John 18

Iudas i Ta ufu Iesu na Liman foron Tuui

(Mt 26:47�56; Mk 14:43�50; Lk 22:47�53)

Aunbiing Iesu ka farfarop na sising, i turan berberat na fafausum kia ri ka aptih koseng falifuh ae, ke ri ka sopaket palgan dan na Kidron. Na nenge baba imel e nenge porpor olif ma Iesu turan berberat na fafausum kia ri ka kau una wii na palga.

Iudas, ier ae in ta ufu Iesu na liman tuui, ka usum tah na falifuh ae, wara le i fuun e aunbiing Iesu turan berberat na fafausum kia ri la turim la unaiwa. Pesu Iudas ka lame foron tom fapaket ke fal e tom parpar kale Felun Sising ae foron famfamu ken foron pris ke foron Farasi ri wuun ta ri ma ri ka la una porpor olif. Ri kep foron lam ke foron tier una bul ke foron tier una fapaket.

Iesu ka usum tah na foron tier tikii ae le in tapiek lo, pesu ka la ma ka diik ri aragii, “Gam im isi seh?”

Ri ka kiliis u le, “Iesu tina Nasaret.”

Ke Iesu ka fas ri aragii, “Iau sau igii.” Iudas, ier ae in ta ufu Iesu una liman tuui, tinawii sabin i tih la tura ri.
Aunbiing Iesu ka fas ri le, “Iau sau igii,” ri ka su fis ma ri ka luut una nanal.

Iesu ka diik pes ri tala le, “Gam im isi seh?”

Ri ka kiliis u sabin le, “Iesu tina Nasaret.”

Iesu ka kiliis ri aragii, “Ia ka fas ta gam le iau sau igii, male gam famam na im isi iau ke gamen sokufu fanu igii rik la.” Tier igii i tapiek isi foron orek ae Iesu i use ta u ik suut: “Biil tom tikas i mangmangal lon fanseh ae o ka ta ta ri usuf iau.”

10 Ke Saimon Pita ae imel e popok una fapaket sing i, ka fut ufu ma ka ting ufu nenge balbalu Malkus na mia. Malkus i nenge fafauun ken famfamu ken foron pris.

11 Iesu ka fas Pita le, “Siing fafis popok kiam na poko! Arafah, biil mang ian yin tina kap
18.11Kap i fakileng na fangungut ae Iesu in kalsakai u na aupaket.
ae Tata i ta ta u usuf iau?”

Ri Lame Iesu usuf Anas

12 Namih foron tom fapaket turan famfamu kiri ke foron tom parpar kale Felun Sising ken fan Iudaia ri ka pose lo Iesu ma ri ka kabet u. 13 Ma ri ka lame famu Iesu usuf Anas i e ena Kaiapas. Kaiapas i famfamu ken foron pris lo e bet ae. 14 Kaiapas sau i ta orek an fafanau tah sing fan Iudaia le in rokap male in tikii sau e kaltu in met isi fanu tikii.

Pita i Fakawe ufu Iesu

(Mt 26:69�70; Mk 14:66�68; Lk 22:55�57)

15 Saimon Pita ke nenge kalalik na fafausum ru mimih la lo Iesu. Wara le famfamu ken foron pris i usum lo e kalalik na fafausum ae, pesu ka kau tura Iesu una palgan ubiif kale falifuh ken pris ae. 16 Isau le Pita i nene sau awii na baban matan ubiif. Ke kalalik na fafausum ae famfamu ken foron pris i usum lo, ka fis sabin ma ka fas tah ae i parpar na matan ubiif lo e wor ae, ke ka lame fakau Pita.

17 Tah ae i parpar na matan ubiif ka tara aragii, “Wo sabin neng lon berberat na fafausum kia, beh?”

Pita ka kiliis u le, “Ia biil.”

18 Ma foron fafauun ke foron tom parpar kale Felun Sising, ri tikii ri ti kawil ta yiif ae ri map ta u una mingmingih, wara le falifuh i mir. Ma Pita sabin i tih aiwa ma ka mingmingih la tura ri.

Anas i Diik ikis Iesu

(Mt 26:59�66; Mk 14:55�64; Lk 22:66�71)

19 Ke famfamu ken foron pris ka diik ikis Iesu isi berberat na fafausum kia ke isi foron fafausum ae i fausum ta fanu ini.

20 Iesu ka kiliis u aragii, “Ia ka orek malal tah usuf fanu tikii, ke ia tel fafausum la tom na foron felun lotu ke na Felun Sising ae fan Iudaia ri la turim la wah. Biil ia use fakum ta ti tier. 21 Isi sanih o ka diik iau? Diik fanu ae ri ongen ta sanih ia fas ta ri ini. Ri usum na sanih ia use ta u.”

