Psalms 114

Haaru tinavu kaivaqaukavara Isareri vika Isipi mini ke aniara. Iekopira vaintivara vo uvaqihai ti varia vatanaaka mini ke aniara.

Vi entara Noravano Kotiva Iutaa vikara tinta vaiinti nahentima variavo tivakero, Isareriara, Vika tenta kaama tauna vaiinti nahentikama variavo, tira.

˻Ho Isareri vika Isipi ke vuavaro˼ Naare Namarivano vika tavero qetakero vivaro Iotani Namarivanovata kia tuviraitiro, tuvurantero vira.

Namarivano mintivaro vo aiqina vo aiqinavano memeraavano ravukuvi ravukuvi intemake, qaki qaki i variavaro, inaara aiqinavanovata sipisipi naativano ravukuvi ravukuvi intemake, qaki qaki i variara.

Naare Namarivauvo, vi entara nana haikavano qovaraiqivarae are qetakera vuanarave?

Iotani Namarivauvo, nantivarae are kia tuviraitira, tuvurantera vuanarave?

Aiqinataario, vi entara ne nana kaarae memeraavano ravukuvi ravukuvi intemake, qaki qaki i variarave?

Ne inaara aiqinavauvo, nana kaarae sipisipi naativano ravukuvi ravukuvi intemake, qaki qaki i variarave?

Vatavauvo, vate Noravano Kotiva tuvirara are qetehara qaki qaki iane. Iekopira Variqavano tuvirara are qetehara ntiri ntiri iane.

Viva nora ori tuqantaa kaivaro orivano varuva namari kuquviro vairave.

Viva tivaro kempuka oriqihairo ruvu namarivano noraiqaakero tuvi vairarama turo.

Copyright information for `TBG