1 Timothy 6

Fafanau ulon foron Fafauun

Fanseh lo gam ae ri foron fafauun, i rokap le rin lala bulat lon foron laulaumet kiri, isi biil tikas in use falaulau asa God turan fafausum kirer. Ke foron fafauun sabin ae laulaumet kiri i tom unune, gong ri wol le biil rin bulat lo, wara le ri fatfat latualik na unune. Rin wong rokap sing i, wara le ri foim sing tom unune ae ri ier kanaka isi. Foron tier igii on farakrakai ri ini ke ok fausum ri ini.

Sinangun Ier kanaka isi Pitkalang

Male tikas i fausum fanu ini ti fafausum ae i neng keskes na foron fafausum tekentu ke Kumguui kirer, Iesu Karisito, ma i neng keskes sabin na fafausum ae i rokap na mata God, matngan kaltu ae, i falaumet u tom ma biil i usum na ti tier, i ier sau isi in fapue ke ik fakep ini foron orek fofoes, ma sinang ae ka tapiek arae nenge sasem kia, ma ka fatapiek foron sinang aragii: Sinangun ram, sinangun ngaliaf, fanes, ke wolwol laulau ulon fal. Wolwol kiri biil i to malal ma ri fabalkut mulmul fis la tom ini ri, ma foron tekentu na orek ka mangmangal tah sing ri. Ri wol le lotu kiri usuf God in fatapiek in fuun e pitkalang usuf ri.

Isau le keren kalok male lotu kirer usuf God in la turim turan laes ini foron tier ae God ka ta ta u usuf kerer. Wara le aunbiing kere pang tah, biil kere tapiek tah ini ti tier uga na piklinbat, ke aunbiing sabin keren met, biil ifasih keren kep ufu ti tier tinaga. Male imel e inen arer ke kilkiliis kirer, ke ifasih, keren laes sau ini. Fanseh ae ri ier kanaka isi in fuun e pitkalang, ri luut la na fatoftof ke ri ka fiu la na kuun ken talos na wolwol ae in falaulau ri, ma in faluut fanu fuun una minet ke fiu fitliu. 10 Wara le sinangun ier kanaka isi pitkalang, i e waran foron sinang laulau tikii. Ma fanu fuun ae ri wol kanaka la na pitkalang, ri ka la koseng ta tekentu na unune, ma ri ka falaulau fafis liu kiri tom ini foron tatawin.

Pol i Fanau Timoti na Foim kia

11 Isau le o kaltu ke God, on fin koseng foron tier ae, ma on rakrakai isi on mi na foron sinang aragii: tortores na sinang, ma sinang ae i rokap na mata God, sinangun unune, sinangun famais, sinangun sotifat na palgan tatawin, ke sinangun kiis fofo. 12 On fapaket rokap ini unune, ke ok posefat na liu fitliu ae God i tawi pes ta wo isi on kep u, aunbiing o tel ta rokap na fafapos na matan fanu fuun. 13 Ia fas o na mata God ae i ta liu la sing foron tier tikii, ke na mata Karisito Iesu ae i tel ta rokap na fafapos na mata Pontius Pailat. Ia fas o le: 14 On misuut na foron fafanau ae o ka kep ta u, isi biil rin tiu wo ini ti sinang laulau. Ma on tel u tom arae, papang na aunbiing ae Kumguui kirer, Iesu Karisito in fis. 15 Ma in fis na aunbiing tom ae God i put ta u. God ae i fuun ini fafakalok, i keskes sau i Tom Nagogon, i e King ken foron king tikii, ma i e Kumguui ken foron kumguui tikii. 16 Ma i keskes sau biil i to met la, ma i kiis na falifuh ae ifuun ini malal ae biil tikas i fasih in la fatat u. Biil biitom tikas i par ta u ma biil tikas i fasih in par u. Keren bulat lo, ma rakrakai kia in kiis fitliu. Amen.

17 On fanau fanseh ae i fuun e minsik kiri aga na piklinbat le, gong ri falaumet ri tom, ke gong ri luun unune kiri na pitkalang ae biil in to kiis dolo. Isau le rin luun unune kiri sau lo God ae i fen kerer la ini foron rokap na tier tikii una falaes kerer. 18 On fanau ri le rin tel foron rokap na sinang, ke rin fuun ini foron rokap na foim, ke sinangun fafen ke falupes faliu. 19 Male rin tel u arae, ke rin posefat na minsik tekentu. I e rokap na waran singlen na liu ae namih, isi rik kep u e liu ae i e liu tekentu.

20 Timoti, on fofonoi rokap na foim ae God i unune ufu tah una limam. On fin koseng foron orek fofoes ae biil i fasih rin lupes o isi mi lo God. Ke on fin koseng fanu sabin ae ri fapue la kunan tier ae ri foteng u le tasum, isau le biil e tasum tekentu. 21 Fale fanu ri mi ta na foron matngan orek arae, pesu ri ka la koseng tekentu na unune.

Famais ke God usuf gam.

Copyright information for `TGG