James 3

Kerme kerer

Foron tuaklik, gong i fuun lo gam rin tapiek foron tom fafausum na palgan lotu, wara le gamen usum le nagogon ke God usuf kerer foron tom fafausum, in ngangaten kanaka na nagogon usuf fal e fanu. Ifuun e tier kerer tikii kere tel fager u la, isau male tikas biil i use fager ti tier na orek kia, ke kaltu ae i tortores kanaka, ma ifasih in nagogon fakasi pununfo tikii.

Aunbiing kere luun nenge fabiro sun aen na ngusun nenge os isi ik wong sing kerer, ke ifasih keren dat fagiliim os kuruur ae ini. Ke, gamen par foron sip sabin ae ri filau la ini sel. Taftawa le sip ae i laumet, ma rakrakai na kif i kufe u, isau le ri ikis u sau ini fabiro fiis, isi ik filau arae na wolwol ken kaltu ae i ikis u la. Ke, ifasih sau arae kerme kerer, i nenge fabiro irin pununfo kerer sau, isau le i falaumet u tom ini tier ae i tel u la.

Gam par u, nenge fabiro natnatun yiif sau i fasih in fasok nenge tara sun potormok.
Kerme kerer i nenge fabiro irin pununfo kerer ae i arae yiif. I fuun ini laulau ma i faduh tikii pununfo kerer la. I fasok liu tikii kirer ini yiif tina tara yiif ae biil i met la.

Fanu ri fasih rin famoh foron wawaguai tikii arae, foron man, ke foron tier ae ri kakak la na nanal, turan foron tier ae ri liu la na palgantes. Isau le, biil tikas i fasih in famoh kerme. I langlangan ma i laulau kanaka, ma i arae wef ae i fasih in siimete kaltu.

Kere usefages Kumguui Tama kerer la ini kerme kerer, ke kere ka use falaulau fanu la sabin ini, fanseh ae God i fakiis ta ri, arae i tom. 10 Ususefages ke orek laulau, ru turim ru suuh la tina ngusu kerer. Foron tuaklik, biil i to rokap arae. 11 Biil ifasih dan mir turan tes run ring suuh turim tina nenge matan dan. 12 Foron tuaklik, biil ifasih le au na fik in luun fuan olif, ke biil sabin ifasih le au na wain in luun fuan fik. Arae sabin, biil ifasih rin utfe dan mir tina palgantes.

Iwu e Matngan Tasum

13 Male tikas lo gam i mel e rokap na wolwol kia ma i tom tasum, in finngas u ini rokap na sinangu, ke in fapuh u tom, ma ik tel foron rokap na foim. Kaltu ae i fapuh u la tom, i finngas tasum tekentu. 14 Isau male imel e wolwol laulau na fatpoto gam, ke gam ka im tier la una falaumet gam tom, gong gam usefages gam tom le imel e tasum kimi, ma gong gam bo kale tekentu la ini lem. 15 Matngan tasum arae, biil i la tina kukulii. I e tasum sau tinaga na piklinbat, ke Satan, ma biil ken Tanwa Kalkaluu. 16 Wara le fanseh ae imel e wolwol laulau kiri, ma ri ka im tier una falaumet ri la tom, liu kiri i rigorigo ma ifuun sabin ini foron marmarsan sinang laulau.

17 Isau le seh i mel e tasum tinbae na kukulii sing i, tier famu, in tapiek kalkaluu, ke in fuun ini siaroh, ke in wol la lon fal e fanu sabin, ke in tapiek tom wongwongmet, ke in fuun ini famais, ke in mel e rokap na fuan liu kia, ke sinangu in fafasih sau usuf fanu tikii, ma biil in mel e sinangun garan na liu kia. 18 Kaltu ae ifuun ini siaroh, i fatapiek siaroh la, i arae nenge tom soso. Ma foron tier ae i lus u, i e foron sinang tortores.

Copyright information for `TGG