James 5

Fafanau usuf Fanu ae Ifuun e Minsik kiri

Ongen u, gam ae ifuun e minsik kimi. Gamen teng ke gamek ngangeh, wara na foron tatawin ae in tapiek lo gam. Foron minsik kimi ka marot tah, ke foron fitfit ka ngutngut ta foron kilkiliis kimi. Foron goul turan silwa kimi, ros ka falaulau ta u, ma ros na foron minsik kimi in tiu gam, ma in tun pununfo gam arae yiif. Na farfarop na foron biing igii, gam ka luun turim ta foron minsik kimi.

Par u, biil gam fiil fanu ae ri foim la sing gam, ma fifiil kiri ae biil gam ta ta u usuf ri, i famam tiu gam. Ke tineng ken foron tom foim sabin, Kumguui ae i rakrakai kanaka ka ongen ta u. Na liu kimi aga na piklinbat, gam lin pirpiran pitkalang na foron ngasa kimi tom, ke na foron sinang ae i falaes gam la. Gam lala ien ma gam ka sut, fanpil ke gamen fiu, arae foron bulmakau ae i sut, ma ri ka siimete ri la. Gam ka nagogon ta foron tom tortores, ke gam ka siimete ri, isau le biil ri kiliis fafis u la usuf gam.

Keren Tifat ma Gong Kere Angos Sape

Pesu, foron tuaklik, gong gam angos sape aunbiing gam nene isi paipai fis ke Kumguui. Gam par tom soso ae na palgan mok, biil i angos sape aunbiing i nene la isi us in luut ma ik sufe nanal, ke isi inen na mok kia ik matuk. Gam sabin, gong gam angos sape, gamen tifat, wara le biingen paipai fis ke Kumguui ka fatat mang. Foron tuaklik, gong gam belbel orek ulo foron tualik gam, isi le God biil in nagogon gam. Tom nagogon ae mang ka sotih ta na matanfel.

10 Foron tuaklik, gamen wolpes foron poropet tin pakanini ae ri fafas ta ini asa Kumguui. Ifuun e fangungut ri tafe u, isau le biil ri to angos, ri tifat tom. Liu kiri i rokap na tintof isi gamen mi lo. 11 Par u! Kere usum le fal e fanu tin pakanini, ae ri tifat tom aunbiing ri tafe tatawin, ri ka kalok tah. Gam usum na liu ke Jop, i tifat tom aunbiing tatawin i tapiek lo. Ke namih Kumguui ka fakalok u. Kumguui ifuun ini famais, ma i mais kerer la.

12 Foron tuaklik, tier ae i laumet kanaka i aragii, gong gam falimlim ini ti tier sabin. Gong gam falimlim ini kukulii le ini piklinbat. Male gamen tara le, biil, ke biil. Ke male gamen tara le, iuu, ke iuu. Tarama gam ka fiu na nagogon.

Sising ini Unune

13 Male tikas lo gam i kalsakai tatawin, i rokap le in sising. Ke male tikas i laes, i rokap le in sek ti foron seksek an usefages. 14 Male tikas lo gam i sasem, ke in fawuun isi foron famfamu na lotu ke rik sising kale u, ke rik saba wel lo na asa Kumguui. 15 Sising ae i la turim turan unune, in faliu kaltu ae i sasem, Kumguui tom in faliu u. Ke male ka tel ta ti sinang laulau, Kumguui in pa ufu. 16 Gamen fapos faliu foron sinang laulau kimi, ke gamek sising faliu isi gam, isi God ik faliu gam. Sising ken nenge tom tortores i rakrakai kanaka ma i fasih in fatapiek in fuun e rakrakai na tier.

17 Poropet Elaisa i kaltu sau arae kerer. I sising rakrakai tom le gong i luut e us, ke na ituul e bet ma tiga, us biil i to luut. 18 Aunbiing ka sising sabin, ke us ka luut tina bat, ma foron tier tikii ri ka kuum na nanal ke ri ka fua. 19 Foron tuaklik, male tikas lo gam ka la koseng ta orek tekentu, ke gamen lame fafis u sabin. 20 Ke gamen wolpes u, male seh i lame fafis tikas koseng sinang laulau kia, ke in faliu u koseng minet, ke God in pa ufu in fuun e sinang laulau.

Copyright information for `TGG