John 12

Maria i To Sanda na iun Keke Iesu

(Mt 26:6�13; Mk 14:3�9)

Iwon e biing famu na tel inen na Liuliu Kulef ken fan Iudaia, Iesu ka tapiek na Beteni na maleh ke Lasarus, ier ae Iesu i fapti fafis ta u tina minet. Na efef ri ka tel inen una fot rokap usuf Iesu. Mata ka sosok, ma Lasarus tinawii na fatpoton fanu ae ri kiis tah tura kawil luuf una ien. Ke Maria ka kep neng e tigan lita na sanda furung ae ri foteng u ini nat. I fen kanaka e mata, ma ka to u na iun keke Iesu, ke ka salis u ini olo. Ma sanan rokap na sanda ae ka kuruung tikii palgan fel ae.

Isau le Iudas Iskariot i e neng lon berberat na fafausum kia, ae namih in ta ufu Iesu una liman foron tuui, ka tarah, “Isi sanih biil o sufe sanda igii ini i tuul e mar,
12.5Pitkalang kiri, ri foteng u ini dinari, I tuul mar e dinari kiri i aragii fifiil ken nenge kaltu tina nenge bet.
isi ok ta u usuf foron lauu.”
Biil i use u aragii, wara le i lala wol lon foron lauu. Biil. Isau le, i use u arae, wara le i e nenge tom sisii. I parpar la na pitkalang kiri, ke ka suksukuum la na pitkalang ae.

Pesu Iesu ka kiliis u aragii, “Sok ufu arae, isi ik fageges iau una biingen ilile kiak. Foron lauu rin kiis fitliu tura gam, isau le iau, biil ian kiis fitliu tura gam.”

Aunbiing tara gur na fanu tina Iudaia ri ka usum tah le Iesu tinaiwa, ke ri ka la, biil wara sau lo Iesu ae, ke ri ka la. Biil. Ri la sabin isi par Lasarus ae Iesu i faptih fafis ta u tina minet. 10 Ma foron famfamu ken foron pris ri ka put orek isi siimete Lasarus sabin, 11 wara sau lo Lasarus, ke ka fuun e fan Iudaia ri ka la usuf Iesu ke ri ka luun unune lo.

Iesu i Kau na Ierusalem arae King

(Mt 21:1�11; Mk 11:1�11; Lk 19:28�40)

12 Na biing namih, gur na fanu ae ri la tah isi tel inen na Liuliu Kulef, ri ka ongen ta u le Iesu ae mang na sal uga na Ierusalem. 13 Ri ka kep foron akan au ma ri ka la isi tafe Iesu ma ri ka kukuk aragii,

“Osana!
Fafakalok sing God, usuf seh ae i la uga ini asa Kumguui.
Buk Song 118:25-26

God in fakalok king tina Israel.”
14 Iesu ka imtafe neng e dongki ae biil biitom tikas i kiis lo, ma ka kiis na olo arae Buk na Gogoh i use ta u,

15 “Gong gam sokeh, foron keleflik tina Saion.
Gam par, king kimi apiek mang,
ka kiis na nenge dongki ae biil biitom tikas i kiis ta lo.”
Sekaraia 9:9

16 Na famu, berberat na fafausum kia biil ri malal tah na foron tier tikii igii. Isau le na aunbiing Iesu i aptih fis tina minet, ma ka kep memeh kia tah, ke ri ka malal mang le foron tier igii, Buk na Gogoh i use ta u ulo, ma igii ri ka tel ta u ulo.

17 Ma gur na fanu tinaiwa na aisa, na aunbiing i kam fasuuh ta Lasarus tina matanfat una luun minet, ma ka faptih pes u tina minet, ri ka famam kep sararah orek. 18 Pesu gur na fanu ae ri ka la isi tafe u, wara le ri ka ongen ta u le, ka fatapiek ta rakrakai na fakileng igii. 19 Ke foron Farasi ri ka fas fafis temtem tikii lo ri le, “Gam par u, biil biitom kere tel fasuut ti tier. Gam par u, fanu tikii ri ka mih mang lo.”

Fale Grik ri Ier isi Par Iesu

20 Fal e fanu tina Grik tinaiwa na fatpoton fanu ae ri la tah isi lotu na tel inen na Liuliu Kulef na Ierusalem. 21 Ri ka la usuf Pilip, kaltu tina Betsaida, na sun falifuh na Galili, ma ri ka tarah, “Ier, kemem ier isi par Iesu.” 22 Pilip ka la isi fas Enru, ke ru turim ru ka la isi fas Iesu.

