Psalms 103

Hedebasae GUIAU arinai ena ainauia debadi eai

Earuagu e, GUIAU u ribatausaei;
nuagu maudoina e, ia esana tabuna u ribatausaei.
Earuagu e, GUIAU u ribatausaei,
eo ena ainauia gamagaridi tabu u nuahuiedi:
ia em laulau gewagewadi gamagaridi ie ribagigiridi,
ia em iwala gamagaridi i helolodi,
em mauri ia mate Duhana eai i unehai,
ia urum i heou gadosisi miatahitahina eo nuatoatoa arinai,
ia ginauri lolodi eai awam i hemonau i lau e em mauri sigana eai,
arinai taum ena adidiri i heharihariu doha magesubu.

GUIAU abiabi dudurai i hemasaraha,
isi gamagaridi se heamamnadi aridi eai.
Ia ena dobila Mose i heata,
ena paipaisoa hinage Isaraela tataodi gamagaridi i heatadi.
GUIAU ena nuatoatoa eo ena aiainauia ie lai,
ena ouyalayala nige i abiheulai, ena gadosisi miatahitahina i helai mo ie lau.
Ia taba nige huia gamagari i dilaida,
ena ouyalayala taba nige i ota huia gamagari.
10 Eda baaea maisadi nige i ledima,
eo eda laulau gewagewadi hinage nige maisadi i ledima.
11 Paana ede doha galewa tanoubu i saetawatawa aririei,
doha ede meta ena gadosisi miatahitahina laina, ia tauheasisiena enadi.
12 Lohana doha mahana ena abadalasae ie lau mahana ena abadui,
lohana doha meta eda awayagara arida eai i abihesuaradi.
13 Doha hinage tamana nanatunayao i nuatoatoaedi,
GUIAU tauheasisiena tataodi nei doha abo i nuatoatoaedi.
14 Paana edohana ena ginaginaurida ia abina i atao,
i nuatuiyao ita doha tano muamuana.

15 Na tau ia ena mauri asubenadi doha lei,
e doha oea liasidi i maumauriei:
16 paana mana ie toa ede i eohoei i lao’o,
ena abaota wa nige i itauioi.
17 Na GUIAU ena godosisi miatahitahina mumuga ariri eai i laoma, otaotana i lau e nige nosina,
ia tauheasisiena enadi,
eo ena laulau dudurai isimuri to isimuri tataodi enadi,
18 isi ena laugagaeo taunanabuena enadi,
eo ena lauheata ribadi taunuanuatuidi, eo taupaisoaidi enadi.

19 GUIAU ena terona galewa eai i abinonohai,
eo tanoubu maudoina boeana eai ia wasawasa ede.
20 GUIAU au ribatausaei, omi ena aneru e,
omi emi adidiri i lai ariri, ia ena lauhesom au nanabuedi,
ena riba daguguna hinage au ataataiei!
21 Ena tauiala tataomiu gamagarimiu e, galewa tehana eai, GUIAU au ribatausaei,
ena heaheari tataomiu ena gadosisi au lauwatai, ia au ribatausaei!
22 GUIAU ena nima paisoa gamagarimiu e, omi ia au ribatausaei,
eanua gamagaridi ia i tanuagaidi.
Earuagu e, GUIAU u ribatausaei!
Copyright information for `SWP