Psalms 72

Soromonuva maa ihira qara ntuvatora

Kotio, are koqe okara tinavu avuhainaa vaiinti umiqairaro viva ai aanantero vaiinti nahenti uva avuqavuqama keharo avuqavu iarire.

Are vira kahaqiraro viva are tiva taana uvara iriharo koqema kero vika uva avuqavuqama nimitaarire.

Are mintima kehara vira kahaqiraro viva avuqavuqama keharo ai vaiinti nahentiqaa raqikiharo, vika qoraiqama nimite vaika uvavata koqema kero avuqavuqama nimitaarire.

Avuhainaa vaiinti viva mintima keharo vaiinti nahentiqaa raqiki vairaro, koqe entavano vairamanta vaiinti nahenti aiqinainive, uqitainive, variaka muntuka paru i vaira koqemake variqi vuate.

Qoraiqama nimite vaika vaivaro avuhainaa vaiinti viva vika antua nimitaarire.

Vo haika vo haikara aavoqi vaiinti nahentika vaivaro viva vika vaintivaravata kahaqama nimitaarire.

Vaiinti nahenti qoraiqama nimiteha vikaqaa nora maara vate vaika, viva vi vaiintika ntaiheharo naatara kaarire.

Kuarivanove, toravanove, ekaa enta itaqiro vinantema kera, are avuhainaa vaiinti vira qaqi kairaro viva ekaa enta ai vaiinti nahenti naantiara kuvuarama teka, ekaa vikaqaavata raqikiqiro vuarire.

Koqe aaquvano naahoqive, qaqi vataqaave, ntuva kaintema kero, avuhainaa vaiinti viva vaiinti nahenti koqema nimitaarire.

Viva mintima kero vaiinti nahentiqaa raqiki vairaro avuqavu ni vai okarava koqema kero variqiro vuarire.

Toravano kia qimpa viraitiro, qaqi itaqiro vi vaintema kero, vaiinti nahenti koqe kaiqa vareraqihairo koqe haikavano qovaraiqiarire.

Avuhainaa vaiinti viva vaiinti nahentiqaa raqikiharoma, viva nora namari hini hini mantaraini variakaqaave, Iufaretisi Namari tuvinaini variakaqaave, maa vatara hini viti hini vitini variakaqaave, raqikiqiro vuarire.

Vo vatanaa vo vatanaaka aahara vataini variaka, vika vika avuhainaa vaiinti vira vevaarainima vaivarave.

Vira navutaaka vata kanta vaiha konkoma nevarave.

10 Avuhainaa vaiintinavu Speni vataini variakave, nora namari avutaqi vai vataraqaa variakave, vika vikama viratakisi vuru amivarave.

Arebia vataqaa raqiki vaivavata, Sebaa vataqaa raqiki vaivavata, vitantavata vo haika vo haika vare vuru vira amivarave.

11 Ekaa avuhainaa vaiinti vika oru vira avuqaa kankakaamavi vaivarave.

Ekaa naato vatanaaka vira kaiqa vara amitevarave.

12 Vehi vaiinti nahenti vira aare variaka, viva vika uva iriro, vika ruaruama nimitaanaro.

Vika kahaqama nimiteka kia vaimanta nora maaraqi variaka, avuhainaa vaiinti viva vikavata kahaqama nimitaanaro.

13 Vika kempukavano kia vaikave, vo haika vo haikara aavoqikave, viva vika aaqurihama nimiteharo kahaqiramanta vika kia qutu viraiti, qaqi variqi vivara.

14 Avuhainaa vaiinti viva vika qaqi variqi virara noraiqaakero iriharora tiro, viva nora maara vikaqaa vate vaika kauquqihairo qaqini vara kaanaro.

Vika ruqutiha qoraiqama nimite vaika kauquqihairo vika ruaruama nimitaanaro.

15 Mpo, avuhainaa vaiinti viva vukaiqama kero variqiro vuarire. Kaira Arebia vatanaakakori ori vare vuru vira amiate.

Kaira vaiinti nahenti avuhainaa vaiinti virara iriha, vo enta vo enta Kotira aaraivaro viva vira koqema amitaarire.

16 Kairarouitive,baalive, ekaa maa vataraqaa koqema kero qampiqaarire. Vi karava aiqinainivata koqema kero qampiqaarire.

Kairaro Lebanoni vataini airi kara qampiqaintema kero, maa vataraqaavata kara koqema kero qampiqaarire.

Kairaro ukauvano koqe vataqaa koqema kero qampiqaintemake, vo vatuka vo vatukaqi variakavata koqemake variqi viha, airiqamavi variate.

17 Kairamanta vaiinti nahenti avuhainaa vaiinti vira autu kia tauru karaiti vaivaro, kuari avuvano koqema kero itaqiro vintema kero, avuhainaa vaiinti vira nora autuvano ekaa enta takuqukero variqiro vuarire.

Avuhainaa vaiinti viva ekaa naato vatanaaka koqema nimitairamanta, vika virara viva tinavu koqema timite vaivama vaivo tivarave.

18 Ho kaiqenavu Nora Kotira, tinavu Isareri Variqa autu tuahera kaare.

Vivaqaima nora kaiqa vara timite vaimanta tenavu vi kaiqara taveha, kauqu runkinkiri i vauro.

19 Kaiqenavu vira autuvano takuqi vaira ekaa enta ekaa enta tuaheraqi vuare.

Kairamanta ekaa naato vatanaaka vira mpeqa okaravano takuqi vaira tavaate. Quqaave. Quqaave.

20 (Ho te Iesira maaqu Devitika Kotira aarauna uvara taiqama kauro.)

Copyright information for `TBG