabayarona eai i laudobei heuheulai i ene, ‘U nom em kamela adi abo ea oi hinage.’ Arinai ea nonom eo egu kamela adi i mosedi se nom hinage. 47 Abo ea oimuri ea ene, ‘Oa eai natuna?’ I ene, ‘Eau Betuela natuna siu, ia Nahora natuna, Mileka i labasi wa.’ Arinai bea omo’omo ea toredi, eo arima imana eai. 48 Eau ea dulu dobi GUIAU ea aihelahui, GUIAU ea ribahelolo, tanuagagu Aberahama ena Eaubada ia eda duduraina eai i woeaigu arinai tanuagagu ana bogao tauna natuna siu abo ea woeai ia natuna tau enana. 49 Ehei, ena emi abi se dudulai, eo em abi se lolo tanuagagu arinai au heribagu, ena nige’e au heribagu, hinage abo ea nuatui, tupo tutu eai ea lau e tupo seuseuri.”

50 Abo Labana eo Betuela ribana se heuio si ene, “Ginauri ta GUIAU arinai i laoma, ai taba nige saha ai ribaei lolona e baaeana. 51 Rebeka u ita, matam eai me, u woeai, u laei, ia abo tanuagam natuna monena doha GUIAU i ribaei.” 52 Aberahama ena heaheari tauna edi riba i ataiedi, i tabaohu tano eai GUIAU matana eai. 53 Heaheari wa pasa silver eo gold i lahahepesadi, eo lulu, to i mosedi Rebeka arinai, sinana eo louna hinage pasa maisa lailaidi i mosedi. 54 Abo ia maena tataoyao se ai eo se nom, eo nei eai maiona eai se eno: Mara‐ie‐tom, se eno toro i ene, “Au hetamarigu bena ea uio tanuagu arinai.” 55 Sinana eo louna si ene, “Sora siu ta i mia begana arimai eai doha asubena saudoudoi, muridi eai abo au lau.” 56 Na heaheari ia wa i ribalau aridi eai i ene, “Tabu au heboneawagu, GUIAU egu laoma ta i heanio, besi au buigabaegu, ea uio tanuagagu arinai.” 57 Si ene, “Siuna abo ta eogai ta hesioei.” 58 To Rebeka se eogai se ribalau arinai si ene, “Abo ina tau ta maem au lau wa?” Ia i ene, “Abo ea lau.” 59 Arinai Rebeka, loudi wa, se hetamari ie lau, maena sinetauitawataina, eo Aberahama ena heaheari tauna, eo ana sasaguyao. 60 Eo Rebeka se ribahelolo, se ribalau si ene, “Loumai e, oa abo tausani eo tausani saudoudoi sinadi ede: eo am isimurita tau hewaiunuedi edi aba‐lau se abi enadi!” 61 Abotai Rebeka ma ena heaheari sisinedi se torohai kamela dageladi eai se geru, tau wa se hemuriwatai. Doha ina heaheari tauna wa Rebeka ie abi eo ena dobila eai ie lau.

62 Isaako Biera‐lahai‐roi huana eai wa i laoma, Negeba tehana eai i miamia. 63 Maimailahi eai Isaako ie pesa oea eai i laulauwayo bena nuana i hedosiuioi eo i nuanuatuadidiri; abo matana i helabaisinidi to nei kamela i itadi se laolaoma. 64 Rebeka i itasae, Isaako ie ita, to kamela i pesagabaei. 65 eo iribalau heaheari tauna wa arinai i ene, “Tau ne eai, oea eai i laolaoma bena i hailobaida?” Heaheari tauna wa i ene, “Meta agu tanuaga.” Arinai ena abobo ie abi to matana i umui. 66 Heaheari tauna wa ginauri gamagaridi i ginauridi wa Isaako i heriba. 67 Isaako abo Rebeka wa i woeai sinana Sahara ena numa‐lulu eai, abo Rebeka ie abi, i hemala monena, eo i gadosisiei. Abotai Isaako ena abo nuabiga i lobai sinana ena mate murina eai.

Copyright information for `SWP