Genesis 49

Iekopiva minti tivakero ekaa nai maaqunavu naarama kero tiharo, Ne maini ani ruvaaquma vi vaiqe te naantiara niqaa qovaraiqiaina haikarara ni tiva nimiare.

  • Ne ti Iekopira maaqunavu ruvaaqumavi vaiha te tiaina uvara iriate. Te ni qoka Isarerika tiaina uvara iriate.
Rubenio, arema te hoqare vatatauravave.

  • Te qaraaka vaiinti variavauna entara ai vatatehama te ho vainti vataariraukave tiavaunarave.
  • Arema avuni vatataurava vaiharama are nora vaiinti variararo ai kempukavata uritarakero vaivo.
  • Are vaireva, huvura namarivano ekaa haika raaqu varaintema kera varianarave.
  • Are hoqarenaa vaintivano vaiharavata, vo okara autuanara kaara are tuvitarairaro ai qata vovano ai vatuka varaanarove.
  • Are ti nena qoka naata vontira nuvakera ti nena qoka vaitauna taintara qoraiqama kaanarave, tiro. (35:22)
  • Minti tivakero Simionika Rivaikara tiharo, Vitanta qata vakaatantama variavo.
  • Vitanta nai auvihehavaaqohai airi vaiinti arukaatantama variavo. (34:25-26)
  • Vitanta kukeqavi vaiha uva tivaterara kia te quaheha vairarave.
  • Vitanta ruvaaqumavi vaiinti aruke uvarara tiqe kia te vitanta hampata vairerave.
  • Vitanta arara itomanta vaiinti arukorave.
  • Purumakau qora vika kia ho qaiqaa nuate ti, vitanta vika aiqu aururu teqa korave.
  • Oho, kairaro vitanta voqama kero arara itora kaara Kotiva vitanta qoraiqama nimitaarire.
  • Naantiara te vitanta kuvuarama teka raumpirima kaari vika Isareri vataini vona vona hampiara voqaara vaivarave, tiro.
Iekopiva minti tivakero viva Iutaarara tiharo,

  • Iutaao, ai qata vakaukavara ai autuma tuahera kevarave.
  • Are nena navutaaka naatarama kenarave. Ai qora maaqunavu ravenkavi ai quahama amitevarave.
  • Are qaraakaraionivano aantau arukero nama kero anirantero nai vauraqi aiqu kauqu tututero vaitaira voqaarama variaro. Ti haruantorave tiro, kia vaiinti vovano vira vauraqama kairave.
10 
  • Iutaara ankuvano avuhainaa kauru totaqi vi vaivaro naantiara kauru qova tanava qovaraiqianarove.
  • Vi vaiintiva Iutaara ankuqihairo qovarama viramanta ekaa naato vatanaaka vira uva iriqi vivarave.
11 
  • ˻Iutaara vaintivara airiuaini naaho vateva variainarara tiro˼, viva nai donkiuaini naaqunta viraqaa kantaruma taanarove.
  • Naareuaini tava tatike vate tanuraqi viva nai utavaaqa hiqaanarove.
12 
  • Vira avuvano vankorauaini voqaara vairaro, vira aaraivano naama hantaiqira voqaarama varianarove, tiro.
13 Iekopiva minti tivakero Sebulunirara tiharo,

  • Sebuluniva nora namari auvahianta vairamanta vosipi vosipi viva vainanaini otu koqemake vaivarave.
  • Sebulunira vatavano viviro, Saidoni vatuka aumanto vuru taiqaanarove, tiro.
14 Minti tivakero viva Isakaarara tiharo,

  • Kempuka donkivano airaira ntuvataa utatanta avutana vaite vaira voqaara Isakaava vairave.
15 
  • Viva tavairaro aana varaaina vatukava koqe iro vairaro koqe vatavanovata mini vairaro viva qumina kaiqa vaiintivano vaiharo vukaari utiharo vo vaiinti kaiqa vara nimitaanarove, tiro.
16 Minti tivakero viva Daanirara tiharo,