23 Iesu ka kiliis ruh aragii, “Aunbiing igii mang ka tapiek, isi Kalalik ken Kaltu ik kep memeh kia. 24 Tekentu kanaka ia fas kamuh, le nenge kutun wit biil i luut una nanal ma ka mang, ke in tapiek in tikii sau e kutun wit. Isau le, male in luut una nanal ma ka mang, ke in kuum, ma in fatapiek in fuun e kutun wit. 25 Ma kaltu ae i ier kanaka tom isi liu kia, liu ae in mangmangal koseng u. Isau le kaltu ae i ememse liu kia aga na piklinbat, in guun u una liu fitliu. 26 Seh sau ae i ier la isi tel foim kiak, in mi lo iau, isi falifuh ae ian la ulo, i sabin in la ulo. Tata in fakalok seh ae i ier la isi tel foim kiak.”

Iesu i Ororek isi Minet kia

27 “Igii balang ka tatawin, ma sanih ian use u? ‘Tata, faliu iau koseng kiptin aunbiing na tatawin igii.’ Biil. I wara ia ka la uga, isi ian la na palga e kiptin aunbiing na tatawin igii. 28 Tata, on me asam!”

Ke neng e orek ka puh tina kukulii, ka tarah, “Ia ka me ta asang ma ian me u sabin.”
29 Ke gur na fanu ae ri tih tah aiwa, ri ka ongen u ma ri ka tara le i pah tah, ma fal ri ka tara le neng e angelo i orek tah usuf i. 30 Iesu ka kiliis ri ma ka tarah, “Orek igii una rokap kimi, biil kiak. 31 Igii mang e aunbiing God in nagogon fanu tikii na piklinbat, ma igii in fes ufu Satan, laulaumet tinaga na piklinbat. 32 Isau le, aunbiing ri ka fafen ta iau tina nanal, ian dat fanu tikii usuf iau.” 33 Ka use u aragii una finngas matngan minet, ae in met arae.

34 Ma gur na fanu ae ri ka kiliis u le, “Kemem ka ongen ta u na Nagogon le Mesaia in kiis fitliu, ke arafah bin o ka tara le, Kalalik ken Kaltu rin fafen ta u tom? Seh tom, i e Kalalik ken Kaltu igii?”

35 Ke Iesu ka fas ri aragii, “Gamen kep u e malal ae fatuklin aunbiing sau. Gam la, aunbiing i mel biitom e malal isi kubunor gong i afit gam. Ma kaltu ae i la na kubunor, biil i usum na falifuh i la ulo. 36 Luun unune kimi na malal na aunbiing gam kep u, isi gamen tapiek arae foron kalalik tina malal.” Aunbiing ka farfarop na orek, Iesu ka la ma ka mumun lo ri.

Foron Famfamu ken Fan Iudaia biil ri Unune

37 Taftawa le, Iesu ka tel ta ifuun e rakrakai na fakileng tah na matri, isau le biil tom ri unune lo. 38 Foron tier igii una fatekentu orek ae poropet Aisaia i siit ta u le,

“Kumguui, biil tikas i unune biitom na orek kimem,
ke biil tikas i kep ti malal biitom na rakrakai kiam.”
Aisaia 53:1

39 Pesu, biil i fasih rin unune, wara le poropet Aisaia i use u sabin le,

40 “God ka fakut ta matri,
ke ka fasorokai ta balri,
isi biil i fasih rin par failiim ini matri,
le biil rin ililiim ini balri,
isi rik fis usuf iau ma iak faliu pes ri.”
Aisaia 6:10

41 Aisaia i use ta u igii, wara le ka par ta memeh ke Iesu, ke ka ororek lo Iesu.

42 I tekentu le, i fuun lon foron famfamu sabin ri ka unune tah lo Iesu. Isau le ri soke foron Farasi ke biil ri fapos unune kiri, tara ma ri ka ti kale ri isi gong ri lotu na felun lotu. 43 Wara le ri ier kanaka tom isi fanu rin usefages ri, ma biil ri ier kanaka isi ususefages tinbae sing God.

44 Ke Iesu ka perek ma ka tara aragii, “Aunbiing neng e kaltu i unune lo iau, biil i unune sau lo iau. Isau le i unune sabin lo ier ae i wuun ta iau uga. 45 Aunbiing i par iau, i par ier sabin ae i wuun ta iau uga. 46 Ia la tah uga na piklinbat arae malal, isi fanu tikii ae ri unune lo iau biil rin kiis kiniis na kubunor.

47 Male tikas i ongen orek kiak, ma biil i kep papte u, biil ian to nagogon u. Wara le biil ia la tah isi nagogon fanu na piklinbat. Biil. Isau le ia la isi faliu pes ri. 48 Fanseh ae biil ri somangat pes iau, ke biil ri somangat pes orek kiak, i mel e kaltu in nagogon ri. Foron orek ae ia use ta u in nagogon ri na farfarop na biing. 49 Wara le, biil ia orek ini wolwol kiak tom. Biil. Isau le Tata tom i wuun ta iau, ke ka fas farakrakai ta iau ini sanih ian use u ke arafah ian use u arae. 50 Ia usum le orek ke Tata in ta liu fitliu. Ma sanih ia use u, Tata tom i fas ta iau isi ian use u.”

Copyright information for `TGG