John 21

Fale Berberat na Fafausum ri Par Iesu

Namih, Iesu ka tapiek sabin sing berberat na fafausum kia na dan kawil na Taiberias. Nenge asa sabin e dan kawil Galili. I tapiek aragii: Saimon Pita, ke Tomas nenge asa sabin e Didimas, ke Nataniel tina Kana na Galili, ke iun kalalik ke Sebedi turan iu e kalalik na fafausum sabin tinaiwa. Saimon Pita ka fas ri aragii, “Ian la isi ubiin.” Ke ri ka fas u le, “Kemen la turam.” Ke ri ka wof na mon ma ri ka la. Isau le na wor ae, biil ri kep ti kok.

Na biingbiing saksak, Iesu ka sotih na kiin, isau le berberat na fafausum, biil ri iliim u le i e Iesu.

Ke ka tautau usuf ri aragii, “Foron talang, gam kep ti kok sabin?”

Ri ka kiliis u le, “Biil.”

Ke Iesu ka fas ri aragii, “Gamen lin ubiin kimi una baban mon na mia gam, isi gamek kep ti fal.” Aunbiing ri tel u arae, ke biil mang i fasih rin dat fafis ubiin, wara le i fuun kanaka e kok.

Ke, kalalik na fafausum ae Iesu i ier kanaka isi, ka fas Saimon Pita le, “I sau e Kumguui!” Ma aunbiing Saimon Pita ka ongen u aragii le, “I sau e Kumguui,” ka kabet fafis kaen sabin ae i puk ufu tah aunbiing i lin ubiin, ke ka wof una dan. Fal e berberat na fafausum ri ka mih ini mon, ma ri ka date ubiin ae i fuun ini kok, wara le biil ri tapak una mas, i fasih sau aragii nenge mar e mita. Aunbiing ri masah, ri ka par nenge yiif i soksok la ini kumluut ma imel e kok lo ke ri ka par fal e beret sabin.

10 Iesu ka tara sing ri aragii, “Kep ti fal e kok ae igii sau gam ubiin u uga.”

11 Ke Saimon Pita ka fen una mon ma ka dat famasah ubiin. I fuun ini piran kok, ma i fasih aragii nenge mar ini lim e sangful ini tuul. I fuun kanaka e kok, isau le ubiin biil i tamrabat. 12 Iesu ka tara sing ri aragii, “Gam la ma gamek ien.” Foron berberat na fafausum tikii ri sokeh isi diik u le, “Wo seh?” Wara le ri ka usum tah le i e Kumguui. 13 Iesu ka la, ka kep beret ke ka ta u usuf ri, namih ka kep kok sabin ke ka ta u usuf ri. 14 Igii, fatuul u mang e aunbiing Iesu i tapiek sing berberat na fafausum kia, aunbiing i aptih fis tah tina minet.

Iesu i Orek tura Pita

15 Aunbiing ri ka ien tikii tah, Iesu ka tara sing Saimon Pita aragii, “Saimon kalalik ke Jon, o ier kanaka tom isi iau lon fal igii?”

Ke Pita ka kiliis u aragii, “Iuu, Kumguui, o usum le ia ier kanaka isi wo.”

Iesu ka fas u aragii, “Fen foron natun sipsip kiak.”

16 Iesu ka tara sabin sing i le, “Saimon, kalalik ke Jon, o ier kanaka tom isi iau?”

Pita ka kiliis u aragii, “Iuu, Kumguui, o usum le ia ier kanaka tom isi wo.”

Iesu ka tarah, “Parpar kale foron sipsip kiak.”

17 Fatuul u e aunbiing, Iesu ka tara sing i le, “Saimon kalalik ke Jon, o ier kanaka tom isi iau?”

Ka purngis e bala Pita, wara le Iesu ka diik u fatuul mang e aunbiing le, “O ier kanaka tom isi iau?” Pita ka tarah, “Kumguui, o usum na foron tier tikii, ma o usum le ia ier kanaka isi wo.”

Ke Iesu ka tara sing i le, “Fen foron sipsip kiak.
18 Tekentu kanaka ia fas wo, aunbiing ae o guam tah, o fakilkiliis fafis wo la tom ke o ka la una falifuh ae o ier le on la ulo, isau le aunbiing on tubunkak, on sawe iun limam, ke tikas keskes ik fakilkiliis wo, ma ik lame wo una falifuh ae biil o ier le on la ulo.” 19 Iesu i use u aragii, una finngas matngan minet ae Pita in tafe u, isi ik ta memeh usuf God. Ke Iesu ka fas u aragii, “Mi lo iau.”

20 Pita ka giliim fis ma ka par kalalik na fafausum ae Iesu i ier kanaka isi, i mimih la lo ruh. I sau e ier ae i tan tah lo Iesu na aunbiing na inen turim ma ka tara le, “Kumguui, seh in ta ufu wo una liman tuui?” 21 Aunbiing Pita ka par u, ka diik Iesu aragii, “Kumguui, arafah lon kaltu igii?”

22 Iesu ka kiliis u aragii, “Male ia ier isi in liu papang na aunbiing ian fis, ke ti sanih kiam lo? On mih lo iau.” 23 I wara na orek igii, nenge orek ka sararah na fatpoton foron tom unune le kalalik na fafausum igii, biil in to met. Isau le Iesu i use ta u sau le, “Male ia ier le in liu papang na aunbiing ian fis, ke ti sanih kiam lo?”

24 I sau e kalalik na fafausum ae i famalal foron tier igii, ke ka siit papte u. Kere usum le orek an fafamalal kia i tekentu.

25 Iesu i tel ta ifuun sabin e tier. Male rin siit papte ta foron tier tikii, ke ia wol le piklinbat biil in mel e mua una luun foron buk tikii.

Copyright information for `TGG