Luke 3

Yoni bapatiso a luguguya

Sisa Tibeliya u Loma i iwasawasa bolima magouna 15 u hinena naka Ponitiyo Pilato mi Yudeya hai taniwaga. Ma Heloda Galili tupona i gagalena iteteya ma walehina Pilipo Ituleya tupona i gagalena iteteya, ma gasi Talakoniti tupona i gagalena iteteya. Ma Lisaniya Abilini tupona i gagalena iteteya. Ma Anase po Kayapa tauhi tu witalaguyaba tanitaniwagahi. Geka tauna hougana Yaubada a baha i nei Sakaliya natuna Yoni ugolina hau balabala yabayababa. Yoni tauna i lui po i nae Yodani tupona atapuna u hinena apapoe paligigilana ubeina nugobui bapatisona i lauguguyeya. Mei tu bahapiko Isaiya a baha bukana u hinena i gilugilumi i pa,

‘Lawa gehouna hau balabala yabayababa e iototu i pa,
“Guyau a tahaya ona wononogeya.
A tahaya ona lidumaluhi.”
Guguba atapuhi apo hina hogohi.
Oya baneihi po habuluhi apo hina hopu.
Tahaya waiwilowilowahi apo hina dumalu.
Ani nae waitupitupihi apo hina wihabuhabuna.
Ma lawa atapuhi apo Yaubada anani wiluyagohana hina galeya.’
Bolu hi hopu mai po Yoni ipa ina bapatisohi naka ugolihi i baha i pa, ‘Taumi ani galenami mei mota, ugolinei Yaubada a luuyogigai iyetana ipa ona lowo haleya. Tamogi ega emoemotami babana ami nugobui anohi ega ota wogeletahi. Ma ega tuawami ona pa, “Gogiyai Abelaham”, naka ginouli yabayababa babana a paliwelemi Yaubada emoemotana po geka gaimahi ina dewahi po Abelaham googana. Geka hougana Yaubada ilama i wononogogeya ipa mayau u dedena ina taleya. Ugolinei ma mayau atapuna ega ita ugugo apo ina talahalehi po mayau alalatana ugolina in'omapugehi.’

10 Ma bolu hi lubayadeya hi pa, ‘Iyowai apo to dewa?’

11 Ma hai baha i wimiheya i pa, ‘Iyai ugolina luilui luwaga yaka ina gutaya lawa gehouna ega ita iluilui mitehi. Ma iyai ugolina aniani yaka dewana emosina ina dewaya.’

12 Takisi tu tama hi nei po ipa bapatiso hina waya tauhi gasi hi baha ugolina hi pa, ‘Bada, apo awai to dewaya?’

13 Ma tauna i baha i pa, ‘Gapola mihana a lata awai mi Loma hi bahebaheya naka ega ona huhouna lagoneya’.

14 Tu wigawiya hi lubayadeya hi pa, ‘Ma tiyai apo iyowai to dewa?’

Ma ugolihi i baha i pa, ‘Lawa hai gapola ega ona halohalohi bo koyamagei ona tamitamihi. Ma ami bagibagi mihahi ona kaohehi tamogi.’

15 Lawa hai witumagana hi lata po hi nugowilawila hi pa, nugote Yoni tauna Yaubada a Besinana lawana. 16 Yoni atapuhi ugolihi i baha nae i pa, ‘Tau eega; tau goilagei a ibapatisomi ma tauna tu gelagoniu naka e nenei. Tau ega u dewadewa awai ipa apo a aehumahuma a lupeni. Tauna apo Alugo Woiyawei po wipoya mei mayau alalatanei ina bapatisomi. 17 Anani luhapu hipana u nimana po aniani mei pegapega ina tuwaluhi po a hanali u hinena ina tuupumi. Ma nudanudahi apo mayau alalata tuwetuweneina ugolina ina apuhi.’ 18 Luguguya galenahi tapuhi po tapuhigei Yoni tuwega dewadewana i lauguguyeya lawa ugolihi.

19 Ma Yoni taniwaga Heloda i palihopuhopuneya babana walehina agona gowana Helodiyasi i lawalawagi binei. Ma gasi dewa apapoe atapuhi Heloda i dewadewahi bihiyei. 20 Apoma apapoe banei dumana Heloda i dewadewaya naka Yoni hau numa panipani i tuguduya.

Yesu a bapatiso

21 Lawa atapuhi hi bapatiso po u mulina Yesu i bapatiso. Ma hougana Yesu i laupali naka yada i gunahoeya 22 po Alugo Woiyawa i libunebuneya ma i hopu mai tauna ugolina. Ma pona yadei i hopu mai i pa, ‘Tam Natuwe a luhogalem, ma bimgei a kaoha’.

Yesu googana

23 Yesu hougana a bagibagi i wawali naka a bolima magouna 30. Tauna lawa hi pa amana Yosepa ma Yosepa Heli natuna.

24 Heli Matati natuna ma Matati Libai natuna.

Libai Meleki natuna ma Meleki Yanai natuna, ma Yanai Yosepa natuna.

25 Yosepa Matiyasi natuna ma Matiyasi Eimosi natuna.

Eimosi Nahum natuna ma Nahum Esili natuna.

Esili Nagai natuna ma
26 Nagai Mata natuna.

Mata Matatiya natuna ma Matatiya Semeina natuna.

Semeina Yoseka natuna ma Yoseka Yoda natuna.

27 Yoda Yowanani natuna ma Yowanani Lesa natuna.

Lesa Selubabe natuna ma Selubabe Satiyeli natuna.

Satiyeli Neli natuna ma
28 Neli Meleki natuna.

Meleki Adi natuna ma Adi Kosam natuna.

Kosam Elumadam natuna ma Elumadam Elu natuna.

29 Elu Yosuwa natuna ma Yosuwa Eliyesa natuna.

Eliyesa Yolim natuna ma Yolim Matati natuna.

Matati Libai natuna ma
30 Libai Simiyona natuna.

Simiyona Yuda natuna ma Yuda Yosepa natuna.

Yosepa Yonam natuna ma Yonam Eliyakim natuna.

31 Eliyakim Meleya natuna ma Meleya Mena natuna.

Mena Matata natuna ma Matata Natani natuna.

Natani Dawita natuna ma
32 Dawita Yese natuna.

Yese Obedi natuna ma Obedi Bowasa natuna.

Bowasa Sala natuna ma Sala Nahasona natuna.

33 Nahasona Amidana natuna ma Amidana Adimana natuna ma Adimana Ani natuna.

Ani Heselona natuna ma Heselona Pelesa natuna.

Pelesa Yuda natuna ma
34 Yuda Yakobo natuna.

Yakobo Isako natuna ma Isako Abelaham natuna.

Abelaham Tela natuna ma Tela Naho natuna.

35 Naho Seluga natuna ma Seluga Leu natuna.

Leu Pelega natuna ma Pelega Ebe natuna.

Ebe Sila natuna ma
36 Sila Kainana natuna.

Kainana Apakada natuna ma Apakada Sem natuna.

Sem Nowa natuna ma Nowa Lameka natuna.

37 Lameka Metusela natuna ma Metusela Enoka natuna.

Enoka Yaledi natuna ma Yaledi Mahalali natuna.

Mahalali Kainana natuna ma
38 Kainana Enosi natuna.

Enosi Seta natuna ma Seta Adam natuna ma Adam Yaubada natuna.

Copyright information for `TBO