John 6

Iesu i Fen i Lim e Arip e Fanu

(Mt 14:13�21; Mk 6:30�44; Lk 9:10�17)

Fale aunbiing namih, Iesu ka sopaket dan kawil Galili (ae ri foteng u sabin ini dan kawil Taiberias). Ma gur na fanu ri ka mi lo, wara le ri ka par ta u e foron rakrakai na fakileng ae ka tel ta u lon fanu ae ri sasem. Namih, Iesu ka tatkau na baban nenge pungpung ma ka kiis turan berberat na fafausum kia. Aunbiing ka fatat isi inen na Liuliu Kulef ken fan Iudaia.

Aunbiing Iesu i sake mata, ka par gur na fanu ri ka la isi tafe u, ke ka diik Pilip le, “Fiah keren fiil ti beret wah an fanu igii?” I diik sau aragii isi in tof u, wara le i tom ka usum tah na sanih in tel u. Pilip ka kiliis u aragii, “Fifiil ken i tikii e kaltu na iwal e funiil biil in fasih una fiil beret isi temtem tikii na kaltu ik ien ituul.” Neng lon berberat na fafausum kia, Enru, tualik e Saimon Pita, ka fas u le, “Nenge kalalik igii, i mel i lim e fabiro beret ri tel u ini bali, ke iu sabin e kok sing i. Isau le biil tom in fasih lo ri tikii.”

10 Ke, Iesu ka tara le, “Fas fanu tikii rik kiis.” Ifuun e rokap na fifih una kiis aiwa. Ma wewes lon fanu tamat tikii i fasih ini ilim e arip. 11 Iesu ka kep beret, ka fot rokap lo usuf God, ma ka tulus fanu ae ri kiis tah. Ka tel u sabin arae na iwu e kok, ma fanu tikii ri ka ien ke ri ka mas.

12 Aunbiing ri ka ien mas tah, Iesu ka fas berberat na fafausum kia le, “Kep turim foron tigan inen i kiis, tarama ka laulau foes.” 13 Ke, ri ka kep turim foron tigan inen tina i lim e beret ae foron fanu ri ien tiga tah. Ke ri ka siing u na nenge sangful ini wu e tara sara. 14 Namih na aunbiing fanu ri ka par ta rakrakai na fakileng Iesu i fatapiek ta u na matri, ri ka tara aragii, “Tekentu kanaka, igii i e poropet ae ri use ta u le in la uga na piklinbat.
6.14Par Lo 18:15.
15 Iesu ka usum ta le fanu ae rin la ma rik fangongos u isi in tapiek king, pesu i keskes tom ka la una nenge pungpung.

Iesu i La na olon Dan

(Mt 14:22�33; Mk 6:45�52)

16 Ka efef worwor mang ke berberat na fafausum kia ri ka puh fis una dan kawil. 17 Ri ka wof na nenge mon ke ri ka sopaket dan kawil isi rik tapiek na Kapernaum. Ka kubunor mang ma Iesu biil biitom i tapiek sing ri. 18 Ke tara na kif ka tapiek ma dan ka panaf. 19 Aunbiing ri ka awes i fasih ini i lim le i won e kilomita, ke ri ka par Iesu ka la na olon dan isi mon, ke ri ka sokeh. 20 Isau le Iesu ka fas ri aragii, “Iau sau. Gong gam sokeh.” 21 Pesu, ri ka laes isi rin siing u, ma fanpil ri ka tapiek na falifuh ae rin la ulo.

22 Na biing namih, gur na fanu ae ri kiis uf tah na nenge bulin dan kawil, ri ka wol tafe u le i tikii ta sau e mon aiwa. Ma Iesu biil biitom i wof turan berberat na fafausum kia. Ri keskes tom, ri la tah. 23 Namih, fal e mon tina Taiberias ri ka masah fatat isi falifuh ae ri ien ta beret ae Kumguui i fot rokap ta lo. 24 Ma aunbiing ri ka iliim u, le Iesu turan berberat na fafausum kia ri ka mangmangal tah tinaiwa, ke ri ka wof na foron mon isi im isi Iesu na Kapernaum.

