John 17

Teina riba ta Iesu i ribaedi, abo matana i helabaisinidi galewa eai, i ene, “Tamagu e, huiana i lageo; Natum u hedebasaei arinai hinage Natum abo i hedebasaem. Doha ia u hetoro ma gigiborina tatao gamagaridi potadi eai, isi gamagaridi hinage u mosedi ia arinai mauri nige nosina abo i mosei aridi eai. Mauri nige nosina ia ede teina, bena oa se nuatuim, Eaubada tahunuana, esegana mo, eo Iesu Keriso, ia u hetamariama wa. Eau tanoubu eai ea hedebasaem: paisoa oa u leama wa, ea abiheohiyao. Tamagu e, oa abo u hedebasaegu, doha nabada wa egu hedebasae maidam ea abi wa, huiana tanoubu sora.

“Oa esam ea ribahemasarahao tatao tanoubu eai u ledima wa aridi eai: isi enamyao: oa u ledima arigu eai; isi hinage em riba se sogohidio. Isi se nuatuiyao ginauri gamagaridi u ledima arigu eai oa mo arim eai se tubuma. Riba wa oa u ledima arigu eai wa, ea mosedio; isi hinage se abidio, eo se nuatulobaiyao, si ene, oa arim eai ea laomao, eo se nuatuiyao oa u hetamarigumao. Enadi ea lau‐uura wa: tanoubu enana nige ea lau‐uura, isi mo u ledima wa; paana ede isi enamyao. 10 Enagu gamagaridi hinage oa enamyao ede; eo enamyao hinage enagu; hinage isi debadi eai se hedebasaegu ta. 11 Eau abo ea mia lautom tanoubu eai ta, isi mo abo se mia tanoubu eai ta, eo eau abo ea laowa arim eai. Tamana Tabuna e, isi u ledimao oa mo esam debana eai u sogohidi, isi abo nuadi esega mo, doha hinage ita. 12 Tanoubu eai sora ma miagu isi maedi, isi ea sogohidi oa esam debana eai: isi u ledimao arigu eai ea sogohidio, nige esau i tauyamui, na gehena natuna iabom mo; arinai ede uriuri tabuna wa se hemamohoiei. 13 Eau ea laowa arim eai; teina riba ta tanoubu eai ea ribaedi ta, arinai egu nualolo isi nuaboeadi eai abo se hemamohoiei. 14 Em riba ea moseyao isi aridi eai: eo tanoubu se hewaiunuedi, paana ede isi nige tanoubu enadi, doha hinage eau nige tanoubu enana. 15 Nige ea uura, ea ’ne oa bena tanoubu eai u abihaidi, na ea ’ne, bena tanoubu baaeana eai abo u guduguduidi. 16 Isi tanoubu enana nige’e, doha hinage eau tanoubu enana nige’e. 17 Em riba mamohoina arinai u hetabuedi: em riba riba‐mamohoina ede. 18 Doha u hetamariguma tanoubu eai ta, eau hinage tanoubu eai ea hetamaridi. 19 Isi debadi eai ea hetabuuioigu, ribamamohoina arinai isi hinage bena se hetabuedi.

20 “Hinage nige ea lau‐uura isibom mo enadi, na isi wa hinage edi riba arinai abo se sunusunumaegu, enadi ea lau‐uura. 21 Isi gamagaridi bena nuadi esega; doha oa Tamagu boeagu eai, eo eau hinage boeam eai, isi hinage abo nuadi esega boeada eai: tanoubu abo se nuatui oa u hetamarigumao. 22 Hedebasaena oa u leama arigu eai wa, ea mosei isi aridi eai; isi abo nuadi esega, doha hinage ita nuada esega. 23 Eau isi boeadi eai, eo oa boeagu eai, nua‐esega mo arinai isi abo se loloesegai: arinai abo tanoubu se nuatui oa u hetamarigumao, eo u gadosisiedi, doha hinage u gadosisiegu. 24 Tamagu e, ea henua isi u ledima wa, egu aba mia eai abo se mia arigu eai: egu hedebasae u leama wa abo se ita; paana ede tanoubu paana sora nige se hetubu oa u gadosisieguo. 25 Tamagu laulau duduraina e, tanoubu nige se nuatuim: na eau ea nuatuim mo, isi hinage se nuatuiyao oa u hetamarigumao. 26 Esam hinage ea hemasarahayao isi aridi eai, hinage abo ea hemasaraha; abo em gadosisi arinai u gadosisiegu wa bena isi boeadi eai i ota, eau hinage boeadi eai.”

Copyright information for `SWP