Psalms 52

Devitiva maa ihira qara ntuvatora. Soruva Devitira arukareva auti vau entara, Idomu vatanaava Doekiva Soruva unaini oruntero, vira tiva amiro tiharo, Devitiva Ahimerekira naavuqima oru vaivo, tura.

(1 Samueri 22:9)

Oho, kempuka vaiintio, nantiharae are nena qora kaiqa varaanarara viti viri vaiinti nahenti tiva nimi variaro?

Nantiharae are toqaqihaira nena mahuta tivaqira vivira, entama kaaro? Are mintiharama Kotira kaurira haikama amiaro.

Vehi autu taiqa keravaqaima ai aatoqi vaivo. Ori hakare vaihaiva teqa taaqama kaintema kero, ai una uvavano vaiinti qoraiqama nimite vaivara variaro.

Ai muntukavano kia koqe kaiqara vairaitiro, qora kaiqaraqaima vaivo.

Ai muntukavano kia quqaa uva tirara vairaitiro, una uva tiraraqai vaivo.

Una uva inaara ti variara vaiintio, nana uvarae ai antuqavano vaivo? Vaiinti qoraiqama nimitena uvararama ai antuqavano vaivo.

Ho iriane. Kotiva ai ekaara vehi autu taiqa kareva, nina naavuqihairo kempukaiqama kero rarau veva aqu kaanaro.

Katari tuqa vataakero vataqihairo ravau kaintema kero, viva maa vataraqaa qaqi variakaqihairo ai rarau aqu kaanaro.

Kotiva ai mintima kaira avuqavu ni variaka are qoraiqama vinara tave, vika vira aatu qeteha vaivara.

Vika qeteha, ai naaraihama amiteha tiha,
Huviqorave. Maa vaiintiva kia Kotirara noraiqaakero iriraitiro, nai airi airaira vataira viraraqai noraiqaakero irirave. Viva te qora kaiqa vare vaunaraqaahai koqemake variqi virerave, ti vairave. Vika ariara mintima tivarave.

Kia te ai aanantamake vauro.Orivi katarivano Kotira Naavuqi koqema kero qampiqaintemake, te koqemake variqi virera. Kotira muntukavano tiriara enena vaira, te virara ekaa enta noraiqaake iriqi virera.

Kotio, are ti kahaqama timitaanarara irihama te ariara koqeve tivaqi virerave.

Ai vaiinti nahenti ruvaaqumavi vainaini vaiha te are ti koqema timitenarara vika tiva nimiha ai autu tuahera karerave, turo.

Copyright information for `TBG