John 3

Iesu maena Nikodemo: laba harihariu

Parisea tauna esau, esana ede Nikodemo, Iudea tataodi, adi tanuaga esau. Maiona esau eai ie lau Iesu arinai, i ribalau, i ene, “Rabi e, ai itayao oa hetabu tauna Eaubada arinai u laoma: paana teina laulau gigiboridi u laulauedi wa, nige tau esau i ginauridi, Eaubada mo maena.” Iesu i ribalau ia arinai i ene, “Mamohoi, mamohoi, ea heribam ta, ena tau nige se labasiuioi, Eaubada ena basileia taba nige i ita.” Nikodemo ia i heriba i ene, “Taba tau edoha edi labalabasiuioina ena ia i tautaubadao? Ia abo i luuio sinana bogana eai, abo i labauioi?” Iesu i ribalau i ene, “Mamohoi, mamohoi, ea heribam ta, ena nige se laba goila eai, eo Earua arinai, taba nige i lusora Eaubada ena basileia eai. Ginauri buluma eai se labasi buluma ede; ginauri Earua eai se labasi earua ede. Tabu aruam i loi wau ea heribam wa ea ’ne, ‘Taba se labasiuioimiu.’ Mana i toatoa gaibu, easasana u ataiei, ena aba laoma, eo ena aba lau nige u ita: tau esau, tau esau Earua eai se labasidi doha ede.” Nikodemo ie ribalau ia arinai i ene, “Teina ginauri ta edoha edi abiabidi?” 10 Iesu ia i heriba i ene, “Oa Isaraela adi tanuaga esau ina ginauridi ta nige u nuatuidi wa? 11 Mamohoi, mamohoi, ea heribam ta, ginauri ai nuatuidio ia ede ai ribaedi ta, eo ginauri hinage ai itadio ai hemasarahadi: ema ribahemasaraha nige au ataiei. 12 Taba tanoubu ribadi ea heribamiu nige au nuatuidi: abo edoha emi nuanuatuina taba galewa ribadi ea heribamiu? 13 Nige tau esau i awasae galewa eai, iabom mo galewa eai i dobima, iaede Tau Natuna. 14 Doha hinage Mose mota i ueisini barabara eai wa, doha ede Tau Natuna taba hinage se ueisini. 15 Eai to eai ia se nuatui nige se mate, na mauri nige nosina abo se abi.

16 “Eaubada tanoubu i gadosisiedi doha ede ina, ia Natueseesegana i moseyao tau esa, tau esa ia i nuatui taba nige i mate, na abo i mauri nige nosina. 17 Eaubada, Natuna nige i hetamariama tanoubu eai ta, bena tanoubu i hegiru: na ena nuatu mo bena tanoubu i tuahemauri. 18 Tau esau ia i sunusunumaei nige se hegiru: ia nige i sunumaei se hegiru nonohaiyao paana ede Eaubada Natueseesegana esana nige i nuatui. 19 Hegiruna wa, ia ede ina, marana i lagemao tanoubu eai ta, tatao masigiri gadohina se gadohi, marana wa nige se henua, paana ede edi laulau se baaea mo. 20 Tatao gamagaridi edi laulau se baaea marana se halanuinuiei, eo nige se laoma marana eai, edi laulau ata se hemasarahadi. 21 Ena tau esau riba mamohoi laulauna i laulauedi, ia marana eai i laoma, ena laulau abo se masaraha, paana ede Eaubada maena.”

Ioane Bapatiso ena aba ribalautom.

22 Ina ginauri ta muridi eai Iesu ena heaheata maenayao se lau Iudea oeana eai; nei eai maedi se mia, eo se hebahebapatiso. 23 Ioane hinage i hebapatiso Enona eai Salima hanahanauna eai, paana goila lailai nei eai; tatao se laolaoma arinai se hebapatisoidi. 24 Ioane sora numa masigiri eai nige se tutugudui.

25 Ioane ena heaheatayao headi maedi Iudea tauna esau edi heaa laulauna se haiawayagaraei. 26 Abo se laoma Ioane arinai se heriba, si ene, “Rabi e, lahinae tau wa maem Ioridana hari teha eai, ia u wasaduaiei wa, ia ede i bapatiso eo tatao gamagaridi se laoma ia arinai.” 27 Ioane i heribadi, i ene, “Nige tau esau ginauri i abigaibui, galewa eai mo se mosei abo i abi. 28 Omi au nuatui lahinae ea riba hemasarahaguo, ea ’ne, ‘Eau nige Keriso, eau se hetamarigu ia ea bagubagunaei.’ 29 Ia sinetawasora ie abi ia ede tautawasora: tautawasora ena heriam i totoro, eo arinana i ataiei, ie kode ariri paana ede tautawasora arinana i ataiei: egu kode teina arinai se hemamohoiei. 30 Ia abo ie sae, eau abo ea dobidobi.”

31 Ia ewa eai i dobima gamagaridi i saetawatawaidi: tanoubu tauna tanoubu ginaurina ede, ena riba tanoubu ribana: ia galewa eai i dobima isi gamagaridi i saetawatawaidi. 32 Ginauri i itadi wa eo i ataiedi wa, i ribahemasarahadi: ena riba nige tau esau i abi. 33 Tau esau ia ena riba i ataiei, i nuatulobai Eaubada mamohoi mo ede. 34 Ia Eaubada i hetamariama Eaubada ena riba i ribaedi; paana ede Earua i mosegabaei, nige i nuahi. 35 Tamana, Natuna i gadosisiei, ginauri gamagaridi i mosedi ia nimana eai. 36 Ia Natuna taunuatudidinina mauri nige nosina abo i abi, ia Natuna nige i sunumaei mauri taba nige i ita; Eaubada ena ouyalayala i ota ia potana eai.

Copyright information for `SWP