22 Aunbiing Iesu i use u arae, nenge tom parpar kale Felun Sising tinaiwa, ka pose Iesu na posong na mata. Ka tara sing Iesu aragii, “Isi sanih o ka kiliis orek ken famfamu ken foron pris ini matngan orek arae?”

23 Iesu ka kiliis u aragii, “Male ia use tier biil i tortores, on famalal u le tier ia use u biil i tortores. Isau male ia ka orek tekentu tah, isi sanih o ka pose iau?” 24 Biil biitom ri puk ufu kamkabet lo, ke Anas ka wuun u usuf Kaiapas ae i famfamu ken foron pris.

Pita ka Fakawe ufu Iesu sabin

(Mt 26:71�75; Mk 14:69�72; Lk 22:58�62)

25 Saimon Pita tinaiwa biitom i mingmingih la ke ri ka tara sing i le, “Wo sabin neng lon berberat na fafausum kia, beh?”

Ka fakawe ma ka tarah le, “Ia biil.”

26 Nenge fafauun ken famfamu ken foron pris ma i sikinting lon kaltu ae Pita i ting ufu ta balbalu ini popok, ka diik u le, “Awii ngan ia par ta wo sabin tura Iesu na porpor olif?”

27 Pita ka fakawe ufu sabin le, “Ia biil.” Ke fanpil nenge to ka teng.

Ri Lame Iesu usuf Pailat

(Mt 27:1�2, 11�14; Mk 15:1�5; Lk 23:1�5)

28 Namih foron famfamu ken fan Iudaia ri ka lame Iesu tinaiwa sing Kaiapas usuf Pailat nenge laulaumet tina gapman na Rom. Ka biingbiing mang, ke fan Iudaia ri ka ier isi ien na inen na Liuliu Kulef, pesu biil mang ri kau una palgan tara fel ke Pailat. Wara le nagogon kiri i tikale u le, gong ri kau na fel ken kaltu ae biil tina Iudaia. 29 Pesu Pailat ka suuh usuf foron famfamu ken fan Iudaia ma ka diik ri aragii, “Matngan sanih gam tiu kaltu igii ini le i tel fager u?”

30 Ri ka kiliis u aragii, “Male biil i tom tel sinang laulau ke biil i fasih kemen filange u usuf wo.”

31 Pailat ka tarah, “Gam tom gamek telpes u ke gamek nagogon u namin nagogon kimi tom.”

Ri ka kiliis u aragii, “Isau le nagogon kimi fan Rom, i ti kale kemem isi gong keme siimete tikas.”
32 Iesu i orek famu tah isi matngan minet kia. Ma tier igii ka tapiek una fasuut foron orek ae i use ta u.

33 Pailat ka kau fis una fel kia, ka kam pes Iesu ma ka diik u le, “O king ken fan Iudaia?”

34 Iesu ka kiliis u aragii, “Fagalte ae kiam tom, le tifal awii ri fas o ini iau?”

35 Pailat ka kiliis u aragii, “Ia biil e sikin Iudaia. Fanu kiam tom ke foron laulaumet na pris kiam tom ri ta ufu ta wo usuf iau. Sanih o tel ta u?”

36 Iesu ka tara aragii, “Matanfuntih kiak biil tinaga na piklinbat. Biil. Male matanfuntih kiak tinaga, ke foron tom foim kiak rin fapaket kaleh isi fan Iudaia gong ri luse iau. Isau le igii, matanfuntih kiak biil tinaga.”

37 Pailat ka tara, “O nenge king, beh?”

Iesu ka kiliis u aragii, “O orek tekentu le ia nenge king. Tekentu kanaka, wara ia pang ma ia ka la uga na piklinbat isi ian famalal u e orek tekentu. Fanu tikii ae ri mi na orek tekentu, ri wong la na kineng.”

38 Pailat ka diik u le, “Sanih e tekentu?” Aunbiing ka galte ta u, ka suuh fis sabin ma ka fas foron famfamu ken fan Iudaia le, “Biil ia im tafe ti tier i tel fager u, una tiu u. 39 Isau le na sinang ia tel ula usuf gam le na foron inen na Liuliu Kulef tikii, ia fasuuh nenge kaltu la tina kamkabet usuf gam. Arafah, gam ier le ian fasuuh ufu king ken fan Iudaia?”

40 Ri ka perek fis aragii, “Biil! I biil! Fasuuh Barabas usuf kemem.”

Barabas i nenge kaltu laulau kanaka.
18.40Fale tom tasum ri wol le Barabas i neng lon fanu ae ri fapaket la isi tel ufu gapman Rom tina Iudaia.


Copyright information for `TGG