John 19

Pailat i Somangat le rin Fakulkulik Iesu

(Mt 27:15�31; Mk 15:6�20; Lk 23:13�25)

Namih Pailat ka ta ufu Iesu usuf foron tom fapaket ke ri ka pis u. Foron tom fapaket ri ka tel nenge bangbang ini finau ae imel e si ma ri ka luun u na paklu. Ri ka fakilkiliis u ini nenge dolon kaen melmelek.
Bangbang ke kaen melmelek i fasih arae kilkiliis ken foron king.
Ke ri ka famam tatkau usuf i ma ri ka tara sing i le, “Ier, wo sau o king ken fan Iudaia!” Ke ri ka pose u na posong na mata. Pailat ka suuh fis sabin ke ka fas fan Iudaia aragii, “Gam par u, ian lame fasuuh u usuf gam isi gamek usum le biil ia tiu u, le i tel fager ti tier, isi iak nagogon u.” Aunbiing Iesu ka suuh ini bangbang ae ri tel ta u ini finau imel e si turan kaen melmelek, ke Pailat ka tara sing ri aragii, “Par u, igii mang e kaltu ae.” Ma aunbiing foron laulaumet na pris ke foron tom parpar kale Felun Sising ri par Iesu, ri ka perek aragii, “Fakulkulik u! Fakulkulik u na aupaket!”

Isau le Pailat ka kiliis ri aragii, “Gam tom gamek telpes u isi gamek fakulkulik u na aupaket. Biil ia tiu u le i tel fager ti tier, isi iak nagogon u.”

Fan Iudaia ri ka kiliis fafis u aragii, “Imel e nenge nagogon kimem, ae i use u le in met tom, wara le i tara le i e kalalik ke God tom.”

Pesu aunbiing Pailat ka ongen ta u arae, ka lala sokeh mang tom. Ke ka kau fis una fel. Ke ka diik Iesu aragii, “O la tingah?” Isau le Iesu biil i kiliis u. 10 Pailat ka tara sing i aragii, “Isi sah biil o kiliis iau? Arafah, biil o usum le imel e rakrakai kiak una puk ufu wo ke una fakulkulik wo?”

11 Iesu ka kiliis u aragii, “I mel sau e rakrakai kiam una nagogon iau, wara le God i ta u tinbae usuf wo. Isau le kaltu ae i ta ufu ta iau una limam, sinang laulau kia i laumet na sinang laulau kiam.”

12 Aunbiing Iesu ka use ta u arae, Pailat ka tof u le in puk ufu Iesu tina kamkabet, isau le fan Iudaia ri tongon tautau biitom le, “Male on puk ufu kaltu igii, ke biil o tala Sisar.
19.12Sisar i e laulaumet ken foron king tikii na piklin gapman na Rom.
Seh i tara le i tom e king, i tuui ke Sisar.”

13 Aunbiing Pailat i ongen u arae, ka fasuuh Iesu ke ka kiis na nian kiiskiis una nagogon na falifuh ae na orek Ibru, ri foteng le Gabata, kamtinan orek ae le falifuh ri tel u ini fat. 14 I e biing una geges isi tel inen na Liuliu Kulef. Ma na sangful ini u e aunbiing, Pailat ka tarah sing fan Iudaia aragii, “Igii e king kimi.”

15 Isau le ri ka tautau le, “Lame ufu! Lame ufu! Fakulkulik u na aupaket!”

Pailat ka diik ri aragii, “Gam ier le ian fakulkulik king kimi na aupaket?”

Foron laulaumet na pris ri ka kiliis Pailat aragii, “Biil ti king kimem, Sisar sau i e king kirer.”

16 Ke Pailat ka ta ufu Iesu mang usuf foron tom fapaket isi rik fakulkulik u na aupaket.

Ri Fakulkulik Iesu na Aupaket

(Mt 27:32�44; Mk 15:21�32; Lk 23:26�43)

Ke ri ka lame ufu Iesu.
17 Iesu ka kusep aupaket kia tom, ma ka la una falifuh ae na orek Ibru ri foteng u ini Golgota, ma kamtinan as ae le, salan tuan paklun kaltu. 18 Aiwa ri ka fakulkulik Iesu turan iu e kaltu na iun baba, ma Iesu na fatpoto ruh.

19 Pailat ka siit ta nenge sun orek ma ri ka kabet ta u na olon aupaket. Sun orek ae i tara aragii:

IESU TINA NASARET,

KING KEN FAN IUDAIA.

20 I fuun e fan Iudaia ri wes sisiit ae, wara le falifuh ae ri fakulkulik Iesu lo i fatat isi Ierusalem. Sisiit ae ri siit ta u ini orek Ibru, Latin ke Grik. 21 Foron laulaumet na pris ken fan Iudaia ri ka ta rakrakai na orek usuf Pailat le, “Gong o siit u le, ‘King ken fan Iudaia,’ isau le on siit u aragii, ‘Kaltu igii i tara le, i tom i King ken fan Iudaia.’”

