Judges 15

Ho naantiara vo entauititeqe vau entara Samsoniva qaraaka memeraa vo varero nai naata tavareva ˻Timnaini˼ vura.

Viva mini otuntero nahenti vaurumuraqi virare tuvaro nahenti vira qova qioqama kero
tiharo, Te ariara vira antuqavano kia virara vaivo tivake, vira vo vaiintima amuro. Ho vira aura vo voqavata koqe viri vaata vataavama vaivo. Are homa vira varenarave, tiro.

Minti tuvaro Samsoniva tiharo, Oho, te ni Pirisia qoraiqama nimitaarirava ho vaimantara ti, te ni qoraiqama nimitarerave, tiro.

Minti tivakero viva vevantero oru 300 qaakau vairi ravaaqavukero, vika taaraqanta taaraqanta veka nkuruqama tero, nkuruqama tairaqi ova umpikero hampakuma tero, vairi vika ruhaaqi komanta, vika Pirisiauiti naaho ututoraqi vi ani vaura. Mintimakero Samsoniva vikauitiiha quara tatoqakora. Ihavano qaqi vauuitirave, teqake vatouitirave, vikauaini naahove,orivi ututorave, ekaa tatoqa kora.

Pirisia vira tave tiha, Oho, tavave mintima kaivo? tumanta vokuka tiha, Timnihainaara airaamaqu Samsonivave. Vira airaaviva vira naata vo vaiinti amirave. Vi vaiintiva Samsoniva nahenti varai entara vira tataaqa himpite vai vaiintivave, tumanta Pirisia vika oru Samsonira airaavira naavu iha umpiarate, vira raavuravata nai qokanti iha tatoqa kora.

Mintuvaro Samsoniva vikara tiharo, Oho, ne mintiara kaara te kia qaqi vairaiti, ni qoraiqama nimitaqi vivi, ni ekaa qoraiqama nimitarerave, tiro.

Minti tivakero viva vaana viriviri uvaro vika ntaihemaqiro viviro airi arikora. Vika arukero viraqaahairo viva Etaamu ori onavuqi otu vaura.

Samsoniva raqiharo Pirisia naatara kora

Ho Pirisia vika oru Iutaa vataini náiseri naavu maaqa kaqate, vi vataraqaa vi aniha oru Lehi vatuka aumanto vumanta 10 Iutaa vaiinti vikara aqao ti, Ne nantihae tinavu harireka auti variavo? tumanta vika tiha, Tenavu Samsonira rumparera anuro. Viva tinavu qoraiqama timitaintemake, tenavu naivata qoraiqama amitarerave, tura.

11 Minti tumanta Iutaa vaiinti 3,000 Samsoniva Etaamu ori onavuqi vaunaini otunte virara tiha, Oho, are kiae irianarave? Pirisia vika tinavuqaa raqiki variakama variavo. Ai okara kaara vika tinavuqaa maara voqavata vatevarave, tuvaro Samsoniva tiharo, Vika ti qoraiqama timitaamanta virara iriha te náivata qoraiqama nimitauro, tiro.

12 Minti tumanta vika tiha, Tenavu ai rumpa vare Pirisia kauquqi vuru karera tuvuraukave, tuvaro Samsoniva tiharo, Ho ne kauqu aiqiqaa aqukeha kia tenavu ai arukarerave tiate, tumanta 13 vika tiha, Kia tenavu ai arukarerave. Tenavu ai qaqi rumpa vare Pirisia kauquqi vuru karerave, ti.

Vika minti tivake qaraaka naaquntaqohai vira rumpate ori onavuqihai vita vare vura.

14 Vika vivi, Lehi vatukaini oruntomanta Pirisia vika naveraitiha kantamaqi Samsoniva ani vaunaini anuvaro Nora Kotira Maraquravano vira kempukaiqama kovaro naaqunta tatoqavira vaaka hatoka kaintema kero, Samsoniva nai kauquqaa rumpataa naaquntara hatoka aqukora.

15 Vira kauquqihairo naaqunta hiqintuvaro Samsoniva tavovaro donki maatiri vuhaari, qaraaka mini vauvaro viva vira utu varero viraqohairo vaiinti aruqiro viharo 1,000 vaiinti arukora.

16 Samsoniva ihi tiharo,

  • Te donki maatiriqohai 1,000 vaiinti arukauro.
  • Te vika aruke vika vaata voqaa voqaa ruvaaqumake vatauro, tiro.
17 Minti tivakero donki maatiri vira vataini aqukero vi vatara autu ntero tiharo,Ramaati Lehi – Maatiri Aiqinave, tura.

18 Ho Samsonira voqamakero namari naataa uvaro Nora Kotira aarero tiharo, Mpo, are ti nena kaiqa vaiinti kempukaiqama kaaramanta te iqoka aatara kauro. Hauri ti namari naataa iraqe qutu vuari kia nái vaata toqakaaka ti vaata varevorave, tiro.

19 Minti tuvaro Kotiva Lehini vata tomavira nkahikovaro viraqihairo namarivano nte vaura. Samsoniva vi namarira novaro vira aunta paru uvaro vira kempuka qaiqaa ho vaura.

20 Vika ruvu namari vira autu ntehaEn Hakore – Aarovaro Qovaraiqu Namarirave tura.

Copyright information for `TBG