Genesis 28

Abo Isaako Iakobo i eogai i ribahelolo, abo i lauhesom i ene “Taba nige Kanana sinena esau u tawasorai. U torohai u lau Padana‐arama eai, sinam tamana Betuela, ena asa eai, nei eai Labana, sinam louna wa, natuna esau u abi u tawasorai. Eaubada Gigibori‐aririna i ainauiaim, uauam i helai, i hegamagari, abo u hemala boga lailai aririna. Aberahama ribahelolona taba i leawa arim eai wa, ma’am isimurita hinage, bena em aba‐mia tanodi abo u abidi enamyao, isi ede Eaubada Aberahama i mosei wa!” Doha ina Isaako Iakobo i hetamari ie lau, to ie lau Padana‐arama eai, Labana arinai Betuela natuna, Arama tauna wa, ia Iakobo eo Isoa sinadi, Rebeka, louna.

Isoa Monena Esau ie Abi

Isoa ie ita hede Isaako Iakobo i riba helolo, eo i hetamari ie lau Padana‐arama, nei eai bena monena i abi, eo i ribahelolo hinage i heriba, “Tabu Kanana sinena esau u tawasorai.” Eo hinage Iakobo tamana eo sinana i awa abieidi to ie lau Padana‐arama eai. Arinai Isoa i italobai hede Kanana sisinedi tamana Isaako nige i henuadi, To Isoa ie lau Isamaela eai, monena esau ie abi, ia ede Mahalate, Isamaela, Aberahama natuna tau wa, natuna siu, eo Nebaiota louna: eo monenayao headi i heesegaidi.

Iakobo ena Enosuai Beteli eai

10 Iakobo Biera‐siba i laugabaei, eo Harana hesabana i laulau, 11 ie lage dimo esau arinai ie mia meta maionana, paana mahana i duio. Dimo ne we’una esau ie abi uruna eai ie tore, i aiunuaei to nei eai ie eno. 12 Na i enosuai, paipeo tano eai se hetoro ie sae e galewa eai ie lage, na nei eai Eaubada ena aneru paipeo arinai se sae eo se dobi. 13 Abo GUIAU dedeana eai i totoro, eo i ene, “Eau GUIAU ede, tamam Aberahama ena Eaubada, eo Isaako ena Eaubada, ina tano ta potana eai ue eno wa abo ea mosei oa arim eai, eo am isimurita aridi eai. 14 Am isimurita abo doha tanoubu muamuana abo eanua maudoina se hemonau tupo mahana ena aba‐dui, eo mahana ena aba dalasae, tupo bauri, eo tupo eawana, eo oa debam eai, eo am isimurita debadi eai, abo tanoubu eai ta boga gamagaridi abo se helolodi. 15 U ita, Eau maem, abo ea itawataim em abalau haedi eai, abo ea woeauioim ina tano eai ta. Taba nige ea laugabaem i lau e saha ea ribaei ea hemamohoiei.” 16 Iakobo i eno siliata, i ene, “Mamohoi GUIAU ia ina dimo eai ta, na nige ea nuatui.” 17 Abo i matausi i ene, “Dimo ta i didiga ariri! Mamohoi Eaubada ena numa ede ina ta, ina galewa aba‐lusorana!”

18 Iakobo i toro heuheula maratomtom gagirina eai, we’u i ai’unuaei wa ie abi, i hetoro doha du, eausi i hegoi potana eai. 19 Dimo ne esana ie tore Beteli
28.19“Beteli” aniona ede Eaubada ena numa.
na dimo ne eanuana bagubagunana eai wa esana Lusa.
20 Iakobo abo i riba aigora i ene, “Ena Eaubada abo maegu eo dobila eai ta ea laulau arinai abo i itawataigu, eo aiai i leama ea ai, eo lulu ea lui, 21 eo ea lageuio tamagu ena numa eai ma nuabigagu abo GUIAU ea abi egu Eaubada. 22 Eo we’u ta ea hetoro doha du, abo Eaubada ena numa, eo ginauri gamagaridi u ledima abo lausoisoi hesaudoudoina enam abo ea leawa.”

Copyright information for `SWP