John 16

“Ia ka fas ta gam ini foron tier igii, isi unune kimi gong in luut. Rin gogoh ufu gam tina felun lotu. Ke nenge aunbiing in tapiek ae fan seh ri siimete gam rin wol le ri tel foim ke God. Rin tel foron matngan tier arae, wara le biil ri usum tah lo kama e Tata. Isau le ia ka fas ta gam ini foron tier igii, isi aunbiing foron tier ae in tapiek, ke gamek wol pes u le ia ka fas ta gam. Biil ia fas ta gam pakanini, wara le ia kiis tah tura gam.

Foim ken Tanwa Kalkaluu

“Isau le igii, iak la mang usuf seh ae i wuun ta iau, ma biil tikas lo gam i diik iau le, ‘On la uwah?’ Balmi ka fuun ini mamais, wara le ia fas gam ini foron tier igii. Isau le, tekentu kanaka, ia fas gam, rokap kimi le ian la koseng gam. Wara le male biil ian la, ke Tom Fafalupes biil in la usuf gam. Isau male ian la ke ian wuun ufu usuf gam. Ke, aunbiing in tapiek, in famalal fanu na piklinbat le ri sir kunan sinang laulau, ke biil ri iliim tortores na sinang ke nagogon ke God. In famalal sinang laulau kiri sabin, wara le biil ri unune lo iau. 10 Ke in famalal ri ini tortores na sinang wara le ian la usuf Tata ke biil sabin gamen par iau. 11 Ke in famalal ri sabin ini nagogon ke God, wara le laulaumet tinaga na piklinbat ka fiu tah na nagogon ke God.

12 “I fuun biitom e tier ian fas gam ini, isau le biil biitom i fasih gamen kep ri igii. 13 Isau le, aunbiing Tanwan Tekentu in tapiek, ke in famalal gam ini foron tier tikii i tekentu lo God. Biil in orek ini wolwol kia tom. Biil. In use sanih sau i ongen u, ma ik fas gam ini foron sanih in tapiek namih. 14 Ke ik ta memeh sing iau, wara le in kep foron orek kiak ma ik fas gam ini. 15 Foron tier tikii ke Tata, kiak, pesu ia ka tara le, Tanwa Kalkaluu in kep foron orek kiak ke ik fas gam ini.

Mamais ken Foron Berberat na Fafausum in Sokiliis una Laes

16 “Biil in sawin, ke biil mang gamen par iau, ke namih, biil sau in sawin ke gamek par iau sabin.”

17 Fale berberat na fafausum kia ri ka fadiik fis tom ini ri aragii, “Sanih e kamtinan iun orek ae i fas kerer ini le, ‘Biil in sawin ke biil mang gamen par iau ke biil sau in sawin ke gamek par iau sabin’ ke ka tara sabin le, ‘Wara le ia la usuf Tata’?” 18 Ke ri ka famam diik biitom le, “Sanih tom e kamtinan orek kia ae i tara le, ‘biil in sawin?’ Biil kere malal na sanih i use u.”

19 Iesu ka usum tah le rin diik u isi sanih i use ta u, pesu ka tara sing ri aragii, “Awii gam famam fadiik faliu na fatpoto gam tom isi kamtinan orek ae ia use ta u le, ‘Biil in sawin ke biil mang gamen par iau, ke biil sau in sawin ke gamek par iau sabin’? 20 Tekentu kanaka ia fas gam, gamen teng ke gamek mamais, isau le fanu na piklinbat rin laes. Gamen mamais, isau le mamais kimi in sokiliis una laes. 21 Aunbiing nenge fifin fatat isi in fafang, ka mamais mang wara le aunbiing kia ka tapiek. Isau le aunbiing kalalik kia i pang, ka wol ufu mang e fangungut ae i kalsakai ta u. Ka laes mang, wara le nenge kalalik ka pang tah una piklinbat. 22 Ke i fasih sau ini gam, igii e aunbiing kimi una mamais, isau le namih ian par gam sabin, ke gamek laes ma biil tikas in tel ufu e laes ae sing gam. 23 Ke na biing ae, biil mang gamen diik iau isi ti tier. Tekentu kanaka, ia fas gam, sanih gam sising Tata isi na asang, ke in ta u usuf gam. 24 Ka papang igii, biil tom gam sising ti tier na asang. Sising, ke gamek kep u, isi laes kimi ik kuruung tikii gam.

25 “Ia orek fatoftof la usuf gam. Isau le nenge aunbiing in tapiek ae biil mang ian orek fatoftof. Biil. Isau le ian famalal gam tom ini Tata. 26 Aunbiing, biing ae in tapiek, ke gamek sising Tata ini asang. Biil ia tara le ian sising Tata le in lupes gam. Biil. 27 Wara le Tata tom i ier kanaka isi gam. I ier kanaka isi gam wara le, gam ier kanaka isi iau, ke gam ka unune le, ia la tinbae sing i. 28 Ia la tah tinbae sing Tata uga na piklinbat. Ma igii, iak la koseng piklinbat mang ma iak fis ubae usuf i.”

29 Foron berberat na fafausum ri ka tarah aragii, “Igii biil mang o orek fatoftof, o ka fafamalal mang. 30 Kemem ka usum mang le, o usum na foron tier tikii ma biil o nene isi tikas in diik o. Pesu kemem ka unune le o la tom tinbae sing God.”

31 Iesu ka kiliis ri aragii, “Igii sau gam ka unune mang? 32 Isau le nenge aunbiing in tapiek ma igii mang ka tapiek, aunbiing gamen fin sararah una foron maleh temtem tikii kimi, koseng iau keskes mang agawa. Isau le, biil e iau keskes agawa. Biil. Wara le Tata igii tom turang.

33 “Ia ka fas ta gam ini foron tier igii, isi aunbiing gam patep lo iau, ke ik mel e siaroh sing gam. Aga na piklinbat, gamen kep tatawin. Isau le gamen tifat! Wara le ia ka farop ta rakrakai ken piklinbat.”

Copyright information for `TGG