John 5

Iesu i Faliu nenge Kaltu na Biingen Mangeh

Fal e aunbiing namih, Iesu ka tatkau una Ierusalem isi nenge tel inen ken fan Iudaia. Awii na Ierusalem fatat isi nenge matan ubiif ae ri foteng u ini Matan ubiif ken foron Sipsip, i mel e nenge kalpong, ae na orek Ibru ri foteng u ini Betesda,
Fale tom tasum ri tara le asan kalpong ae, e Betsada
ma awii kawil u, i lim e palpalbuang.
Ma awii na falifuh ae, i fuun e fanu, ri borong: ini sasem, fal ri kut, fal ri peo, ma fal baban fo ri i met.
5.3-4Fale tom tasum ri wol le fal e orek biitom igii: Fale biing nenge angelo ke Kumguui i puh la, ke ka ikis dan ke dan ka burburak. Seh i puh famu una dan ae i burburak, in liu na sasem kia.


Neng e kaltu aiwa, sasem i kiis na liu kia na ituul e sangful ini wal e bet.

Aunbiing Iesu ka par u i borong kiniis, ka usum tah le kaltu ae ka sasem tah na tara na dolon aunbiing, ke ka diik u, “Arafah, o ier isi on liu?”

Kaltu ae ka kiliis u aragii, “Ier, biil tikas una lupes fapuh iau una kalpong na dan aunbiing i burburak. Ia totof la bii le ian puh, ke fal e fanu keskes ri ka kep ta salang.”

Iesu ka fas u aragii, “Aptih, kep mii salam ma ok la.” Fanpil, ke sasem ken kaltu ae ka rop, ka kep mii sala ke ka tipes la.

Tier igii i tapiek na Biingen Mangeh.
10 Pesu foron famfamu ken fan Iudaia ri ka tara sing kaltu ae i liu rokap aragii, “Na nagogon, i ti kale u le, gong o kep mii salam na Biingen Mangeh.”

11 Isau le ka kiliis ri aragii, “Kaltu ae i faliu ta iau i fas iau le, ‘Kep mii salam ma ok la.’”

12 Ri ka diik u le, “Seh na kaltu i fas o le, ‘Kep mii salam ma ok la?’”

13 Isau le kaltu ae, biil i usum le seh i faliu ta u, wara le Iesu ka liur tah na fatpoton motrong na fanu tinaiwa.

14 Namih sabin Iesu ka tafe u na Felun Sising ke ka fas u le, “Par u, o ka tapiek rokap fis mang. Susuaf mang na tel sinang laulau, tarama ti tatawin laumet in tapiek lo wo.” 15 Kaltu ae ka la, ka fas fan Iudaia le, kaltu ae i faliu pes ta u, i sau e Iesu.

Iesu i Tara le i Kalalik ke God

16 Pesu foron famfamu ken fan Iudaia ri ka falaulau Iesu, wara le i famam fafaliu na Biingen Mangeh. 17 Iesu ka fas ri le, “Tata i rik foim fitliu papang igii, ke iau sabin, ia tel foim.” 18 Pesu ri ka lala totof mang tom le rin siimete Iesu, wara le, biil ae sau le i lek nagogon na Biingen Mangeh, i foteng God sabin le i e Tama tutus, pesu ka tel u ka fafasih ini God.

19 Iesu ka fas ri aragii, “Tekentu kanaka, ia fas gam, Kalalik biil i fasih in tel ti tier ini wolwol kia tom. Biil. I tel tier sau ae i par Tama i tel u la, wara le sanih Tama i tel u, Kalalik sabin in tel u. 20 Taman Kalalik i ier kanaka isi ke Kalalik ma i finngas u la ini foron tier tikii i tel u. In finngas u ini foron tier laumet na fal igii, isi gamek lala bitit. 21 Tata i faptih ta foron minet ma i ta liu sing ri. Arae sau, ke Kalalik sabin i ta liu sing fanseh ri ier le in ta u sing ri. 22 Tata biil i nagogon tikas, isau le ka ta tikii ta rakrakai una nagogon usuf ke Kalalik, 23 isi fanu tikii rik sik asa ke Kalalik arae sau ri sik asa Tama. Seh biil i sik asa ke Kalalik, biil i sik asa Tama, ae i wuun ta u uga.

