Psalms 107

Nora Kotira okaravano koqe okaraqai vaivaro vira muntukavano tinavuara ekaa enta variqiro vuainarara ti, kaiqenavu virara koqeve tivaqi vuare.

Ekaa vaiinti nahenti Noravano Kotiva ni kuvantu nimitaika, ne ekaa Kotirara koqeve tiate.

Viva navutaaka kauquqihairo ni ruaruama nimiteharo
vo vataihairo kuari avu urinaihairove, kuari avu aqu vinaihairove,notihairove, ni ntita varairave.

Niqihai vokiaka haaru aahara vataini vi aniha, nora vatuka voqi oru variare ti, kia ho vi vatukara rantakaara.

Vika voqama kero kararavata namariaravata antuqa arimanta tiha, Mpo, tenavu qoraiqamama virarave tivake variaraqihai Nora Kotira aaraavaro viva vika qoraiqamavi variaraqihairo ruaruama nimitero

vika ntita varero avuqavu aaraqaa viviro, vo vatuka vika vaireka ia vatukaraqi vuru kaira.

Noravano Kotiva mintima keharo vika koqema nimiteharo nora kaiqa vo kaiqa vo kaiqa vara nimitairara iriha, vika Nora Kotirara koqeve tiate.

Namari naataa imanta variavaro viva vika namari nimimanta ho ne variara.

Vika karara antuqa arimanta variavaro viva vika kara nimimanta ho ne variara.

10 Niqihai vokiaka haaru Noravano Kotiva nai virini kantaaqaini vaira uva raqakeha vira uva maara kia irireka auti variara kaara, Kotiva qaqi kaimanta navutaaka vika karapuhiqiseniqohai rumpa taamanta vika voqama kero konkira ariraqi vaiha, ke ke tivaqi vi variara.

12 Kotiva qaqi kaimanta vika rumpataaka vukaari utiha navutaaka kaiqa vara nimite variavaro, vika kempukavano taiqa vimanta vataini hiqintuavaro kia vika kahaqiarirava vovanovata vaira.

13 Vika mintimake variaraqihai Nora Kotira aaraavaro viva vika qoraiqamavi variaraqihairo ruaruama nimiteharo, 14 seniqohai rumpataara ruqema kero, voqama kero konkira ariraqihairo vika ntita varaira.

15 Noravano Kotiva mintima keharo vika koqema nimiteharo nora kaiqa, vo kaiqa vo kaiqa vara nimitairara iriha, vika Nora Kotirara koqeve tiate.

16 Vivabaraasi oriqohai vaantaavura qenti aututaara ravantiaqa aqukero, qenti rutaqute variaainiravata kinta kaantama kero aquke vaivama vaivo.

17 Niqihai haaru vokiaka Kotira uva raqakaara kaara nora rovaravano vika ntaihaira.

Vika qora okara autuara kaara aihaviraara vare antura ntiha
18 kia karavata naataa imanta aumakaa qutireka auti variara.

19 Vika mintimake variaraqihai Nora Kotira aaraavaro viva vika qoraiqamavi variaraqihairo ruaruama nimitaira.

20 Viva uva tivaro vira uvavano vika vaata koqema nimitaimanta vika kia qutu viraiti, qaqi koqemake variara.

21 Noravano Kotiva mintima kero vika koqema nimiteharo nora kaiqa vo kaiqa vo kaiqa vara nimitairara iriha, vika Nora Kotirara koqeve tiate.

22 Kaira vika Kotirara koqeve tiofaara autu amiteha, quaheha ihi tivaqi viha, viva nora kaiqa, vo kaiqa vo kaiqa vika vara nimitairara, vaiinti nahenti tiva nimiate.

23 Niqihai vokiakasipiqi nora namariqaa vo vataini vo vataini vi aniha, monu kaiqa vareha airaira vuru keha vaiinti nahenti nimi variara.

24 Vikasipiqi nora namariqaa vi aniha, Noravano Kotiva vo kaiqa vo kaiqa, kempuka kaiqa vare vaira tavaara.

25 Vika tavaavaro Noravano tivaro aaronaavano qovarama viro nora namari vira venta venta i vaivaro namarivano voqama kero kumpetaqiro viharo 26 sipi muntuvi aquke vuruvi aqukero i vaivarosipivano otunte uruntemaqiro vi vaira.

Minti vaimantasipiqi kaiqa varaaka, Mpo, tenavu raqutu vuarorave tivakeha, voqamake qete variara.

27 Iha namari naaka vueraiqiantemake, vika taventu vauntumaqi niha, Mpo, tenavu nana haika autukee kahaqira haika varaainarave? ti variara. 28 Vika mintimake variaraqihai Nora Kotira aaraavaro viva vika qoraiqamavi variaraqihairo ruaruama nimitaira.

29 Viva tivaro aaronaa utiva taiqa vivaro namarivanovata kia kumpetaraitiro, tiremakero vaira.

30 Nora namarivano tirema kero vaimanta vika vira tave, quahake variavaro viva vika ntita varero vika nái vireka ianaini koqema kero vuru kaira.

31 Noravano Kotiva mintima kero vika koqema nimiteharo nora kaiqa, vo kaiqa vo kaiqa vara nimitairara iriha, vika Nora Kotirara koqeve tiate.

32 Vika Kotira vaiinti nahenti hampata ruvaaqumavi vaiha, vira nora autuara tiva qoqaiqama kaate.

Vika qiata vaiinti nivutana ruvaaqumavi vaiha, vira autu tuahera kaate.

33 Vaiinti nahenti qora kaiqa vare variara kaara Noravano tivaro taatika namarivanove, inaara namarivanove, aaharaiqama vivaro aruvu namarivanovata taiqa vivaro vatavano aaharaiqama viro vaira.

Karavano koqema keharo qampiqe vai vatara viva qoraiqama kaivaro vi vataraqi kia karavano qaiqaavata qampiqaira.

35 Ho Noravano qaiqaa tivaro aahara vataqaa namarivano voqi voqi tuvi vaira.

36 Namarivano koqema kero tuvi vaivaro, viva karara aavoqiaka ntita varero vuru mini kaimanta vika mini vatuka autuke variara.

37 Vika mini vaiha naahoqi karavatauaini naaquntavata utukeha, koqemake varakeha ne variara.

38 Noravano nai vaiinti nahenti koqema nimitaimanta vika airi vainti vatake vataavaro viva vika purumakauvata airiqama kaimanta variara.

39 Navutaaka vika hampata raqiha vika naatarake kaurira haika nimiha nora maara vikaqaa vataamanta qoraiqamavi varia entara, 40 Noravano Kotiva vika navutaaka nora autu vataakara kia noraiqaakero iriraitiro, viva vika autu vatainiqama kero nititama kaimanta vika aahara vataini kia aaravata vainaini hampi vi ani variara. (ves 39-40 Hiparu uvavano kia kankomakero vaira.)

41 Vehi vaiinti nahenti vo haika vo haikara aavoqiha qoraiqamavi variaka, Noravano vika ruaruama nimiteharo koqema nimitaira. Viva vika vaintivaravata airiqama kaimanta vika airi sipisipi voqaara variara.

42 Noravano Kotiva mintima kero vehi vaiinti nahenti kahaqi vaimanta avuqavu ni variaka vira kaiqa taveha, quahe variamanta, qora okara auti variaka kia uvavata tiraiti, evaara variara.

43 Ho koqe avu aato vataaka ne koqemake te qara ntuva tauna uvara aatoqi iriteha, Nora Kotira muntukavano tinavuara vairara noraiqaake iriqi vuate.

Copyright information for `TBG