Iesu i e Beret na Liu

25 Aunbiing ri ka tafe u na nenge bulin dan kawil, ri ka diik u aragii, “Tom fafausum, nangis o la tah uga?” 26 Iesu ka kiliis ri aragii, “Tekentu kanaka, ia fas gam, gam im isi iau, biil wara le gam par ta foron rakrakai na fakileng, ma i wara sau le gam ien ta beret ke gam ka mas. 27 Gong gam foim isi inen ae in laulau, isau le gamen foim isi inen ae in kiis ma in ta liu fitliu, ae Kalalik ken Kaltu in ta u sing gam. God Tata i finngas ta u le i somangat ini sanih ke Kalalik i tel u.

28 Pesu, ri ka diik u le, “Sanih tom kemen tel u, isi kemek tel foim ae God i ier isi?”

29 Iesu ka kiliis ri aragii, “Foim ae God i ier isi i aragii, le gamen unune lo seh ae God i wuun ufu tah uga.”

30 Pesu, ri ka diik u aragii, “Matngan rakrakai na fakileng arafah ae on fatapiek u, isi kemek par u ma kemek unune lo wo? 31 Foron tubutamat kemem ri ien ta mana na falifuh foes, arae ri siit ta u na Buk na Gogoh le, ‘I fen ta ri ini beret tina kukulii una ien.’

Buk Song 78:24

Ma wo, sanih on tel u?”

32 Iesu ka fas ri le, “Tekentu kanaka, ia fas gam, biil e Moses ae i fen ta gam ini beret tina kukulii, isau le Tata tom ae i fen gam la ini beret tekentu tina kukulii. 33 Wara le, beret tekentu ke God, i e seh ae i puh tina kukulii ma ka ta liu sing fanu tikii na piklinbat.”

34 Ri ka fas u aragii, “Ier, tipesu igii, ok fen kemem ini e beret ae.”

35 Ke namih, Iesu ka fas ri le, “Iau tom e beret na liu. Seh i la usuf iau, biil in to fitol. Ke seh i unune lo iau biil in to met dan. 36 Isau le, arae ia ka fas ta gam le, gam ka par ta iau, isau le biil tom gam unune. 37 Fanu tikii ae Tata i ta ta u usuf iau, rin la usuf iau. Ma seh i la usuf iau, biil ian to tel ufu. 38 Wara le, ia puh tah tinbae na kukulii, biil isi ian mi na wolwol kiak tom, isau le ia puh tinbae isi ian mi na wolwol ke seh ae i wuun ta iau. 39 Ma igii e wolwol ke seh ae i wuun ta iau ugapiek, le gong ia sok ufu tikas lo ri ae ka ta ta u usuf iau, isau le ian faptih fafis ri na farfarop na biing. 40 Wara le, wolwol ke Tata le, fanseh ri par usuf Kalalik ma ri ka unune lo, rin kep liu fitliu, ma ian faptih fafis u na farfarop na biing.”

41 I use u arae, pesu foron famfamu ken fan Iudaia ri ka tanwaran belbel orek lo, wara le i tarah, ‘Iau tom e beret ae i puh tah tinbae na kukulii.’ 42 Ri ka tarah, “I sau e kalalik ke Iosep ae tama ru e tina kere usum lo ruh. Arafah ke igii ka tara le, ‘Ia puh tina kukulii’?”

43 Iesu ka kiliis ri aragii, “Gong gam belbel orek na fatpoto gam tom. 44 Biil tikas in la usuf iau, male Tata ae i wuun ta iau, biil i dat u usuf iau, ma ian faptih fafis u na farfarop na biing. 45 Ri siit ta u na sisiit ken foron poropet le, ‘God tom in fausum ri tikii.’

