Numbers 13

Kenaani vata oru ampeqamake tavora

Noravano Kotiva Mosira tiva amiro tiharo, Te Kenaani vata vira ni Isareri nimirerave tunarara iriharama, are vaiinti vonavu nititaira vika oru vi vataraqaa vi aniha ampeqamake tavaate. Are 12 ankunavuqihaira qiata vaiinti vohaiqa vohaiqa kaama tera nititaane, tiro.

Kotiva minti tuvaro Mosiva qumina vataini Paraanini vaiharo Noravano tunte iro qiata vaiinti vika nititomanta mini vura. Qiata vaiinti vika nutu maantimama vairo:

  • Rubenira ankuqihainaava Sakura maaqu Samuaava,
  • Simionira ankuqihainaava Horira maaqu Sapaativa,
  • Iutaara ankuqihainaava Jefunera maaqu Kalepiva,
  • Isakaara ankuqihainaava Iohepira maaqu Igaliva,
  • Efaraimura ankuqihainaava Nunira maaqu Hoseaava,
  • Benaminira ankuqihainaava Rapura maaqu Palitiva,
10 
  • Sebulunira ankuqihainaava Sodira maaqu Gadieriva,
11 
  • Manasera ankuqihainaava Susira maaqu Gadiva,
12 
  • Daanira ankuqihainaava Gemalira maaqu Amieliva,
13 
  • Asera ankuqihainaava Maikerira maaqu Seturiva,
14 
  • Napataarira ankuqihainaava Vopisira maaqu Nabaava,
15 
  • Gaatira ankuqihainaava Makira maaqu Gueriva,
Vika vika nutu mintima vaura.

16 Mosiva qiata vaiinti vinavuka nititomanta vinavuka Kenaanini vi aniha ampeqama keha tavora. Mosiva Nunira maaqu Hoseaara vo autuvata ntava tero virara Iosuaarave tura.

17 Mosiva vinavuka nititareva iharo mintima tiro: Ne Nekevi vata vara maini kema veranto vuate.

18 Ne mini niha koqemake aitutumaqi vuate. Veranto vai vatava vaireva, nana vatae vaivo? Vi vatanaaka kempuka vatanaakae, uqerara vatanaakae variavo? Vika airie variavo, kiae airi variavo?

19 Vika vatavano koqe vatae vaivo, qora vatae vaivo? Vi vatanaaka qumina vatukanavuqie variavo, vaantaavura aututaa vatukanavuraqie variavo?

20 Vi vataraqi kara koqema keroe qampiqe vaivo, kiae koqema kero qampiqe vaivo? Nantavatae vaivo, kiae nantavata vaivo? Vi haikara vi haikara rantakeha tavaate. Nenavu kia qetaraiti, vi vataraqaahainaa katari tava vokira hiqi vare maini aniqe tenavuvata tavaare, tiro.Uaini tava hoqare mpeqaiqi entara Mosiva vi uvara minti tiva kero vinavuka tiva nimura.

21 Mosiva vinavuka nititomanta vinavuka hoqaramake Seni qumina kanta ampeqama keha tavamaqi vivi, vo vatuka Rehoni aumanto oru ntora. Rehoniqaahairo aara vovano Hamaati vatukaini oruntora.

22 Viraqaahai vinavuka vata vo Nekevive tunaini orunte, vihai vatuka vo, Hebaronini vura. Vinavuka mini orunte tavomanta Anaaki vatanaaka vaintivara mini vaura. Haaru Anaaki vatanaaka vukai vuhaari vatauka vaumanta vika naintivara Ahimaanura ankuvata, Sesaira ankuvata, Tarimaira ankuvata, Hebaronini vaura. (Vi vatanaaka naane Hebaroni vatuka autu kovaro ihi 7navu aitaromanta Isipi vatanaaka Soani vatuka autu kora.)

23 Ho Mosiva nititoka vivi, Esikoli uqita kanta orunte, mini vaihauaini naaquntaqaahairo airi tava irato kaarara vohaiqa teqa kora. Vi kaararaqaa airi tava vohaaraqi iratovaro voqama kero maara ntovarora tiro, vohaa vaiintivano kia ho varaarirava vaumanta taaraqantavano vira rumpake aqu vare vura. Vinavuka mintimakeuaini tava aqu varorara ti, Isareri vi vatara autu ntehaEsikoliveKaara-vohaiqaqaa-airi-tava-iratorave, tura.

Vinavukauaini tavavata,fiki katari tavavata,pomigraneti katari tavavatamake, vare vura.

25 Mosiva nititoka vi vataraqaa 40 entanavuara rantake tavamaqi vivi taiqake, vinavuka vihai orurante Mosivavata Eronivavata ekaa Isarerivata unaini anura. Vi entara ekaa vika Kadesi qumina vataini Paraanini vaumanta vinavuka vihai orurante nái nu vakaakara vika tiva nimiha, vi katari tavara vare anuravata vika numiqora.

27 Vinavuka Mosira tiva ami tiha, Are tinavu tititehara oru vi vatara aitutumake tavaate tianara, tenavu oru tavauraro karavano koqemakero mini qampiqaaina vatavama vaivo. Ho tavaane. Tenavu vi vataraqaahainaa kara vokira vare anuro.

28 Vatavano koqe vata vaimantavata, vihainaaka kempuka vatanaaka variavaro vika vatukavano nora vatuka vaivaro vika vaantaavuravata kempuka vaantaavurama vaivo. Ike, tenavu tavauramanta Anaaki vatanaaka naintivara nái naaqu taatoka vuhaari voqaara vukai vuhaari vataukama mini variavo.

29 Tenavu tavauramanta hini mantaraini Nekevi vataqaa Amareki vatanaaka variamanta, hini mantaraini verara aiqina vainaini Hiti vatanaakavata, Jebusi vatanaakavata, Amo vatanaakavata, variamanta, Kenaani vatanaaka hini kiaka nora namari Meditarenia Namari auvahini variamanta hini kiakama Iotani Namari auvahini variavo, ti.

30 Minti tumanta Isareri vinavuka tu uvara iri, qeteha Mosirara nuntu nauntu ti vauvaro Mosiva nititokaqihairo vaiinti vo vira autu Kalepiva vika uva mpampaira atakero tiharo, Nana kaarae ne nuntu nauntu ti variavo? Tinavu kempuka voqavata vaikave. Vate tenavu homa vika aru naatarake vika vata varaainarave, tiro.

31 Viva minti tumanta Kalepira hampata vuka kempukaiqamake tiha, Aqao, vi vatanaaka kempuka voqavata vaimanta variarara ti, tenavu kiama ho vika hampata raqirarave, ti.

32 Vinavuka minti tivakeha kia koqe uva vi vatarara tiraiti, maa uvaravata tiha, Tenavu vi vataraqaa niha tavauraro kia koqe vata vaivaro inaara karaqai vaimanta vaiinti nahenti karara aavoqiha variavo. Tenavu tavauramanta vaiinti nahenti noraqora hauntivano mini variavo. Anaaki vatanaaka naintivara vukai vuhaari vataukama mini variavo. Tenavu vi vatanaaka tave vika nivuqaa kaintaaqa voqaara vauramanta vikavata tinavu tavaamanta tenavu kaintaaqa voqaarama vauro, ti. Vinavuka minti tuvaro vi uvava vi ani umanta ekaa Isareri vi uvara irura.

Copyright information for `TBG