Mark 4

Yesu i'mpaliluwaluwa pehi binei

Yesu i gunawileya Galili u bogana ma i wiwawala po i guuguya ma bolu banei dumana hi'mboina mai uyahina, ega yaka Yesu wam uyahina i gelu po i tugula imahi ma bolu hoi dedeyani hi towotowolo. Ma ega yaka baha wiluwaluwagei i wiyatatiyehi i pa, ‘Ona lutanigana, tu lupehi i nae a tano uyahina po a pehi polahi i nohanohahi. I ihulu po pola gehouhi hoi tahaya hi peu po kiu hi anihi. Ma pola gehouhi hi peu dobu waigaigaimana uyahina po hi laha yagiyaginehi babana hipulina ega ita potopoto. Ma kabudala a houga lalana uyahina mala emosi ma hi kokodila, babana dedehi ega hipuli dewadewana hita tuhagaya. Ma pola gehouhi hiyamoni waidonadonana u hayahi hi peu po hougana hi lahalahahi naka donadona i numa panipani unihi. Ma pola gehouhi hipuli dewadewana uyahina hi peu po hi lata po hi ugo. Hai houga ugo naka gehouhi ega hit'ugo imahi ma gehouhi ega hit'ugo duma. Ma gehouhi hi ugo labatana.’

Uyahinei Yesu i pa, ‘Taumi iyawoi waitanigami yaka ona launonola’.

Awai binei Yesu i bahabaha wiluwaluwa

10 Yesu a guguya i luwegahi po bolu hi'mtuihagola ma a hewahewali po tu wotagona gehouhi mitehi hi memae po hi lubayada hi pa, ‘Nugonugoiyai ipa om baha wiluwaluwa una liyayahihi uyahiyai’. 11 Yesu hai baha i wimiheya i pa, ‘Taumi amaka Yaubada anani taniwaga anona i lugeleteya uyahimi. Ma tauhi tu meuputa baha wiluwaluwa geka hi nonoli ma anona ega hita hanapugeya. 12 Geka binei ma baha wiluwaluwagei i iatatiyana babana,

“Apo hina wihalugeya ma apega hina galena tuhagaya
po apo hina lutanigana ma apega hina hanapugeya.
Ma itapa hita hanapugeya apo hai apapoe hita wihinigigiyehi
po Yaubada ita paligigilihi.” ’

Pehi paliluwaluwana anona

13 Yesu i lubayadehi i pa, ‘Pehi paliluwaluwana ega ota hanapugeya? Yaka baha wiluwaluwa gehouhi apega ona hanapugehi. 14 Tu wihulu Yaubada a baha e laiholi lawa u nugonugohi. 15 Pola hoi tahaya hi pipeu naka lawa Yaubada a baha hi nonoli ma Tomodulele bahana u nugonugohi i wihaleya. 16 Ma pola dobu waigaigaimana uyahina hi pipeu, anona naka iyawoi Yaubada a baha anai kaohahi hi nonoli, 17 tamogi ega dedehi uyahinei ma he itumagana po ega daona ma witai po pilipili he wialonihi naka bahana binei ma amaka he peu. 18 Pola hiyamoni waidonadonana u hayahi he pepeu anona naka lawa Yaubada a baha hi nonoli 19 ma tamogi hipuli genona ma gapola wasawasahi nugohi i waya po tauhi hai luhogala gowagowadagei bahana hi winugoguluwi po ega ugohi. 20 Ma pola hipuli dewadewana uyahina hi pipeu anona naka lawa tauhi baha hi nonola tuhagaya yaka apo hin'ugugo. Gehouhi ega hit'ugo imahi, gehouhi naka hi ugo duma ma gehouhi hi ugo labatana.’

Paliluwaluwa lampa binei

21 Yesu a baha wiluwaluwa gehouna yayata omgowadana binei, i baha i pa, ‘Ega iyai lampa ita apuya ma gaebagei ita lautataya bo ani eno u gaboulina ita huhouni, tamogi anani tugula uyahina e huhouni. 22 Awai gowagowadana apo ina wihabuhabuluna po lawa hina nonoli. Ma awai gowagowadana apo hina tuhagaya po hina neiyai hoi yayata po lawa hina galeya. 23 Taumi iyawoi waitanigami yaka ona launonola.

24 ‘Iyawoi o lautanigana ipa ona gagalena imahi. Babana awai o dewadewaya apo Yaubada bimiyei ina dewaya po ina luwitani. 25 Matababana iyai uyahina awai dewadewana e memae apo Yaubada ina luwitani tauna uyahina. Ma iyai uyahina eega, awai habuluna e memae apo Yaubada ina wihaleya.’

Paliluwaluwa pehi lahana binei

26 Yesu i baha i pa, ‘Yaubada anani taniwaga naka mei pehi lawa a tano uyahina i ugohi, 27 ma uguwei lawana i eno po malatomtomgei i towotowolo po pehihi hai laha po hai lata a baba ega ita hanapugeya. 28 Hipuli tauna tu wilata lugu ma ugo hai dewadewa tu welehi, 29 ma a houga magula uyahina apo ugonana hina lohi.’

Paliluwaluwa pola habuluna binei

30 Yesu i baha meme i pa, ‘Yaubada anani taniwaga galenana awai? Ma apo awai uyahina a paliluweluweya? 31 Galenana mei ihagila polana habuluna, 32 ma apo lawa e ugohi po e lahaya po e lata ma lagalagana baneihi e hounihi ma kiu hai pata he wogowogohi.’

Yesu a paliluwaluwa hi maga duma

33 Yesu a guguya uyahina paliluwaluwa hi maga duma ma uyahihiyei Yaubada a baha i bahebaheya lawa uyahihi ma awai lawa emoemotahi po hina hanapugeya naka tauna Yesu i luwaluwageya. 34 A luguguya lawa uyahihi houga magomagouna ompaliluwaluwagei i iatatiyana ma a hewahewali uyahihi i palipaligeletehi paliluwaluwahi anohi.

Yesu a taniwagagei togowa ma guletutu i palidumolihi.

35 Ibigei a hewahewali i paliwelehi i pa, ‘Ta gelu po ta woe damana u tupona’. 36 Hi gelu ma bolu hoi gadowa hi nehalehi po hi yamkuka ma wam gehouhi gasi hi wotagohi. 37 Hi'mkuka po hi damadamana ma togowa a guletutuna hi wiyaloni po guletutu i hulugeleteya wam u hinena ma apo hita yoli. 38 Ma Yesu wam u mulina i eneno ma a hewahewali hi limaamahi po hi pa, ‘Bada, ega uta genogeta, kikina ma apo ta hilage’.

39 Yesu i welutowolo po togowa ma boga anai guligulina i paliyehi i pa, ‘Amaka ma ona todi’, po ega yaka togowa i todi ma noka hougana dumola baneina.

40 Ma a hewahewali i paliwelehi i pa, ‘Awai binei o matomatouta? Yohola ega Yaubada ota witumaganeya?’

41 A hewahewali hi matouta duma, ma tunawahi hi lulubayadena mehi hi pa, ‘Geka lawana awai? Togowa po guletutu he iponawogogeya.’

Copyright information for `TBO