Revelation of John 19

Hetabu tataodi se hedebasaedio, edi aihelahui eo edi tepo saesaena.

Teina murina eai abo doha moutuana lailai‐aririna arinana ea ataiei, galewa eai, i ene,

“Haleluia! Abihemauri eo namanamari eo gigibori, isi ede eda Eaubada enana,
ia ena hekiraino mamohoina ede, eo se dudurai; sine laulau baaea saesaena wa i hekirainoyao, ia tanoubu i heposa wa, ena enoenobiri eai, Eaubada ena heaheari tataodi osinadi gumna ie abi, sine ta arinai.” Abo se eogauio,

“Haleluia! Ia asuna wa i iniinisae, i lau e nige nosina.”
Eo babadayao tau‐esega‐i‐mate‐hasi wa, eo ginauri maumauridi hasi wa, se gurisalaoba, Eaubada ia terona eai i babawa wa se aihelahui, si ene, “Amen. Haleluia!” Terona eai arina esau i laoma, i ene, “Hedebasae au mosei eda Eaubada arinai, omi ena heaheari tataomiu gamagarimiu, omi ia taumatausiena, gagirimiu eo lailaimiu.”

Abotai ea ataiei, daguguna doha moutuana lailai arinadi, doha goila gamagamagari arinadi, doha palepalele lailai dagugudi, si ene,

“Haleluia! Paana Guiau eda Eaubada Gigigibori‐aririna ia tanuaga eai i laulau.
Ta kode, nuada se lolo ariariri, ia ta hedebasaei ta henamanamari,
Mamoe ena tawasora ede i lageo,
monena i abinonohauioiyao;
sine ta ena dobila se mosei, ia bena linen lolodumadumana i lui, namanamarina, aa’aana.”
 Linen lolololona ta ede hetabu tataodi edi laulau duduraidi.

Abo aneru i heribagu i ene, “Teina u uri: Nuadi abo se woiwoina, isi wa se eogaidi Mamoe ena tawasora mataasina eai.” I ribalaoma hinage i ene, “Teina Eaubada ena riba mamohoina ede.” 10 Abotai ea gurisalaoba ia aena paana eai, bena ea aihelahui, na i ribalaoma i ene, “Besi, tabu u abi doha ina! Eau helem tauheaheari esau, eau maem ta, eo em tataoyao maediyao gonogonoada, isi Iesu ribaribahemasarahana tausogohina. Eaubada iabom mo u aihelahui.” Paana Iesu ribahemasarahana iaede peroveta earuana ede.

11 Abo galewa ea ita i taigari, to ne hosi posiposina i taumasaraha! Taugeruina esana ede Nuapaipai eo Mamohoina, nuatu duduraina eai i hekihekiraino, eo iala i hetubu. 12 Matana doha oeagi ala‐balebalelemna, uruna eai korona gamagamagari ie oudi; esana se uriyao nige esau abina ie ata, ia iabom mo. 13 Ana lulu ie lui hede osina eai se hedao, eo esana se ribaei, Eaubada ena Riba. 14 Iala bodadi galewa eai ia se hemuriwatai, hosi posiposidi eai se geru, lulu linen lolololodi se luidi, posiposidi, aa’aadi. 15 Ia awana eai elepa matamatana ie tata, arinai basileia abo i unuidi, tue poasi eai abo i tanuagaedi; Eaubada Gigigibori‐aririna ouyalayalana didigana eai vine aba‐utuhemahemalamina eai abo i utugodagodai. 16 Ana lulu eai eo danana eai esa ta se uri; WASAWASA EDI WASAWASA, GUIAU EDI GUIAU.

17 Abo aneru esau ea iita, mahana eai i totoro, arina lailaina eai i eogayoga, manu gamagaridi galewa duaduarina eai se loiloiusi, aridi eai i ene, “Au laoma au oigogoimiu, Eaubada ena mataasi saesaena eai, 18 wasawasa bulumadi abo au aidi, eo tauiala kapenadi bulumadi au aidi, eo tatao adiadidiri bulumadi, eo hosi bulumadi, ma‐adi gerugeru, eo tatao se gamagari ariri bulumadi, iaiyairihaidi eo ma‐auaudi, gagiridi eo lailaidi.” 19 Na suisui wa ea ita, eo tanoubu ta wasawasadi, eo edi iala bodadi, se tupagogoma bena se iala, hosi taugeruina wa eo ena iala bodadi bena se ialaidi. 20 Na suisui wa se toai, maena peroveta borabora, ia matana eai wa nabunabutua i ginaginauridi arinai tatao i boraidi to suisui heiheinoina deba‐pogadi eai se abi wa, eo ana oitau se tabaohuei. Isi taudi labui ma‐maumauridi se gabadobedi gabogabo alaalasina eai wa, i alaala i lau e nige nosina. 21 Adi sasaguyao hagahagana hinage se unuidi, ia hosi eai ie geru wa elepa awana eai ie tata wa, arinai se unuidi; manu gamagaridi wa abo bulumadi se ai e bogadi se sese.

Copyright information for `SWP