Exodus 15

Mosiva Kotira autu tuahereharo ihi tura

Vi entara Mosiva Isareri hampata ihi tiharo Nora Kotirara mintima tiro:

  • Noravano Kotiva tinavu navutaaka kempukaiqama kero naatara kairara ti, te vira autu tuahera keha virara ihi tirerave. Kotiva vika ohivata ohi tauvaqaqaa variakavata namariqi vara aqu kairave.
  • Noravano Kotiva ti kempukaiqama timitaimantara ti te ihi ti vauro.
  • Vivama ti ruaruama timitaivo.
  • Vivama ti Variqavano vaimanta te vira autu tuahera karerave.
  • Viva ti qora Variqavano vaimanta te viva Noravano vainarara ihi tirerave.
  • Noravano Kotiva iqoka raqi vaiva taruvama vaivo.
  • Vira autuvano vaireva Noravano Kotivave.
  • Viva Isipi iqoka vaiintinavuvata vika iqokakaarinavuvata namariqi vara aqu kairave.
  • Isipi vika iqoka vaiinti tarukavata Naare Namariqi aquvi qutu vuarave.
  • Varuva namari noravano vika ravaaqavu kairave. Orivano namariqi otinintemake, vikavata otinuarave.
  • Noravauvo, ai kauqu tanara nai mpeqa kauquma vaivo.
  • Noravauvo, are viraqohaira nena navutaaka rukavu raakavumake varianarave.
  • Are Noravano mpeqaiqama kehara nina arireka iaka vara vataini aquke varianarave.
  • Ihavano ahaka tatoqa kaintema kero, ai arara ite vaiva vika tatoqa aqu kairave.
  • Are nena aiho vuaqa kaararo nora namarivano hini hini vaavi araviro vairave.
  • Vaantaavuravano vaavi vaintema kero, namarivano vaavi vairave.
  • Nora namari veva muntukaraqi vai vatava aaharaiqama viro kempukaiqama viro vairave.
  • Tinavu navutaaka tiha, Kaiqe tenavu vika avataqi vi, vika ravaaqavu kaare. Tenavu vika airaira raqiake vare, tentanavu antuqaqaa vi haikara rairake vararerave. Tenavu tentanavu iqoka paipeqohai vika vehi autu taiqa karerave, tiarave.
10 
  • Minti tiavaravata, are nena aiho vuaqa kaararo namarivano Isipi vika raqutu kairave.
  • Maara ntai oriva namariqi otinintemake, vikavata nora namariqi otinuarave.
11 
  • Noravauvo, ta variqavave ari voqaara kempukavano vaivo?
  • Areqaima kempukavano variaro.
  • Areqaima Noravano variaro.
  • Ai koqe okaravano uri aatarakero vaivo.
  • Are nora kaiqa, aahuva kaiqa vare variaramanta vaiinti nahenti ai kaiqa taveha qete variarave.
  • Kia vovano ai kaiqa voqaantemake varaariravama vaivo.
12 
  • Are nena kauqu tanara tutu kaararo vatavano ai navutaaka nampiqama kairave.
13 
  • Are tinavu aaqurihama timitehara tinavu kuvantu timitera tinavu tivita varera anianarave.
  • Are nena kempukaqohaira tinavu tivita varera, nena takuqukera vainanaini tinavu vuru kenarave.
14 
  • Naantiara vo vatanaa vo vatanaaka ai nora kaiqara iriha ai aatu qeteha aiqu kauqu ntiri ntiri iha vaivarave. Piristia vatanaaka voqamake naatu ite vairamanta vaivarave.
15 
  • Idomu avuhainaaka, vikavata naatu ite vairamanta vaivarave.
  • Moapi vatanaaka vika qiata vaiintinavuvata qeteha aiqu kauqu ntiri ntiri iha vaivarave.
  • Kenaani vatanaaka kia iqoka raquataa iramanta qaqira keha vaivarave.
16 
  • Ekaa vika ai okara taveha voqamake qeteha vaivarave.
  • Noravauvo, vika ai mpeqa okara taveha voqamake qete vaiha qaqi himpite vaiqe tenavu ai vaiinti nahenti vika vara mini ke, qaqi vitare virerave.
  • Tenavu are kuvantu timiterauka, vika vara mini ke qaqi vitare virerave.
17 
  • Naantiara are tinavu tivita varera nena aiqinaqaa vuru kenarave.
  • Noravauvo, vi aiqinarara are tihara, Te maini vairerave, tiananaini,
  • are nena kauquqohaira aututaanara turuaraini tenavu vairerave.
18 
  • Noravauvo, are avuhainaava vaihara ekaa entama raqikiqira vinarave, tiro.
  • Minti tivakero Mosiva Isareri hampata ihi tura.

Miriaamiva ihi tura

19 Isareri vika nora namari taqa vare aahara vatavaura vumanta Isipi vika iqokakaarivata ohivata ohiqaa raqikukavata mintiare tuvaro Noravano Kotiva qaiqaa namari vira varakovaro namarivano vika raqutu komanta qutu vura.

20 Mintuvaro Miriaamiva paropeti nahenti Eronira nakaava nai kauquqitamparini tuatero rintatimaqiro viharo ihi ntavaqiro vumanta ekaa nahentivata vira avataqi viha nái kauquqitamparini tuataqi viha ihi nte vauvaro 21 Miriaamiva vikara ihi maantimakero tiro:

  • Noravano Kotiva tinavu navutaaka naatara kairara ti, te vira autu tuaherakeha ihi tiva amite vauro.
  • Viva vika ohivata ohi tauvaqaqaa variakavata nora namariqi vara aqu kairave, tiro.
Miriaamiva minti tivakeharo nai kena nahenti hampata vaiharo ihi tura.

Hunkavu namarira

22 Vika mintuvaro viraqaahairo Mosiva Isareri vika ntita varero Naare Namari mini kero taaramo enta Suri Aahara vataini viharo tavovaro kia vika ne namariva vaura.

23 Kia vauvaro Mosiva vika ntita vareroMarainive – Hunkavinainive tunaini oruntora. Vika mini vau namarira naare tuvaro namarivano voqama kero hunka vumantara ti, vika vi namarira kia ho nora. Vi namariva hunkavi namariva vaurara ti, mini autu nteha Hunkavinainive tura.

24 Namarivano hunkavura kaara vaiinti nahenti Mosirara nuntu nauntu tiha, Oho, tenavu nana namarie ho nararave, tuvaro 25 Mosiva mpo ike tiharo Nora Kotira aarovaro Noravano Kotiva katari hanka vo vira umiqovaro Mosiva katari vira varero muntu namariqi aqu kovaro viraqaahairo namarivano koqema viro ho neva vaura.

Isareri vika mini vauvaro Noravano Kotiva vikara nai uva maara iriha variqi vuate tiro, uva tiva nimiro, vika virara kempukaiqamake iriraravata avateharo vikara mintima tiro:
26 Te Noravano Kotika variari ne ti uva iriqi viha avuqavu kaiqa varaqi vivera, te niarao ti, Isipiqaa aihavira haika vataavaunara, vira kia niqaavata vatarerave. Te Noravano Kotika ne aihavira haika vare variaraqihai ni koqema nimite vauraukama vauro, tura.

Ho Isareri vika aaraini vivi, Elimi vataini oruntora. Mini ruvu namari 12navu vauvarodeti katari vira tava ho neva 70navu vaumanta vika náiseri naavu maaqa namari vira tataaqa kaqate vaura.

27 

Noravano Kotiva aahuva kara vika nimura

Copyright information for `TBG