John 14

Iesu tom i e Sal usuf Tata

Iesu ka fas berberat na fafausum kia aragii, “Balmi gong i purngis. Unune lo God ke unune sabin lo iau. Ifuun e mua na fel ke Tata, ma ian la isi fageges ti salmi. Male biil i tekentu, ke biil ian fas ta gam ini foron tier igii. Ke, male ian la isi fageges ti salmi, namih ian fis sabin ke iak telpes gam una aisang. Isi gam sabin, gamek kiis turang na falifuh ia kiis la wah. Ma gam usum na sal una falifuh ae ian la ulo.”

Tomas ka tara sing i aragii, “Kumguui, biil kemem usum na falifuh ae on la ulo. Ke arafah kemek usum arae na sal?”

Iesu ka kiliis u aragii, “Iau tom e sal, iau tom e tekentu, ke iau tom e liu. Biil tikas in la usuf Tata na nenge sal keskes. Biil. Lo iau sau. Male gam ka usum tah lo iau, gamen usum sabin lo Tata. Tipesu igii, gam ka usum ta lo, ke gam ka par ta u.”

Pilip ka tara sing i aragii, “Kumguui, finngas kemem ini Tamam, i sau e tier kemem ier isi.”

Iesu ka kiliis u aragii, “Pilip, ia ka kiis dolo tah tura gam, ma biil biitom o usum lo iau? Seh i par ta iau, ka par ta Tata. Ke arafah bin, o ka tara le, ‘Finngas kemem ini Tamam’? 10 Biil o unune le ia patep lo Tata ke Tata i patep lo iau? Foron orek ia fas ta gam ini, biil i tapiek na wolwol kiak tom. Biil. Isau le, Tata tom ae i patep lo iau, i tel foron foim kia. 11 Unune lo iau, aunbiing ia tara le, ia patep lo Tata ma Tata i patep lo iau. Male biil gam unune na orek kiak, ke gamek unune sau, wara na foron rakrakai na fakileng ia fatapiek ta u. 12 Tekentu kanaka, ia fas gam, seh i unune lo iau, in tel foron foim sabin arae ia tel u la. Ke in tel foron foim, in laumet na foron foim ia tel ta u, wara le ian la usuf Tata. 13 Ma ian tel foron sanih gam sising u na asang, isi Kalalik ik ta memeh sing Tama. 14 Male gam sising iau isi ti tier na asang, ke ian tel u.

Iesu i Use u le in Wuun ufu Tanwa Kalkaluu

15 “Male gam ier kanaka isi iau, ke gamen misuut na foron nagogon kiak. 16 Ian sising Tata, ke ik ta nenge Tom Falupes sabin usuf gam ma in kiis fitliu tura gam. 17 I e Tanwan Tekentu. Ma fanu na piklinbat biil i fasih rin kep u, wara le biil ri par u ke biil ri usum lo. Isau le gam usum lo, wara le i kiis la tura gam ma in susuef ulo gam. 18 Biil ian to fin koseng gam arae foron natun sih. Biil. Ian fis sabin usuf gam. 19 Biil sau in sawin, ke fanu na piklinbat biil mang rin par iau. Isau le gamen par iau. Wara le ia liu ke gam sabin gamen liu. 20 Na biing ae, gamen usum le ia patep lo Tata, ke gam patep lo iau, ke ia patep lo gam. 21 Seh i somangat pes nagogon kiak ma ka mi lo, i sau i ier kanaka isi iau. Tata in ier kanaka isi seh i ier kanaka isi iau, ke iau sabin ian ier kanaka isi ma ian finngas iau tom usuf i.”

22 Namih Iudas (biil e Iudas Iskariot) ka tarah aragii, “Isau le, Kumguui, isi sah o ka ier isi finngas o sau usuf kemem ma biil usuf fanu tikii na piklinbat?”

23 Iesu ka kiliis u aragii, “Male seh i ier kanaka isi iau, in misuut na foron fafausum kiak. Tata in ier kanaka isi, ma kaman la usuf i ke kamak mel tura. 24 Seh ae biil i ier kanaka isi iau, biil in misuut na foron fafausum kiak. Foron orek igii gam ongen u, biil e foron orek kiak tom. Biil. Foron orek ke Tata tom, ae i wuun ta iau.

25 “Foron tier igii, ia ka fas ta gam ini aunbiing ia kiis biitom tura gam. 26 Isau le Tom Falupes, i e Tanwa Kalkaluu ae Tata in wuun ufu uga na asang, in fausum gam ini foron tier tikii. Ke ik fapitil wolwol kimi ini foron tier tikii ae ia fas ta gam ini. 27 Ia ta ufu siaroh usuf gam. Ma i e siaroh kiak tom ia ta u usuf gam. Biil ia ta u arae fanu na piklinbat ri ta u la. Balmi gong i purngis, ke gong gam sokeh.

28 “Gam ongen ta iau, ia tara tah le, ‘Ian la koseng gam ma namih, ian fis sabin usuf gam. Male gam ka ier kanaka tah isi iau, ke gamek laes le ia la usuf Tata, wara le i laumet kanaka lo iau. 29 Ia ka fas ta gam igii, aunbiing foron tier biil biitom i tapiek, isi aunbiing foron tier in tapiek, ke gamek unune. 30 Biil ian orek dolo tura gam, wara le laulaumet tinaga na piklinbat, apiek mang. Biil ti rakrakai kia una nagogon iau, 31 isau le, ia tel fasuut foron sanih ae Tata i fas ta iau le ian tel u, isi fanu tikii na piklinbat rik usum le ia ier kanaka isi Tata.

“Gam aptih, ma kerek la.

Copyright information for `TGG