Psalms 57

Hesaguhai tau hebaaea nimadi eai uurana

Eaubada e, u nuatoatoaegu, u nuatoatoaegu ta,
paana oa arim eai earuagu abo i ailogulogu;
mabem logulogudi eai abo ea ailogulogu,
i lau e sabom i lau’o.
Ea eogalau Eaubada Saesae Aririna arinai,
Eaubada arinai ia wa ena nuatu enagu i hemamohoiei.
Galewa eai abasaguigu ia abo i hetamariama eo abo i hemaurigu,
aidobu bena se ututawaigu abo i hetaumaeamaeadi.
Eaubada ena gadosisi miatahitahina, eo ena riba hemamohoiena abo i hetamarilaei!

Liona boeadi eai ea laulauota,
isi se lelehi ariri bena tatao se aidi,
moadi ede alahia eo pidu,
memenadi alahia matamatadi ede.

Eaubada e, oa abo u sae ariariri galewa ewana eai!
Em namanamari tanoubu bena i hemonau!

Hiana se gala nonohai aegu adi,
ea nuaporohe ariri.
Duha se sara eau egu dobila eai
na isi, isibom se beudobi alona eai.

Eaubada e, nuagu i otaesegai,
nuagu i ota esegai.
Abo ea wana eo salamo aridi eai abo ea hedebasaei!
Earuagu, u enotoro!
Baubau eo huelele, au enotoro!
Mara i uiari abo ea hanoi!
Guiau e, abo ea lautoiem, etene boeadi eai:
aihelahuim abo ea wanaidi hari eanua tataodi boeadi eai.
10 Paana em gadosisi miatahitahina ie sae doha galewa,
am ao otaotahaina ie sae doha eada.
11 Eaubada e, oa abo u sae ariariri galewa ewana eai!
Em namanamari tanoubu bena i hemonau!
Copyright information for `SWP