24 “Tekentu kanaka, ia fas gam, seh i ongen orek kiak ma i unune lo seh i wuun ta iau uga, i mel e liu fitliu ma biil in fiu na nagogon. Biil. Ka la koseng ta minet una liu. 25 Tekentu kanaka, ia fas gam, nenge aunbiing in tapiek ma igii mang ka tapiek tah, aunbiing foron minet rin ongen kinen Kalalik ke God ma fanseh ri ongen u, rin liu. 26 Tata i e wara e liu. Arae sau, ka ta u sing ke Kalalik isi i sabin ik wara e liu. 27 Ma ka ta ta u e rakrakai una nagogon sing i, wara le i e Kalalik ken Kaltu.

28 “Gong gam bitit na orek igii, wara le nenge aunbiing in tapiek ae foron minet tikii na palgan toh, rin ongen kine, 29 ke rik suuh. Fanseh ae ri tel ta sinang rokap rin aptih isi kep liu, ma fanseh ae ri tel ta sinang laulau, rin aptih isi fiu na nagogon. 30 Biil i fasih ian tel ti tier namin wolwol kiak tom. Biil. Ia nagogon sau namin sanih ia ongen u. Ma nagogon kiak i tortores, wara le biil ia mi na ti wowol kiak tom, isau le ia mi sau namin wowol ke seh ae i wuun ta iau.

Orek an Famalal ulo Iesu

31 “Male iau tom, ian famalal foron tier i tekentu ulo iau, foron tier ian use u biil in tatawin. 32 Nenge kaltu keskes tom, i famalal tekentu ulo iau, ma ia usum le sanih i famalal ulo iau i tatawin.

33 “Gam ka wuun ta fal e fanu usuf Jon ma ka famalal ta u e sanih i tekentu ulo iau. 34 Biil ia somangat pes fafamalal ken fanu, isau le ia orek isi gamek kep fafaliu. 35 Jon i arae lam ae i karef ma ka ta malal, ma gam ka laes na malal lo na fatuklin aunbiing.

36 “Imel e orek an famalal kiak ae i tatawin kanaka na neng ae sing Jon. I e foim tom ae Tata i wuun ufu ta iau isi ian farop u, ma sanih ia tel u, i famalal u le i tekentu le Tata ka wuun ufu ta iau. 37 Ma Tata, ae ka wuun ufu ta iau, ka famalal ta sanih i tekentu ulo iau. Biil biitom gam ongen kine ke biil biitom gam par u le i par arafah. 38 Ke orek kia biil i kiis na liu kimi, wara le, biil gam unune lo seh ae i wuun ta u. 39 Gam famam parpar tole foron sun orek na Buk na Gogoh, i wara gam wol le na foron orek ae in ta liu fitliu sing gam. Foron orek tom ae ri famalal sanih i tekentu ulo iau. 40 Isau le biil gam ier isi la una aisang, isi gamek kep liu.

41 “Biil ia somangat pes ususefages sing fanu. 42 Isau le, ia usum lo gam foron matngan fanu arafah. Ia usum le, biil gam ier isi God na balmi. 43 Ia la tah ugapiek, wara le Tata i wuun ta iau, ke biil gam somangat pes iau. Isau le, male tikas in la tom ini wolwol kia, ke gamek somangat pes u. 44 Biil i fasih gamen unune lo iau, male gam somangat pes ususefages sing temtem tikii lo gam tom, ma biil gam totof isi kep ususefages tinbae sau sing God.

45 “Isau le gong gam wol le, ian ususe ami sing Tata. Biil. Ier ae in ususe ami, i e Moses, ae gam luun unune kimi lo le in lupes gam. 46 Male gamen unune ta lo Moses, ke gamen unune sabin lo iau, wara le ka siit ta orek an famalal ulo iau. 47 Male biil gam unune na sanih i siit ta u, ke arafah gamek unune arae na sanih ia use u?”

Copyright information for `TGG