  • Isareri hini anku vaintema kero, Daaniva nai navunaaka uva avuqavuqama nimitaanarove. (30:6)
17 
  • Daanivaquqahivano/quaihavano aara auvahini vaintema kero varianarove.
  • Ohivano anivaroquqahivano/quaihavano vira aiqu nkaqa kaivaro ravuku vivaro vira tauvaqaqaa vaiva tauvaqaihairo umpaihavu virave.Quqahivano/Quaihavano nkaqa kaintemakero, viva ˻nai navutaaka ntaihaanarove˼, tiro.
18 Minti tivakero viva tiharo, Noravauvo, te are tinavu ruaruama timitena entara vekama vauro, tivakero 19 Gaatirara tiharo,

  • Gaativa vairamanta muara vaiintinavu vira arireka anivaro viva tuqantaaviro vika nái ntaihamaqiro vuanarove, tiro.
20 Iekopiva minti tivakero Aserara tiharo,

  • Aseva koqe vataqaa vairaro vi vataraqaahairo koqe karavano qampiqaanarove.
  • Avuhainaa vaiinti ne karava vira vataqaahairo qampiqaanarove, tiro.
21 Viva Napataarirara tiharo,

  • Napataarivadiaavano nai vuataa ivaro kantaintema kero viva kantama vuanarove.Diaa naati koqera voqaantemake vira vaintivara vaivarave, tiro.
22 Iekopiva minti tivakero Iohepirara tiharo,

  • Iohepiva naaquntavano airi tava irataira voqaara vairave.
  • Vi naaquntava ruvu namari tataaqa vaivaro vira kaqivano hohaa vaura oru vi vairave.
23 
  • Iohepira navutaaka huru veva vare vira qoraiqama amitareka vira aruqi vuvarovata,
24 Iohepiva kempukaiqama kero nai huru tuatovaro vira kauquvano kia popohovaro vaurave. Ti Iekopika Variqavano Iohepira kauqu kempukaiqama amitorave. Tinavu Isareriqaa Raqiki Vaiva Mpeqavano Iohepira kauqu kempukaiqama amitorave. 25 
  • Ti ai qoka Variqavano ariqaa raqiki vairave.
  • Kotiva ekaa kempuka vataava ai koqema amite vairara tiro, aaqu nti vaivaro vataqihairo koqe ruvu namari nte vairave.
  • Kotiva ai koqema amitaira ai vaintivarave, ai purumakauve airi variate.
26 
  • Kotiva ai koqema amitairaro are kara vara ututerava koqema kero qampiqaarire.
  • Aiqinavano airi ihi varaintema kero, Kotiva ai koqema amitaarirava airi entama variarire.
  • Iohepiva nai qata vakaukavaraqihairo nora vaiintivano vairara tiro, te koqema amitaaina uvava, ekaa vi uvava Iohepira qiataqaa variarire, tiro.
27 Iekopiva minti tivakero Benaminirara tiharo,

  • Qaakau vairivano karara voqama kero antuqa arivaro nintema kero, Benaminiva ni vairave.
  • Viva toqaqivata erainainivata aantau aruke ne vairave, tiro.
28 Isareri anku 12navu vairara tiro, Iekopiva minti minti tivakeharo nai maaqu vinavuka vohaiqa vohaiqa uva tiva nimiharo koqema nimitora.

Iekopiva qutu vura

29 Iekopiva minti tivakero viva nai maaqunavuara qaiqaa tiharo, Te inaaraiqa varike qutu vi, tenta kaivaqaukavara hampata vairerave. Te qutu vuari ne ti vaata vare vuru ti kaivaqauka quntama to onavuraqi tivata quntama taate. Vi onavuva Hitihainaa vaiinti Efaronira vataini vairave. 30 Haaru Eparahaamiva nai naata quntareva iharo Efaronira koqaa amiharo vi onavura varorave. Vi onavuva Kenaani vataini Mamarera Oqiva vainaini vaivaro vira tataaqa Makapera vatavano mini vairave.

31 Eparahaamiravata vira naata Seraaravata viraqi quntama torave. Aisaakiravata vira naata Rebekaaravata viraqi quntama torave. Te tenta naata Riaaravata viraqi quntama taunarave. 32 Eparahaamiva Hiti vatanaaka monu nimiharo onavu viravata, vatavata varorave. Ho minima tivata quntama taate, tiro.

33 Ho Iekopiva ekaa vi uvara nai maaqunavu tiva nimi taiqa kero, viraqaahairo viva nai taintaqaa vuru vaiteharo qutu vura.

Copyright information for `TBG