John 9

Iesu i Faliu nenge Kut

Aunbiing Iesu ka toltole sal la, ke ka par nenge kaltu, i pang ma ka kut tah. Ke berberat na fafausum kia ri ka diik u le, “Tom fafausum, seh i tel ta sinang laulau pesu kaltu igii ka pang ini kut, i tom le, tama ru e tina?”

Iesu ka kiliis ri aragii, “Kaltu igii, biil i kut i wara na sinang laulau kia, le na sinang laulau ke tama ru e tina. Biil. I kut isi fanu tikii rik par foim ke God ik tapiek malal na liu kia. I rokap le kerek tel foim ke seh ae i wuun ta iau, aunbiing i siat biitom. Wor apiek i lalala ae biil tikas i fasih in rik foim. Aunbiing ia kiis biitom na piklinbat, iau tom e malal ken fanu tikii na piklinbat.”

Ka use ta u arae, ma ka ubis una nanal, ke ka tel pisak ini ubis kia ma ka luun u na iun matan kut ae. Ke Iesu ka fas u aragii, “La, ok susuh na kalpong ri foteng u ini Siloam” (kamtina e Siloam e wuun). Ke kaltu ae ka la ke ka susuh, ma aunbiing ka fis ma iun mata ka sapeng tah.

Pesu, foron tikiin maleh kia ke fanu ae ri par ta u i kiis la isi ka sising fanu isi tier, ri ka diik le, “I sau e kaltu ae i kiis la isi ka sising tier igii?” Fal ri ka tara le, i sau.

Isau le fal ri ka tara le, “Biil. I par sau arae i.”

Isau le i tom ka tartara la le, “Iau sau e kaltu ae.”

10 Ri ka diik u le, “Arafah, ke igii iun matam ka sapeng?”

11 Ka kiliis ri aragii, “Kaltu ae ri foteng u ini Iesu, i tel ta pisak ma ka luun u na iun matang. Ke ka fas iau isi ian susuh na kalpong na Siloam. Ke ia ka la ma ia ka susuh ke ia ka par.”

12 Ri ka diik u aragii, “I fiawah?”

Ka kiliis ri aragii, “Biil ia usum.”

Foron Farasi ri Diik faikis Kut

13 Ke ri ka lame kaltu ae i kut tah usuf foron Farasi. 14 Ma biing ae Iesu i tel ta pisak ma ka luun u na iun matan kaltu ae i kut tah, i e Biingen Mangeh. 15 Pesu foron Farasi ri ka diik u sabin le, “I tara arafah ke o ka par?”

Ke kaltu ae ka tara sing ri le, “I luun pisak na iun matang, ke ia ka susuh, ke ia ka par.”

16 Fal e Farasi ri ka tara le, “Biil e kaltu ke God igii, wara le i lek nagogon na Biingen Mangeh.”

Isau le fal ri ka diik le, “Ifasih le tikas e tom tel sinang laulau in fatapiek foron matngan rakrakai na fakileng aragii?” Ke ka mel e tampaek na fatpoto ri.

17 Ke, ri ka diik kaltu tala ae le, “O wol le i matngan kaltu arafah? Wara le i sapeng tah na matam.”

Ma kaltu ae ka tara le, “I nenge poropet.”

18 Foron famfamu ken fan Iudaia biil tom ri unune le kaltu ae i kut tah, ma arafah i tara arae ke ka par, pesu ri ka fauun isi tama ru e tina. 19 Ke ri ka diik ruh aragii, “Kalalik kimuh igii, ae kamu tara le i pang ini kut? Ke arafah i tara arae ke igii, i fasih mang ik par?”

20 Tama ru e tina ru ka tara aragii, “Kama usum le i e kalalik kimah, ke kama usum le i pang tom ini kut. 21 Isau le, arafah i tara arae ke igii, i fasih ik par, ke seh i sapeng tah na iun mata, biil kama usum. Gam diik u, i kaltu matuk, i tom in orek kia.” 22 Tama ru e tina ru ka use u arae, wara le ru soke foron famfamu ken fan Iudaia, wara le ri ka somangat tah le, tikas in fapos Iesu le i e Mesaia, ke rin ti kale ri isi gong ri lotu na felun lotu. 23 Pesu, tama ru e tina ru ka tara le, “Gam diik u, i kaltu matuk.”

24 Ke, fawu e aunbiing foron Farasi ri ka kam pes u tala e kaltu ae i kut tah, ke ri ka tara sing i aragii, “Falimlim ini asa God le on orek tekentu. Kemem usum le kaltu ae i faliu ta wo i nenge tom tel sinang laulau.”

25 Ke kaltu ae ka kiliis ri aragii, “Biil ia usum, le i tom tel sinang laulau, le biil. Isau le, ia usum le ia kut tah, ma igii ia ka par.”

26 Ke ri ka diik u aragii, “Sanih i tel u ini wo? Ke arafah i sapeng na matam arae?”

27 Ka kiliis ri aragii, “Ia ka fas ta gam, ma biil tom gam wong. Gam ka ier isi ongen u sabin isi sanih? Arafah, gam sabin gam ka ier isi tapiek berberat na fafausum kia?”

28 Ke ri ka ngaliaf u lo, ma ri ka tarah, “Wo nenge kalalik na fafausum kia e ier igii. Kemem berberat na fafausum ke Moses. 29 Kemem usum le, God i orek tah usuf Moses. Isau le kaltu igii, biil kemem usum le i la tingah.”

30 Kaltu ae ka kiliis ri aragii, “Igii e tier an fasodar. Biil gam usum le fia i la tingah, isau le i sapeng tah na matang. 31 Kere usum le God biil i wong la sing foron tom tel sinang laulau. I wong la sau sing fanu ae ri bulat la lo, ke ri tel sanih ae i ier isi rin tel u. 32 Tina tanwaran fakfakiis papang igii, biil biitom tikas i ongen ta u le, tikas ka sapeng tah na matan ti kaltu ae i pang ta tom ini kut. 33 Male kaltu igii biil in la tah tinbae sing God, ke biil i fasih in tel ti tier.”

34 Foron Farasi ri ka kiliis u aragii, “O pang ke o ka laumet piek tah na palgan sinang laulau. Arafah, o ka ier isi fausum kemem bin?” Ke, ri ka tel ufu mang tina felun lotu.

Seh biil i Unune i Kut

35 Iesu ka ongen ta u le foron Farasi, ri ka ti kale ta kaltu ae tina felun lotu. Pesu ka im isi, ma aunbiing ka tafe u, ka diik u le, “O unune sabin lon Kalalik ken Kaltu?”

36 Kaltu ae ka diik Iesu le, “Ier, i e seh? Fas iau, isi iak unune lo.”

37 Iesu ka fas u aragii, “O ka par ta u, ma i igii i ororek la turam.”

38 Ke, kaltu ae ka tarah, “Kumguui, ia unune.” Ka ilepul, ma ka lotu unaisa.

39 Iesu ka tarah, “Ia la tah uga na piklinbat isi nagogon fanu, isi foron kut rik par, ma fanseh ae ri par rik tapiek kut.”

40 Fal e Farasi ae, tinaiwa tah na aisa Iesu ri ka ongen u i use u aragii, ke ri ka diik aragii, “Arafah, kemem kut sabin?”

41 Iesu ka kiliis ri aragii, “Male gam kut tah, ke biil tikas in tiu gam na foron sinang laulau kimi. Igii, gam tara le i fasih gamen par, pesu sinang laulau kimi i kiis biitom.

Copyright information for `TGG