John 10

Iesu tom e Rokap na Tom Parpar kale foron Sipsip

“Tekentu kanaka, ia fas gam, le kaltu ae biil i kau na matan ubiif ken foron sipsip, ma ka kau paket na ubiif, i e nenge tom suksukuum, ma nenge kaltu una dat foes tier ken fanu. Kaltu ae i kau na matan ubiif, i e tom parpar kale ken foron sipsip kia tom. Tom parpar kale matan ubiif i sapeng pes u la, ke foron sipsip ri wong la na kine. I kam foron sipsip kia tom ini asri ma ka lame fasuuh ri. Aunbiing tom parpar kale foron sipsip ka lame fasuuh foron sipsip kia tutus tah, ke ka famu pes ri. Ke foron sipsip kia ri ka mi lo, wara le ri ongen failiim kine tom. Isau le biil tom rin mi lo nenge kaltu keskes, rin fin koseng u wara le biil ri ongen failiim kinen kaltu keskes.” Iesu ka fas ri ini tintof igii, isau le biil ri malal na sanih i fas ta ri ini.

Pesu Iesu ka fas ri aragii, “Tekentu kanaka, ia fas gam, iau tom e matan ubiif ken foron sipsip. Fanu tikii ae ri la famu ta lo iau, ri foron tom suksukuum ke foron tom dat foes tier ken fanu. Isau le foron sipsip biil ri wong tah sing ri. Iau tom e matan ubiif. Le seh ae i kau sing iau, in kep liu. In kau ke in suuh ma in tafe in fuun e fifih. 10 Tom suksukuum i la sau isi suksukuum, sisiimete ke falaulau ri. Ia la tah uga isi rik kep liu, liu ae i fuun ini fafakalok.

11 “Iau tom e rokap na tom parpar kale foron sipsip. Rokap na tom parpar kale foron sipsip i lin liu kia la isi foron sipsip kia. 12 Kaltu ae ri fiil u sau isi parpar kale foron sipsip, biil i taman foron sipsip. Biil. Ke, aunbiing i par pes puul ngalngaliaf i la isi, in kang koseng ri la ma ka fin. Ke puul ngalngaliaf ka ngaet ri ma ka fes sararah ri. 13 Kaltu ae i fin la, wara le ri fiil ta u sau isi parpar kale foron sipsip, ma biil i mais ri.

14 “Iau tom e rokap na tom parpar kale foron sipsip. Ia usum lon foron sipsip kiak ke foron sipsip kiak ri usum lo iau, 15 i fasih sabin arae Tata i usum lo iau, ke ia usum lo Tata. Ma ia lin liu kiak isi foron sipsip. 16 Imel e fal e sipsip sabin kiak ae biil ri kiis la turan fal igii na palgan itikii e ubiif. Ian lame pes ri, isi ri sabin rik ongen kineng, ke rik tapiek itikii sau e uh na sipsip ke ik tikii sau e tom parpar kale sipsip kiri. 17 Tata i ier kanaka isi iau, i wara le ia lin liu kiak isi iak kep fafis u sabin. 18 Biil tikas in kep ufu liu sing iau. Biil. Isau le ia lin liu kiak ini wolwol kiak tom. I mel e rakrakai kiak una lin liu kiak, ke i mel e rakrakai kiak una kep fafis u sabin. Foim igii, Tata tom i fas ta iau isi ian tel u.”

19 Ke ka mel sabin e tampaek na fatpoton fan Iudaia i wara na orek ke Iesu. 20 I fuun lo ri, ri ka tara, “I mel e tanwa laulau lo ma i talos. Gam wong sing i isi sah?”

21 Isau le fal lo ri ka tara le, “Kaltu i mel e tanwa laulau lo, biil i orek la aragii. Tanwa laulau biil tom i fasih in sapeng na matan tikas e kut.”

Foron Famfamu ken Fan Iudaia biil ri Unune

22 Na aunbiing ae, ri tel inen na Ierusalem, una wol pes aunbiing ae Felun Sising i tapiek tah arae fel ke God. Tel inen ae, ri tel u la na funiil ae mir i afit falifuh tikii. 23 Na aunbiing ae, Iesu tinawii na palgan Felun Sising na felun malmaluu ae ri foteng u le, felun malmaluu ke king Solomon. 24 Foron famfamu ken fan Iudaia ri ka ruruh kale u, ma ri ka tara sing i aragii, “Nangis mang ok fas kemem le o seh? Male o Mesaia, ke ok fas fatus kemem.”

25 Iesu ka kiliis ri aragii, “Ia ka fas ta gam, isau le biil gam unune. Foron rakrakai na foim ae ia tel u ini asa Tata, i finngas gam le iau e seh tom. 26 Isau le biil gam unune, wara le biil gam foron sipsip kiak. 27 Foron sipsip kiak ri ongen failiim kineng, ma ia usum lo ri, ke ri mi lo iau. 28 Ke ia ta liu fitliu sing ri, ma biil rin met. Ma biil tikas in dat ufu ri tina limang. 29 Ma Tata ae ka ta ta ri usuf iau, i laumet kanaka lo ri tikii. Ma biil tikas i fasih in dat ufu ri tina lima Tata. 30 Ma itikii sau lo kama e Tata.”

31 Ke foron famfamu ken fan Iudaia ri ka sik fat sabin una luu u. 32 Isau le Iesu ka tara sing ri aragii, “Ia ka finngas ta gam ini ifuun e piran rakrakai na fakileng sing Tata. Na matngan fakileng arafah, ia tel ta u ke gam ka ier isi luuluu iau?”

33 Foron famfamu ken fan Iudaia ri ka kiliis u aragii, “Biil kemem luu wo isi foron rakrakai na fakileng o fatapiek u. Biil. Isau le kemem luu wo isi foron orek laulau ae o use u, ma wara le o, kaltu foes sau, ma o ka tara le o God.”

34 Iesu ka kiliis ri aragii, “Ri siit ta u na Buk na Gogoh, ae God i tara tah le, ‘Gam foron god.’

Buk Song 82:6

35 Fanu ae orek ke God i la ugapiek usuf ri, God i foteng ta ri ini foron god. Ma biil i fasih tikas in sokiliis foron sun orek ae na Buk na Gogoh. 36 Male i arae, ke arafah lo ier ae Tata ka fakalkaluu ta u, ma ka wuun ufu tah uga na piklinbat. Isi sah bin gam ka tiu iau le ia orek laulau, i wara le ia tara tah le ia Kalalik ke God? 37 Male biil ia tel foron foim la ke Tata, ke gong gam unune lo iau. 38 Isau le igii, ia tel foim tom kia, ma biil gam unune lo iau. Gamen unune, wara na foron rakrakai na foim ia tel u. Isi gamek usum ma gamek malal le Tata i patep lo iau, ma ia patep lo Tata.” 39 Ke ri ka totof sabin isi luse u, isau le ka fin tina limri.

40 Ke namih ka sopaket dan na Ioridan sabin una falifuh ae pakanini Jon i baptais fanu la wah, ke ka melmel aiwa. 41 Ma fanu fuun ri ka la usuf i. Ma ri ka orek tom ini ri aragii, “Taftawa le Jon biil i fatapiek ti rakrakai na fakileng, isau le foron tier tikii ae Jon i use ta u ulo kaltu igii, ka tekentu.” 42 Ke fanu fuun ri ka unune lo, na falifuh ae.

Copyright information for `TGG