1 Timothy 3

Tu witumagana tu tahaehi

Geka nugotuhu dumana apo iyai a luhogala ipa tu witumagana ina taniwagehi yaka naka bagibagi dewadewa dumana i luhogaleya. Taniwaga ona itowoli, lawa dewadewana po a dewa dumadumaluna ma agona emosi hota ma nugonugokadidilina ma upuna hegohegoyana ma nugomagula lawana ma toumana a numa u hinena ina luhogalehi po tu wiatatiyana a mae ina miyena tagoya. Ega umauma kadikadidilina ina laibuuwaya, ma ega ina lauuyogigai po lawa uyahihi ina woogahegahe yabayababa, ma ina nugohegoya po ega gapola luhogalana uyahina ina lalata duma. A numa hinena lawahi ina taniwagena imahiyehi, po a baha natunatuna hina wiponawogogeya ma hina wiyateyateya. Inapa taniwagana natunatuna ega ina galena itetehi yaka Yaubada a bolu apega ina galena itetehi. Tu nugobui wouhi Keliso uyahina ega ona wohepahi po lawa hina tahatahaehi, apo hina nugogegae ma hina peu mei odubona Tomodulele a nugogegae binei ma i peu po luhetala i tutuhagaya pite. Tu galena itete a dewa ina woimahi tu meuputa u matahi, babana apo lawa hai galena iapapoe binei ma ina peu Tomodulele walo i huhouni uyahina.

Numa dalabu tu galena itetehi hina meimahi yaka apo lawa hina wiyateyatehi, po hai winugonugotuhu hina dumadumalu ma ega goila kadikadidilina hina umuma dumaya po ega koyamagei gapola hina tamitamihi. Ma Yaubada a nugohine i woogeleteya hina wogowogoya a nugoyeuyeuhi. 10 Ona ludadana tahaehi po hina kadidili witumagana uyahina ma apoma tauhi ona witowolihi po numa dalabu hina galena itetehi.

11 Tauhi apo ona itowolihi agagohi wiwinehi hina meimahi yaka lawa apo hina wiyateyatehi po ega hina iyalutu ma ega umauma kadikadidilina ina laibuuwahi ma hai bagibagi hina woimahiyeya.

12 Numa dalabu tu galena itetena agona emosi hota ma natunatuna po a numa hinena ina galena itetena imahiyehi. 13 Apo iyai ina bagibagi imahi lawa u matahi yaka gowana ina dewadewa, ma a witumagana Yesu Keliso uyahina ina kadidili duma.

14 U luhogala ipa a neyagiyaginahi uyahim, 15 ma inapa a wihinihinibiga yaka tam tu witumagana una lidumaluhi babana palihanapu atapuna amaka a gilumiyahi uyahim. Geka ututuna ginouli baneina tu witumagana tauta Yaubada Tu wiluyagohana a bolu po tauta a nugotuhu dumadumaluna tu wiudu hepana. 16 Yaubada anani taniwaga ginouli baneina po anona ega ita lugeletena imahiyeya babana:

Yesu Keliso i wilawa hota
po Alugo Woiyawa a dumalu i lugeleteya
ma tu winoyanoya hi galeya
po tuwegana lawa tupo atapuhi uyahihi hi nonoli
po tu mehipuli hi witumaganeya
ma anai wasawasana Yaubada i waya po i gae hoi yada.
Copyright information for `TBO