Aisaia 54:13

Ma fanu tikii ae ri ongen Tata ma ri ka kep usum sing i, rin la usuf iau.
46 Biil tikas i par ta Tata, isau le ier sau ae tinbae sing God, i sau ka par ta Tata. 47 Tekentu kanaka, ia fas gam, seh sau i unune, i mel e liu fitliu. 48 Iau tom e beret na liu. 49 Foron tubutamat gam, ri ien ta mana na falifuh foes, isau le ri ka met tom. 50 Isau le, igii e beret ae i puh tinbae na kukulii ae le seh i ien lo, ke biil in to met. 51 Iau tom e beret ae i liu, ae i puh tah tinbae na kukulii. Male tikas i ien lo e beret igii, in liu fitliu. Beret igii, i e pununfong tom ae ian ta u, isi fanu na piklinbat rik liu.”

52 Namih fan Iudaia ri ka lala fakep ini orek na fatpoto ri tom le, “Kaltu igii in ta pununfo arafah usuf kerer isi kerek ien u?” 53 Iesu ka fas ri aragii, “Tekentu kanaka, ia fas gam, male biil gam ien pununfon Kalalik ken Kaltu ke biil gam umin dawu, biil in mel e liu tekentu sing gam. 54 Seh sau i ien pununfong ma ka umin daung, i mel e liu fitliu, ma ian faptih fafis u na farfarop na biing. 55 Ia use u aragii, wara le, pununfong i e inen tekentu ma daung i e dan tekentu. 56 Seh sau i ien pununfong ma ka umin daung, i patep lo iau ma ia ka patep lo. 57 Tata ae i liu, i wuun ta iau. Ma ia liu i wara lo Tata i liu. Arae sabin ulo seh ae i ien lo iau in liu, wara lo iau. 58 Igii e beret ae i puh tah tinbae na kukulii. Foron tubutamat gam, ri ien ta mana ke ri ka met tah, isau le seh ae i ien na beret igii, in liu fitliu.”

59 Foron tier igii, i use u aunbiing i tel fafausum na felun lotu na Kapernaum.

Foron Orek na Liu Fitliu

60 Na wongwong una foron tier igii, ifuun e berberat na fafausum ke Iesu ri ka tara le, “Fafausum igii i ngangaten kanaka. Seh i fasih in kep u?”

61 Iesu ka usum tah na sanih berberat na fafausum kia ri ususe u la, pesu ka tara sing ri aragii, “Foron fafausum igii i faluut gam? 62 Gamen wol arafah male gamen par Kalalik ken Kaltu in tatkau fis una falifuh ae i puh tinlo pakanini? 63 Tanwa Kalkaluu i ta u la e liu. Rakrakai ken fanu biil in ta liu. Foron orek ae ia ka fas ta gam ini, ri ta liu na tanwa. 64 Isau le fal lo gam, biil gam unune.” I use u arae, wara le Iesu ka usum tah tina tanwara lon fanseh lo ri ae biil ri unune, ke seh ae in ta ufu una liman foron tuui. 65 Ke ka tara sabin aragii, “Igii sau e wara ia ka fas gam le, biil tikas i fasih in la usuf iau, male Tata biil i ta rakrakai sing i isi in la usuf iau.”

66 Tipes u na aunbiing ae, ifuun e berberat na fafausum kia ri ka la koseng u ma biil mang ri mi lo.

67 Iesu ka diik nenge sangful ini iu e kalalik na fafausum kia aragii, “Ke gam sabin, gam ka ier le gamek la koseng iau?”

68 Saimon Pita ka kiliis u aragii, “Kumguui, kemen la usuf seh? I mel e orek na liu fitliu ae sing o. 69 Kemem unune ma kemem usum le, wo e Kaltu Kalkaluu ke God.”

70 Ke Iesu ka fas u aragii, “Ia tom ia tim pes ta gam nenge sangful ini iu. Isau le neng lo gam i mel e tanwa laulau lo.” 71 I use Iudas, kalalik ke Saimon Iskariot. I tekentu le i neng lon sangful ini iu e kalalik na fafausum, isau le namih in ta ufu Iesu.

Copyright information for `TGG