1 Timothy 2

Fafausum na Sinangun Lotu

Tier famu, ia ier isi foron tom unune rin sising. Gamen sising isi sanih gam ier isi, gamen sising isi fanu, ke gamen sising una fotrokap usuf God. Gamen sising arae, isi fanu tikii. Ke gamen sising sabin isi foron king, ke isi foron famfamu tikii, isi kerek kiis rokap ini siaroh, ke liu ae i kalkaluu, ke liu ae i mi na wolwol ke God. Male gamen sising arae, ke in rokap kanaka na mata God, Tom Fafaliu kirer, ke in laes ini. I ier isi faliu pes fanu tikii, ma isi rik usum na tekentu. Wara le i tikii sau e God, ke i tikii sau e kaltu ae i lame turim fanu tura God, i e Karisito Iesu, ae i ta ta liu kia tom isi in fiil fafis fanu tikii. Na aunbiing ae God i put ta u, Iesu ka fatekentu wolwol ke God, ae i ier isi faliu pes fanu tikii. I e wara, God ka tim pes ta iau isi ian tapiek nenge aposel, ke iak fafas ini Rokap na Fafas usuf fanu ae biil ri fan Iudaia, ma iak fausum ri ini unune tekentu. Ia orek tekentu, biil ia to lem.

Ia ier isi fanutamat tikii na foron maleh rin sising, ma aunbiing rin sising rin sik limri una mawe ini sinang ae i kalkaluu, biil ini balkut ke ini ti fakep ini orek.

Ia ier sabin le kelefin tikii rin kilkiliis ini foron kilkiliis ken kelefin tom. Rin kilkiliis ini foron kaen ae i finngas bulat ke rokap na sinang. Gong ri got ma ri ka fis olri, gong ri me ri tom ini goul le foron kutkute ae i fen kanaka e matri, ke gong sabin ri kilkiliis ini foron kilkiliis ae i fen kanaka e matri. 10 Isau le kelefin ae ri tara le ri lotu la usuf God, rin kilkiliis ini foron rokap na sinang.

11 Ke aunbiing kelefin ri kep fafausum, i rokap le rin kiis fofo ma rik fapuh ri tom. 12 Biil ia to somangat ufu ti fifin isi in fausum ti kaltu, le in famu pes u. I rokap le in kiis fofo sau. 13 Wara le God i fakiis famu ta Adam ke namih Iwa. 14 Ke biil e Adam ae Satan i fabal ta u. Biil. Fifin ae Satan i fabal ta u, ke sinang laulau ka tapiek. 15 Isau le God in faliu kelefin na sinangun fafang, male rin tifat na unune, na famais, na sinang kalkaluu ke na tortores na sinang.

Copyright information for `TGG