James 4

Seh i ier isi Sinangun Piklinbat, i Tapiek Tuui ke God

Sanih i fatapiek fapaket ke fapue la na fatpoto gam? Iwara le gam ier isi in fuun e tier una falaes gam, ma wolwol ae, ka famam fapaket na liu kimi. Gam ier isi ti tier, isau le biil gam kep u. Gam ram na foron minmaran fanu ke gam ka siimete ri, isau le biil gam kep foron tier ae gam ier isi. Gam fafating ke gam ka fapaket, isau le biil gam kep u, wara le biil gam sising God isi. Aunbiing gam sising, ke biil gam kep foron tier ae gam sising isi, wara le wolwol kimi biil i tortores. Gam sising sau isi foron tier una falaes foes gam tom.

Gam la koseng ta God arae nenge fifin ae i lin antu ke ka telpes nenge kaltu keskes. Biil gam usum? Seh i ier isi sinangun piklinbat, i tapiek arae tuui ke God? Ma seh i ier isi in fatala turan sinangun piklinbat, i nenge tuui ke God. Gam usum le Buk na Gogoh biil i orek foes aunbiing i use u aragii, “God i ier kanaka isi fanu ae i luun ta Tanwa lo ri, arae nenge kaltu i par kale antu.” Isau le famais ae God i ta u la sing kerer i laumet kanaka. Pesu Buk na Gogoh ka use u aragii,

“God i tapiek arae tuui ini fanseh ae ri falaumet ri la tom,
isau le i mais fanseh ae ri fasabiro ri la tom.”
4.6Par Gutpela Sindaun (Proverbs) 3:34

Pesu, gamen fapuh gam tom na mata God. Gamen tikale Satan, ma ik fin koseng gam. Gamen la fatat isi God, ke God ik la fatat isi gam. Gam foron tom tel sinang laulau, gamen sofolim. Ke gam ae iwu e wolwol kimi, gamen fakalkaluu balmi. Gamen mamais ke gamek teng ma gamek luluen. Gamen sokiliis yong kimi una tineng, ke laes kimi una mamais. 10 Gamen fasabiro gam tom na mata Kumguui, ke ik falaumet gam.

Gong gam Use Falaulau Fal lo gam

11 Foron tuaklik, gong gam use falaulau fal lo gam tom. Seh ae i use falaulau tualik la, le i nagogon u, i use falaulau nagogon ke God, ke ka pue u. Male o pue nagogon ke God, ke biil o ongen pes u, o falaumet wo tom lon nagogon ke God. 12 God sau i ta nagogon la, ma i keskes sau i Tom Nagogon. I sau ifasih in faliu fanu, le in falaulau ri. Ma o wol le o seh, ae o ka nagogon ier ae na fatat o?

Gong Gam Falaumet Gam tom

13 Ongen u, gam ae gam tara la le, “Igii, le lumen, kemen la una nenge maleh ma kemek melmel pes in tikii e bet aiwa, ma kemek foimnge pitkalang.” 14 Isau le biil gam usum le sanih in tapiek na liu kimi lumen. Gam arae bau sau ae i tapiek la, ke fanpil ka mangmangal. 15 I rokap le gamen tara aragii, “Male wolwol ke Kumguui, ke keren liu ma kerek tel u aragii, le arae.” 16 Isau le igii, gam falaumet gam tom ini orek kimi. Matngan sinang arae i laulau. 17 Male tikas i usum na sinang rokap le in tel u, isau le biil i tel u, ka tel sinang laulau tah.

Copyright information for `TGG