Genesis 23

Seraava qutu vura

Seraava airi ihi 127 ihi varakero Hebaroni vatuka Kenaani vataini vaiharo qutu vuvaro Eparahaamiva oru viva qutu vunaini vaiharo virara iqi rata amitora.

Eparahaamiva nai naata vaata qaqi mini kero oru Hiti vatanaakara tiharo, Te vo vatanaa vaiintivano maa vataraqaa ni hampata ani vauro. Ne vata vo ti timiqe te ni koqaa nimi, vi vataraqaa te tenta naata vuru quntama taare, tiro.

Eparahaamiva minti tumanta Hiti vatanaaka vira nai tiva ami tiha, Nora vaiintio, are tinavu hampata vaihara kempuka vaiinti noravano varianarave. Tenavu tentanavu vaiinti nahenti qutuaka qunte vaunara koqeraqi are homa nena naata viraqi quntama tenarave. Kiama tinavuqihairo vovano aqao tianarove. Tenavu ekaa hoveqaima tirarave, ti.

Vika minti tuvaro Eparahaamiva himpiro nai qiata vataini kero Hiti vatanaakara koqema iavo tivakero tiharo, Ne tiriara homa nena naata maa vataraqaa quntenarave tiavera te tiari iriate. Sohaara maaqu Efaroniva vata vo vataivaro vira auvahini ori onavu vo vira autu Makapera ori onavuve tia vatava vaivo. Ne tiriara irihama ne hoe Efaronira iraivaro viva vi vatara ti timiraqe te tenta navunaaka qutivaqe viraqi quntaare? Te vi vatara koqaa nora monu Efaronira amirerave, tiro.

10 Eparahaamiva minti tuvaro Hiti vatanaa vaiinti Efaroniva nai navunaaka hampata vatuka qentiana oquvi vaumanta vira navunaaka vira aaqanto vaiha vira uva iri vauvaro viva Eparahaamirara tiharo, 11 Nora vaiintio, kiama vi vatarara koqaa timinarave. Vi vataravata vi vataraqi vai onavuravata te ai qaqi amirerave. Te tenta navunaaka nivuqaa vaihama vi vatara ai amuro. Homa nena naata viraqi quntenarave, tiro.

12 Efaroniva minti tuvaro Eparahaamiva qaiqaa nai qiata vataini kero 13 ekaa vaiinti nahenti ruvaaquma vuka vira uva iriate tiro viva Efaronirara tiharo, Ho ti uva iri vairaqe tiare. Te vata koqaa ai amiarirara are varairaqe te tenta naata vare vuru viraqi quntaare, tiro.

14 Minti tuvaro Efaroniva Eparahaamirara tiharo, 15 Ho kaiqe te ai tiva amiare. Vi vatara koqaa vaireva, 400silvaamonuma vaivo. Arevata tevata vi koqaarara kia nora koqaave tirarave. Homa vi vatara varera nena naata viraqi quntaane, tiro.

16 Efaroniva minti tuvaro Eparahaamiva hove tivakero visilvaa monusikeriqaa hirikero avuqavu rairakero Efaroniva kaamato koqaara vaiinti nahenti nivuqaa vaiharo vi koqaara Efaronira amura.

17 Mintima kero Eparahaamiva Efaronira vata Makapera vata varora. Vi vatava Mamarera Oqiva vaura vutu mantaraini vaura. Vatave ori onavuve vi vataraqaa vau katarirave Eparahaamiva varomanta 18 vi entaraqaa Hiti vatanaaka ruvaaqumavi vaiha vi vatarara Eparahaamira vatave tura.

19 Eparahaamiva vi vatara varero viraqaahairo nai naata Seraara vaata varero vuru Makapera onavuqira Kenaani vataini quntama tora.

20 Mintimake Hiti vatanaaka vatavata onavuvata Eparahaamira amuvaro viva viraqi nai naata quntama tora.

Copyright information for `TBG