Revelation of John 17

Tanoubu ta tautauna, ede “Babulonia,” ana siga.

Abo aneru haligigi‐labui, bia haligigi‐labui tauabina wa, adi sagu esau i laoma arigu eai, i ribalaoma, i ene, “U laoma, sine laulau baaea saesaena wa, goila gamagamagari i babawatawaidi wa, hekirainona abo ea heitam, ia wa tanoubu ta wasawasadi i enoenoedi, eo tanoubu taumia ena laulau baaea eai doha i henomeauyauredi.” Earuagu eai abo i bahelaegu barabara esau eai, to sine wa ea iita, i gerusae suisui buiabuiana potana eai, suisui ta esa udoi udoi Eaubada aba riba‐baaeaina i monau, uruuruna haligigi‐labui, eo donana saudoudoi. Sine wa lulu buiabuiana eo alaalawana eai se helui, gold eo we’u namanamaridi eo giniuba matamatapoudi arinai se hepasa, nimana eai aba‐nomnom gold, abi‐baaea udoi udoi i monau, ena laulau biibiina ginaurina. Deba‐pogana eai esa eamuyamuina se uri, ribana ede: “Babulonia saesaena, enoenobiri sisinedi sinadi ede, eo tanoubu ena abi‐baaea gamagari sinadi.” Sine ta ea ita, hetabu tataodi osinadi eai i nom‐eauyaure, eo isi hinage Iesu enanayao wa ia debana eai se unuhematedi.

Sine ea iita ea no’o to ea no’o matemate.
Na aneru wa i ribalaoma arigu eai i ene, “Paana saha ue no’o? Sine ta heaheasonina eamuyamuina hage ea heribam, eo suisui i gerugerui ta aniona, iaede ma‐uruuruna haligigi‐labui eo donana saudoudoi. Suisui ue ita wa nabada miana, wau‐ta nige’e, abotai abo duha lohalohana i dobi nige sigana wa boeana eai i dalasaema abo i lau baaea nige nosina wa arinai. Isi tanoubu eai ta se miamia, isi wa esadi nige se urinonohaidio mauri bukana eai tanoubu ena abatubu eai, isi abo se no’o ariri paana suisui wa abo se ita, paana beabeana eai miana, wau‐ta nige’e, abotai i uioma. Tau sonoga iabom abo i italobai, heaheasonina ede: uruuruna haligigi‐labui isi ede oea‐tupidi haligigi‐labui potadi eai sine wa i babawa; 10 hinage isi ede wasawasa haligigi‐labui, haligigi se gurio, esau ena huia ina, esau sorana, abo i laoma, abo ena huia begana mo i abi. 11 Na suisui wa, beabeana miana wau‐ta nige’e, ia i patulau taudi haligigi‐labui adi sagu esau, ia doha hehaligigi‐haionana ede, eo abo i lage baaea nige nosina arinai. 12 Dona saudoudoi ue ita wa, isi ede wasawasa saudoudoi, sora nige edi basileia se abi, se hetorodi tanuaga eo wasawasa, suisui wa maenayao, edi mahana esega sorasorana eai. 13 Isi nuadi esega edi gigibori eo edi awa‐tanuaga se mosegabaei suisui wa arinai. 14 Mamoe abo se ialai, na Mamoe abo i saepoidi, paana ia guiau edi Guiau, eo wasawasa edi wasawasa, isi maenayao wa hinage abo se baguna, paana se eogaidi ede, se abi‐hileidi, isi tau‐torotahitahi.”

15 I ribalaoma arigu eai i ene, “Goila u itadi wa, sine laulau baaeana i babawa‐tawaidi wa, isi ede tatao moutuadi, peledi lailaidi, hari basileia eo hari arina. 16 Na donadi saudoudoi u itadi wa, eo suisui wa, isi abotai abo se sinibui sine laulau baaeana wa abo se hewaiunuei; ena gogo abo se girihai, ana lulu se abihaidi, bulumana se ai, eo oeagi alaalasi eai ia abo se gabu‐healahoho. 17 Paana Eaubada nuadi i dudududuidi bena ia ena nuatu se ginauri arinai nuadi se heoiesega eo edi basileia se mosedi suisui arinai i lau e Eaubada ena riba se hemamohoiedi. 18 Na sine ue ita wa, ia ede eanua saesaena wa, tanoubu wasawasadi wa tau‐tanutanuagaedi.”

Copyright information for `SWP