John 17

Iesu i Sising isi i tom

Namih Iesu ka use ta u arae, ka par ubase na kukulii, ma ka tara aragii:

“Tata, aunbiing kiak ka tapiek mang. Me kem Kalalik, isi kem Kalalik ik me o.
Wara le o ka ta rakrakai una nagogon tah usuf i na olon fanu tikii, isi ik ta liu fitliu sing fanu tikii ae o ka ta ta u usuf i. Liu fitliu i aragii, le fanu rin usum lo wo i tikii sau e God tekentu ke Iesu Karisito ae o wuun ufu tah uga. Ia ka finngas ta memeh kiam aga na piklinbat na aunbiing ia farop foron foim ae o ta ta u usuf iau isi ian tel u. Tata, igii on me iau, isi iak kiis turam sabin, ini memeh ae pakanini imel ta sing iau, aunbiing biil biitom o fakiis ta piklinbat.

Iesu i Sising isi foron Berberat na Fafausum kia

“Ia ka famalal ta asam usuf fanu ae o ta ufu ta ri usuf iau tina piklinbat. Ri kiam tom ma o ka ta ufu ta ri usuf iau, ma ri ka misuut tah na foron orek kiam. Igii ri ka usum mang le, foron tier tikii o ta ta u usuf iau, i la tom tinawii sing o. Wara le foron orek ae o ta ta u usuf iau, ia ka ta ta u usuf ri ma ri ka somangat pes ri. Ri ka usum le i tekentu le ia la tah tinbae sing wo, ma ri ka unune tah le wo tom o wuun ufu ta iau. Ia sising isi ri, ma biil isi fanu tikii na piklinbat. Biil. Isau le ia sising sau isi fanu ae o ta ta ri usuf iau, wara le ri kiam tom. 10 Fanu tikii kiak, kiam, ma fanu tikii kiam, kiak. Ma ia ka kep memeh sing ri. 11 Igii, iak la mang usuf wo, biil in sawin lo iau aga na piklinbat, isau le ri kiis biitom na piklinbat. Tata, o kalkaluu, fofonoi lo ri ini rakrakai ae na asam ae o foteng ta iau ini, isi rik tapiek itikii arae kara tikii sau. 12 Aunbiing ia kiis tah tura ri, ia parpar lo ri ma ia ka ubiif kale ri ini as ae o foteng ta iau ini. Biil tikas lo ri i mangmangal, isau le, itikii sau i mangmangal, i e Iudas tom fiu fitliu, isi ik fasuut orek ae na Buk na Gogoh.

13 “Igii iak la mang usuf wo, isau le ia use foron orek igii, aunbiing ia kiis biitom aga na piklinbat, isi laes kiak ik kuruung tikii ri. 14 Ia ka ta foron orek kiam tah usuf ri, ma fanu na piklinbat ri ka ememse ta ri. Wara le, biil mang ri tinaga na piklinbat. Arae iau sabin biil tinaga na piklinbat. 15 Biil ia sising le on kep ufu ri tinaga na piklinbat. Biil. Isau le ia sising isi on fofonoi lo ri koseng kaltu laulau. 16 Biil ri tinaga na piklinbat, arae iau sabin biil tinaga na piklinbat. 17 Fakalkaluu ri ini tekentu, ma orek kiam i tekentu kanaka. 18 Arae o wuun ufu ta iau uga na piklinbat, ke ia ka wuun ufu ta ri una marmarsan maleh na piklinbat. 19 I wara lo ri, ia ka famam fakalkaluu iau tom, isi ri sabin rik kalkaluu tekentu.

Iesu i Sising isi foron Tom Unune tikii

20 “Biil ia sising isi ri keskes sau. Biil. Ia sising sabin isi fanu ae rin unune lo iau, wara na orek ken berberat na fafausum kiak. 21 Ia sising isi ik tikii sau lo ri tikii. Tata, arae o patep lo iau, ma ia patep lo wo, isi ri sabin rik patep lo karah, isi fanu tikii na piklinbat rik unune le o wuun ta iau. 22 Ia ka ta ta u usuf ri e memeh ae o ta ta u usuf iau, isi rik tapiek itikii arae kara i tikii sau. 23 Ia patep lo ri ma wo patep lo iau, isi rik tapiek tutus arae itikii sau, isi fanu na piklinbat rik usum le, o wuun ta iau, ma o ka ier kanaka isi ri, arae o ier kanaka sabin isi iau.

24 “Tata, ia ier isi fanu ae o ta ta ri usuf iau, isi rin kiis turang na falifuh ae ia kiis wah, ma isi rik par memeh kiak. I e memeh ae o ta ta u usuf iau, wara le o ier kanaka isi iau aunbiing biil biitom o fakiis ta piklinbat.

25 “Tata, o tom tortores, taftawa le fanu na piklinbat biil ri usum lo wo, isau le ia usum lo wo ma fanu igii ri usum le wo tom o wuun ufu ta iau uga. 26 Ia ka famalal ta wo usuf ri ma ian famam famalal wo biitom, isi famais kiam usuf iau ik kiis lo ri, isi iau tom iak patep lo ri.”

Copyright information for `TGG