1 Thessalonians 3

Kemtuul lala wol lo gam, pesu biil kemtuul ier isi nene biitom. Kemtuul ka wol le, i rokap le kama sau e Sailas kaman kiis agawa na Atens ma kamak wuun Timoti. Ke, kama ka wuun ufu ta Timoti tualik kerer, ma i e tom foim ke God tura kamah, le kemtuul en fafas ini Rokap na Fafas lo Karisito. Kama ka wuun ufu tah usuf gam isi farakrakai gam ke ik ta orek una lupes gam na unune kimi, isi biil tikas lo gam in nut e unune kia i wara na foron tatawin ae gam tafe u. Wara le gam tom gam usum le foron tatawin ae keren kalsakai u. Aunbiing kere kiis turim biitom, kemtuul fas gam la le fanu rin falaulau kerer. Ke gam ka usum tah le foron tatawin ae ka tapiek mang. I e wara, ke ia ka wuun ufu Timoti usuf gam. Ia lala wol la lo gam, ma biil ia ier isi nene biitom, pesu ia ka wuun ufu usuf gam isi iak usum na unune kimi. Ia sokeh tarama tom fatoftof ka faluut ta gam ke tarama foim kimemtuul ka tier foes.

Rokap na Fafas sing Timoti i Farakrakai Pol

Isau le, igii sau Timoti i am fis tah tinawii na aismi usuf kamah. Ke ka kep fafis ta nenge rokap na fafas usuf kamah na unune kimi ke na famais kimi. I fas kamah sabin le gam laes la na aunbiing gam wol pes kiis turim kirer la pakanini. Ke gam ier kanaka le gamen par kemtuul sabin, ke kemtuul sabin, kemtuul ier kanaka la isi par gam. Foron tualik kemtuul, unune kimi i farakrakai ta kemtuul na kiis kimemtuul na palgan tatawin ke foron sinang laulau ae fanu ri tel u la ini kemtuul. Igii liu kimemtuul ka rokap kanaka mang, aunbiing gam tifat lo Kumguui. Kemtuul laes kanaka ini gam na mata God kirer, ke kemtuul ka fot rokap usuf i. Laes kimemtuul i laumet kanaka, pesu, arafah kemtuul en fot rokap arae isi ik fasih ini tara na laes kimemtuul? 10 Kemtuul ta tikii liu kimemtuul la tom na sising isi gam na foron siat ke na foron wor tikii. Kemtuul sising isi kemtuul en par gam sabin, ke kemtuul en fausum gam ini ti fal e tier una farakrakai unune kimi.

11 Pesu kemtuul ka sising le God tom Tama kerer, ke Iesu Kumguui kirer in sapeng na sal kimemtuul isi kemtuul en la usuf gam. 12 Ma kemtuul sising sabin le Kumguui in fakuum famais kimi ke ik ring sararah na fatpoto gam ke usuf fal sabin, arae famais kimemtuul usuf gam. 13 Kemtuul sising le Kumguui in farakrakai balmi isi gamek tapiek kalkaluu, ke biil i fasih tikas in tiu gam ini ti tier, aunbiing gamen sotih na mata God Tama kerer, na biing ae Iesu Kumguui kirer in fis turan foron fanu kalkaluu kia.

Copyright information for `TGG