22 Pailat ka kiliis ri aragii, “Sanih ia ka siit ta u, ia ka siit ta u.”

23 Aubiing foron tom fapaket ri ka fakulkulik ta Iesu, ri ka kep foron kaen ae i afit kale foron kilkiliis kia la ini, ke ri ka tem u una ifet. Neng usuf temtem tikii lo ri. Ke ri ka kep kaen sabin ae i fis u la. Kaen ae biil ti tungtungus lo, i dolo sikit sau.

24 Ke ri ka tara sing ri tom le, “Gong kere sisi u, kerek fangfang laki ini isi seh tom in kep u.”

Buk Song 22:18

Tier igii ka tapiek isi ik fasuut orek na Buk na Gogoh ae i use u le, “Ri tem foron kaen kiak na fatpoto ri, ke ri ka fangfang laki ini isi seh tom in kep kaen kiak.” Ke, tier ae foron tom fapaket ri ka tel u.

25 Tina Iesu ru la kisilik, Maria antu Klopas, ke Maria Makdalin rifet sotih tah awii fatat aupaket ke Iesu. 26 Aunbiing Iesu ka par tina turan kalalik na fafausum ae i ier kanaka la isi ru sotih fatat tah, ka tara sing tina aragii, “Tin ier, kem kalalik ae.” 27 Ke ka tara sing kalalik na fafausum ae aragii, “Tinam ae.” Tipesu lo e aunbiing ae, kalalik na fafausum ae ka lame pes u una fel kia.

Iesu i Met

(Mt 27:45�56; Mk 15:33�41; Lk 23:44�49)

28 Iesu ka usum tah le foron foim tikii ka rop mang, ke ka tara aragii, “Ia metdan.” I tara arae isi ik fasuut orek ae na Buk na Gogoh.
19.28Par Buk Song (Psalms) 22:15 ke 69:21
29 Nenge utut na dan i mel e wain mingin lo aiwa, pesu ri ka falum nenge tier ae i duup pes dan la, ke ri ka luun u na nenge akan au asa e isop, ke ri ka sik fatatkau u una ngusu Iesu. 30 Aunbiing Iesu ka yin tikii, ka tara aragii, “Ka rop.” Ke ka fapuh paklu ke ka sokufu liu kia.

31 Foron famfamu ken fan Iudaia ri ka diik Pailat isi rin bai foron keke tuul ier ae ri falkulkulik ta rituul isi rituul ek met sape, ma rik fapuh ufu rituul tina ituul e aupaket. Ri ka ier isi arae, wara le, i e biing una geges, ma biing namih, in tara na Biingen Mangeh. Pesu biil ri ier isi pununfo rituul in kulkulik na aupaket una Biingen Mangeh kiri. 32 Ke foron tom fapaket ri ka la ma ri ka bai foron keken iun kaltu ae ru kulkulik tah tura Iesu, ri bai famu keken neng, ke nami neng. 33 Isau le, aunbiing ri ka la usuf Iesu, ri ka par u aragii le, Iesu ka met tah, pesu biil mang ri bai iun keke. 34 Pesu nenge tom fapaket ka so Iesu awii na baba ini nenge lamruut, ma fanpil dah turan dan ka ring suuh. 35 Kaltu ae i par ta u, i famalal sanih i par ta u ma orek an fafamalal kia i tekentu. I usum le i orek tekentu ma ka famalal u, isi gam sabin gamek unune. 36 Foron tier igii ka tapiek, isi una fasuut orek na Buk na Gogoh le, “Biil rin bai ti tua.”

Buk Song 34:20

37 Ke arae nenge orek na Buk na Gogoh sabin i tara aragii, “Rin parpar usuf ier ae ri ka so ta u.”

Sekaraia 12:10

Ri Luun Pununfo Iesu na nenge Matan Fat Fuuh

(Mt 27:57�61; Mk 15:42�47; Lk 23:50�56)

38 Namih, Iosep tina Arimatea ka diik Pailat isi punufo Iesu. Iosep i nenge kalalik na fafausum ke Iesu, isau le i mi kum la sau lo, wara le i soke foron famfamu ken fan Iudaia. Pailat ka somangat ke Iosep ka la ma ka kep ufu pununfo Iesu. 39 Nikodimas ae na famu i la tah usuf Iesu na nenge wor, i sabin i la tura Iosep. Nikodimas i kep nenge tier ae ri tel u ini iu e tier ae i furung rokap e sana, ma ri foteng u ini mir ke aloi. Ma tatawin lo, i fasih aragii, i tuul e sangful e kilogrem. 40 Ru ka kep punufo Iesu, ma ru ka afit u ini foron rokap na kaen turan foron tier ae i furung, arae na matngan sal fan Iudaia ri mi la lo una fakilkiliis foron minet. 41 Na falifuh ae ri fakulkulik ta Iesu wah, i mel e nenge mok, ma awii na mok ae, i mel e nenge matanfat fuuh una luun foron minet, ae biil biitom ri luun ti minet ta lo. 42 Matan fat ae i fatat sau, pesu ru ka luun pununfo Iesu aiwa. Wara le i e biing una geges ken fan Iudaia una tara na Biingen Mangeh.

Copyright information for `TGG