Proverbs 9

Koqe avu aatovano aareharo tu uvara

Koqe avu aatovano nai naavu kaqa taira. Viva naavu kaqeharopohi nora, 7navu qohikero vaavi arataira. Viva mati unta kero, hiakaa i haikarauainiqi tuqantaakero, kara taintaqaa qerama kero vataira.

Viva nai kaiqa nahenti nititama kaimanta vika oru nora vatukaqi aiqinaqaa vaiha maantimake naverai tiha, Ne kia avu aato vataaka hampi kaiqara noraiqaake iri variaka, ani ti naavuqi ti kara nehama teuaini tuqantaake vataunaravata naate.

Ne nenta hampi avu aatoqaa nira qaqirake, koqe avu aatoqaa ni vai aararaqaa niha qaqi variqi vuate, tura.

Taara vaiinti okarara tura

Koqe avu aatora naaraihama amite vai vaiintira uva avuqavu qiraro viva kia ai uva iriraitiro, ariara qora uvaqaima tianaro. Are qora kaiqa vare vaina vaiintirara kia mintiataarave tiraro viva ariara vaaqu uvaqaima tianaro.

Virara irihara, koqe avu aatora naaraihama amite vaina vaiintira uva kia avuqavu qiane. Hauri are mintiraro viva ai navutaiqama amitaantora.

Ho are koqe avu aato vataarara kia mintiataarave tiraro, viva ariara quqaama tiaro tivakero, ariara antuqa ariraro varianaro.

Are koqe avu aato vataara uva maara tiva amiraro vira avu aatovano voqavatama koqe iro varianaro. Are avuqavu nina vaiintira koqe okara umiqairaro viva vi okararavata iriqiro vuanaro.

10 Ho vaiintivano koqe avu aato varareva irera, viva avuni Nora Kotira aatu naane qeteharo variarire. Kotiva takuqu kero vairara tiro, vaiintivano virara kankoma kero irirera, vira avu aatovano koqema kero varianaro.

11 Koqe avu aatovano ai koqema amitairara are maa vataraqaa airi ihima qaqi variqira vinara.

12 Ai avu aatovano koqe avu aato vairera, vi avu aatova ninama koqema amitaanaro.

Are vi okarara qoririma kehara naaraihama amitairera, vira kaara are nenama nena qoraiqama kenara.

Qora avu aatovanovata vaiinti naare vaira

13 Qora avu aatovano vaireva, nahenti vovano naverai ti vaira voqaarama vairo. Vi nahentira avu aatovano qora avu aato vaivaro viva kia koqe okara iri tave vaiva vaiharo 14 nora vatuka vuruni nai naavu qentiana taintaqaa oquviro vaiharo 15 vaiinti nahenti vitare aitare i variaka naareharo mintima tiro:

16 Ne kia avu aato vataaka, homa maini anivarave. Ne kia vo okara vo okara kankomake iri tavaaka, 17 ne kiae iriavo? Namari muara kaqake neva koqema ianarove. Kara muara varake neva hiakaama ianarove, ti vaira. (Uva tuqantaakero nahenti muara ni variarara ti vaira.)

18 Viva minti ti vaimanta vaiinti vika kia kankomake iriraiti, vira naavuqi avuni oriqetaaka, vika qutuma vuavo. Viva naaraimanta viva inaini vuaka, vika ekaa qutu vuaka varianaini otu variavo.

Copyright information for `TBG