Genesis 36

Isoa ana Isimurita

Isoa ana isimurita ede ina, Isoa esana ede Edoma. Isoa monenayao Kanana hasahasaradi i abidi: Ada, Elona, Hito tauna natuna, eo Oholibama, Anaha natuna Sibiona, Hiwi tauna natuna. Eo Basemata, Isamaela natuna sine, Nebaiota louna. Ada Elipasi i labasi Isoa arinai, eo Basemata Reuela i labasi. Oholibama Ieusa eo Iaalama eo Kora i labasidi: isi ede Isoa nanatunayao tatao ia arinai se labasidi Kanana tanona eai.

Abo Isoa monenayao ma nanatunayao tatao eo sisine eo ena numa tataodi gamagamagaridi ena bulumakau eo ena suisui gamagaridi, eo ena gogo gamagaridi i abidi Kanana eai, i laedi eanua esau eai bena ena tau Iakobo matana eai i lausuaraei. Paana edi gogo se lai ariri nige gonoana se mia esega, hinage tano wa arinai isi tau laolaoma wa nige gonoadi paana edi suisui se gamagari ariri. Arinai Isoa Seira oea tupidi eai ie mia, Isoa esana esau Edoma.

Isoa, Edoma tataodi tamadi, Seira oeana eai ie mia, ana isimurita ede ina. 10 Isoa nanatunayao tatao esadi ede ina, Elipasi, Ada, Isoa monena natuna tau; Reuela, Basemata, Isoa monena, natuna tau. 11 Elipasi nanatunayao tatao Temani, Omara, Sepo, Gatami eo Kenasi. 12 Abo Isoa natuna Elipasi monena esau Timina, Amaleka i labasi. Isi ede Ada, Isoa monena, nanatunayao tatao 13 Reuela nanatunayao tatao ede ina: Nahata, Seraha, Sama eo Misa; isi ede Basemata Isoa monena nanatunayao tatao. 14 Isoa monena Oholibama, ia Anaha natuna, Anaha wa Sibiona natuna Isoa arinai Ieusa, Iaalama eo Kora i labasidi.

15 Isi ede Isoa nanatunayao edi babada; Elipasi, Isoa ena ealahou tau nanatunayao tatao ena babadayao Temani, Omara, Sepo, Kenasi, 16 Kora, Gatami, eo Amaleka. Isi Elipasi ena babadayao Edoma tanona eai. Isi Ada nanatunayao tatao. 17 Isoa natuna tau Reuela nanatunayao tatao ede ina: bada Nahata, bada Seraha, bada Sama, bada Misa. Isi babada ede Reuela arinai se laoma, Edoma tanona eai, Basemata Isoa monena nanatunayao tatao. 18 Isoa monena Oholibama nanatunayao tatao ede ina: bada Ieusa, bada Ialaama, bada Kora, ina babada to Oholibama Isoa monena arinai se laoma, ia wa Anaha natuna sine. 19 Isi ede Isoa, ie ede Edoma, nanatunayao tatao eo edi babadayao.

Seira ana isimurita

20 Seira, Hori tauna, nanatunayao tatao, isi eanua wa taumiaidi, Lotana, Sobale, Sibiona eo Anaha. 21 Disoni, Esera, eo Disani, isi Hori tataodi edi babadayao, Seira nanatunayao Edoma tanona eai. 22 Lotana nanatunayao Hori eo Hemani, eo Lotana louna ede Timina. 23 Sobale nanatunayao ede ina: Aliwani, Manahata, Ebala, Sepo eo Onami. 24 Sibiona nanatunayao ede ina: Aia, eo Anaha. Ina Anaha ta hosi i lobaidi barabara eai huiana wa tamana Sibiona ena asini i suidi. 25 Anaha nanatunayao ede ina: Disoni eo Oholibama, Anaha natuna sine. 26 Disoni nanatunayao ede ina: Hemidani, Esibani, Itirani eo Kerani. 27 Esera nanatunayao ede ina: Bilihani, Saavani, eo Eikani. 28 Disani nanatunayao ede ina: Usa eo Arana. 29 Hori tataodi edi babadayao ede ina: bada Lotana, bada Sobale, bada Sibiona, bada Anaha. 30 Bada Disoni, bada Esera eo bada Disani; ina Hori tataodi Seira tanona edi babadayao.

Edoma edi Wasawasa

31 Abo wasawasa Edoma tanona se tanuagai ede ina, sora nige wasawasa esau Isaraela nanatunayao i tanuagaidi. 32 Bela, Beora natuna tau Edoma tanona i tanuagai, eo ena eanua esana ede Dinaba. 33 Bela ie mate abo Iobaba, ia Seraha, Bosira tauna natuna i helaudamaei, i hemala wasawasa. 34 Abo Iobaba ie mate to Husami, Temani tauna i helaudamai i hemala wasawasa. 35 Husami ie mate, lauhedamaina abo Hadadi, Bedadi natuna tau ia Midiani tataodi Moaba oeana eai i saepoidi, i hemala wasawasa. Ena eanua esana ede Avita. 36 Hadadi i lautom abo Samala, Masareka tauna, i hemala wasawasa. 37 Samala i odalele abo Saulo, Rehobote sagasagana eai i laoma, i lauhedamai i hemala wasawasa. 38 Saulo i odalele abo Baal‐hanana, Akebore natuna tau, i hemala wasawasa. 39 Baal‐hanana, Akebore natuna tau i lautom, abo Hadara i helaudamai i hemala wasawasa: ena eanua esana Pau, monena esana Mehetabele, ia Matareda natuna sine, Matareda wa Mesahaba natuna sine.

40 Isi ede babadayao esadi, Isoa arinai se laoma, adi bogaoyao, eo edi aba‐mia: bada Timina, bada Alawa, bada Ieteti. 41 Bada Oholibama, bada Ela, bada Pinoni. 42 Bada Kenasi, bada Temani, bada Mibisa. 43 Bada Magadiela, eo bada Irami. Isi ede Edoma edi babadayao, esau esau edi tano eai se mia, ia ede Isoa tanona, ia Edoma tataodi tamadiyao.

Copyright information for `SWP