Numbers 34

Mosiva qutu vura

Mosiva Moapi uqita vata kero aiqina vo, vira nora autu Nebo, vira inaara autu Pisigave tunaini, noraqaa oru vaura. Vi aiqinava kuari urinaini vauvaro Iotani Namari hini mantaraini Ieriko vatuka vaura. Mosiva aiqina viraqaa himpite vauvaro Noravano Kotiva Isareri nimirerave tu vatara ekaa vira umiqora.

Viva Gileaati vataihairo Mosira umiqaqiro viviro, Daani vatukavano vaunaini vuru taiqora.
Ekaa vo anku vo anku Napataarira vatave, Efaraimura vatave, Manasera vatave, Iutaara anku vatave, umiqaqiro viviro, Meditarenia Namari kuari avu aqu vinaini vau vataravata umiqora.

Noravano Kotiva Mosira nora vata, Iutaa uqitaini vau vatarasautini vaura umiqero, airideti katari vau vatukara Ierikovata qumiqero, viraqaahairo hinisauti mantaraini Soaa vatukavata umiqora.

Noravano Kotiva Mosira ekaa vi vatara umiqero virara tiharo, Te tenta kauqu aiqiqaa aqukeha Eparahaamirave, Aisaakirave, Iekopirave, vika naintivarave, vi vatara nimirerave tiavaunarave. Minti tunarara ti, vate te vi vatarama ai umiqauro. Te vate ai qaqi kaurara are avuqohaira vi vatara tavaaro. Ho te kia ai qaqi kaarirara are mini vinarave, tiro.

Viva minti tuvaro Mosiva Nora Kotira kaiqa vaiintivano Moapini vaiharo Noravano tiva amuntema kero, mini vaiharo qutu vura.

Viva qutu vuvaro Noravano Kotiva naivano Moapi uqitakanta Mosira quntama tora. Vira quntama tova vauvaro vatuka vo, vira autu Beti-Peo, vutuni vaura. Vate kia vo vaiintivanovata Mosira quntama to vatara kankomake iri tavaara.

Mosiva 120 ihi varakero qutu vura. Viva qutuarirava aumanto vauvaro viva kia anoma naampaiqama viraitiro vauvaro, vira kempukavano qaqi vauvaro vira avuvanovata koqe iro vaura. Mosiva qutu vumanta Isareri vika Moapi uqita kanta 30 entanavuara vaiha, Mosirara iqi rata amitaqi vura.

Isareri vika Mosirara iqi rataqi vi, vuru taiqa kovaro Iosuaava Mosira vatuka varora. Haaru Mosiva nai vatuka varaarire tiro vira noraiqama korara tiro, Kotiva Nunira maaqu Iosuaara koqe avu aato amura. Mintumanta vaiinti nahenti Iosuaara uva iriha vika Noravano Kotiva Mosira tiva amu uva maarara avataqi vura.

10 Taara vaiintitanta vohaa vaiha uva tuntema kero, Noravano Kotiva Mosikantiro uva ti vaura. Minturara tiro, vi entaraqaahairo kia paropeti vovano Mosira voqaara qovarama viva vaira. 11 Kia vokia paropetika Mosiva nora kaiqa varaintemake kaiqa varaara. Noravano Kotiva Mosira atitovaro viva aahuva vo qara vo qara u kaiqara Isipini vareharo Isipi avuhainaa vaiintivata, vira nora vaiintinavuvata, ekaa Isipi vatanaakavata qoraiqama nimitora.

12 Mosiva ekaa Isareri nivuqaa vaiharo nai nora kaiqa, aatu ite vai kaiqara autu nimitora. Vokia paropetika kia ho Mosiva kaiqa varaintemake varaara.

Copyright information for `TBG