Psalms 110

Devitiva maa ihira qara ntuvatora

Noravano Kotiva ti Nora Vaiintiara tiharo, Are uritarera tinta kauqu tanaraini oquvi vairaqe te ai navutaaka aru naatara amitaarirara are vikaqaata nena aiqu ntava taane, tirave. (Mat 22:44; Maaki 12:36; Ruki 20:42-43; Kaiqa Va 2:34-35; 1 Korinti 15:25; Epa 1:20-22; Ko 3:1; Hiparu 1:13, 8:1, 10:12-13)

Noravano Kotiva ai voqavata noraiqama kairara are Saioni vatukaihaira airi vataqaa raqikiqira vihara nena navutaakaqaavata raqikinarave.

Are nena navutaaka hampata raqireva ina entara ai iqoka vaiinti iqoka raquataa iramanta raqivarave.

Toqaqi varavuvano ukau qaraakaiqama amitaintema kera, are vo enta vo enta qaraaka kempuka varenarave.

Noravano Kotiva nai kauqu aiqiqaa aqukeharo ariara mintima tivo: Merikisitekira voqaantema kera, are ekaa entama Kotira kaiqa vara amitena vaiintiva vainarave, tirave. Ho Noravano Kotiva kiama vi uvara qaqirakero vo uva tianarove. (Okara 14:18)

Noravano ai kauqu tanaraini vaiharo ai kempukaiqama amitaqiro vuanaro. Vira arara itaaina entara viva avuhainauka hampata raquqiro viharo vika kempuka taiqa kaanaro.

Naantiara viva vo vatanaa vo vatanaaka qora okara autira kaara vika qiata rukavu raakavuma kairaro vika vaatavano vata maata mpiqa viro varianaro.

Avuhainaava namarivano aara auvahini tuvinara nairaro vi namariva vira kempukaiqama kairaro viva navutaaka naataraqiro vuanaro.

Copyright information for `TBG