Mark 4

Orek Fatoftof na Tom Soso

(Mt 13:1�9; Lk 8:4�8)

Iesu ka tipes tel fafausum sabin na baban dan kawil Galili. Gur na fanu ae ri kawil ta u, ri fuun kanaka, pesu ka wof na nenge mon ke ka kiis lo na dan ma fanu tikii ri tinawii na baban dan. Ke ka use ifuun e orek fatoftof una fausum ri. Na fafausum kia, ka tarah, “Ongen u! Nenge tom soso i la isi saprai kutun wit. Aunbiing i sapsaprai, fal ka luut tole sal, ke foron man ri ka wofpiek ke ri ka ien tikii u. Fal ka luut na olon fatfat, ae biil i laumet e nanal wah. Ka rarau sape, wara le nanal biil i laumet. Isau le aunbiing pisiih i popos, ka pose ri ke ri ka mang, wara le bauli ri biil i laumet. Fale kutun wit ri luut na porpor tingting. Aunbiing tingting i kuum, ka rarau kale foron wit ae ke biil ri fua. Isau le fal e kutun wit ri luut na nanal rokap. Ri ka kuum, ma ri ka laumet ke ri ka fua. Fal i tuul e sangful e fua, fal i won e sangful e fua ma fal i fasih aragii nenge mar e fua.”

Ke Iesu ka tara aragii, “Seh i mel e balbalu, i rokap le in wong ini.”

Wara ae Iesu ka Fafas la ini foron Orek Fatoftof

(Mt 13:10�17; Lk 8:9�10)

10 Namih, aunbiing Iesu keskes mang aiwa, ke sangful ini u e kalalik na fafausum kia turan fal e fanu, ri ka diik u isi foron orek fatoftof ae. 11 Ke ka fas ri aragii, “God ka finngas ta gam ini foron orek ae i kum na matanfuntih kia, ke gam ka malal ta lo. Isau le fanu ae ri kiis na maleh, ri ongen foron orek tikii arae foron orek fatoftof sau, 12 isi,

“‘rin par ma rik par, isau le biil tom rin par failiim ti tier,
ke rin wong ma rik wong, isau le biil tom rin ongen failiim ti tier,
tarama ri ka kiliis liu kiri, ke God ka pa ufu foron sinang laulau kiri!’”
13 Ke Iesu ka tara sing ri aragii, “Arafah, biil gam malal na orek fatoftof igii? Ke arafah gamen malal arae na ti fal e orek fatoftof sabin? 14 Kutun wit ae kaltu i saprai u, i e orek ke God. 15 Foron kutun wit ae i luut tole sal, ri ae fanu ae ri ongen orek. Isau le aunbiing tom ae ri ongen u, Satan i tapiek ke ka tel ufu orek ae tina balri. 16 Fal, ri arae kutun wit ae ri luut na olon fatfat, ri ongen orek ke ri ka somangat pes u ini laes. 17 Isau le biil ri ti dolo, arae wit ae bauli biil i laumet. Aunbiing tatawin i tafe ri, le fanu ri ta fangungut sing ri, i wara na orek ke God, ke ri ka luut sape. 18 Ke fal e fanu, ri arae kutun wit ae ri luut na porpor tingting. Ri ongen orek ke God, 19 isau le ri mamais kanaka isi foron tier tinaga na piklinbat, ma sinangun ier isi in fuun e minsik i fabal ri, ke wolwol isi fal e tier sabin ka tapiek ke ka aung orek ke God, arae tingting i rarau kale wit, ke biil ri fua. 20 Ma fal, ri arae kutun wit ae ri luut na rokap na nanal, ri ongen orek ke God ke ri ka somangat pes u. Rin arae wit ae ri luun ituul e sangful, le i won e sangful ke fal i fasih aragii nenge mar e fua ri.”

Orek Fatoftof na Lam

(Lk 8:16�18)

21 Ke Iesu ka tara sing ri aragii, “Arafah, gam kep fakau lam la ke gam ka luun u la na piklin paket le na piklin luuf? Biil. Gam luun u la tom na sala. 22 Isi foron sanih ae i kiis mumun tah, ik tapiek na malal, ke sanih ae i kiis kum tah ik tapiek malal. 23 Seh i mel e balbalu, i rokap le in wong ini.”

24 Iesu ka fas ri sabin aragii, “Gamen wol papte sanih ae gam ka ongen ta u. Matngan fafen ae gam ta ta u, i sau e matngan fafen ae gamen kep fafis u, ma God in ta in fuun biitom usuf gam. 25 Le kaltu ae ka mel tah e fal e tier sing i, God in ta in fuun biitom sing i. Isau le kaltu ae biil ti tier sing i, fabiro ae sing i, God in tel ufu.”

Orek Fatoftof na Kutun Wit i Kuum

26 Ke Iesu ka use u sabin aragii, “Matanfuntih ke God ifasih arae nenge kaltu i saprai kutun wit na olon nanal. 27 Na wor i borong la ma na siat ka mat la, foron kutun wit ae ka rarau ke ri ka kuum, isau le kaltu ae biil i to usum le ri kuum arafah. 28 Nanal tom i tel kutun wit ka kuum ke namih ka fua. I luun famu kubu, namih ka sia ke ka luun fua. 29 Aunbiing wit ka matuk, ke kaltu ae ka pakat turim u, wara le ka taul mongor mang.”

Orek Fatoftof na Kutun Mastet

(Mt 13:31�32, 34; Lk 13:18�19)

30 Iesu ka tara sabin aragii, “Sanih keren fatof matanfuntih ke God ini, le matngan orek fatoftof arafah keren tel u? 31 Ifasih arae kutun mastet ae i fabiro na foron kutun au tikii ae ri so u na nanal. 32 Isau le aunbiing ri ka so ta u, ka kuum ma ka liu ufu foron au tikii na palgan mok. Ma foron man na mua ri ka tel polpolo ri na piran aka ae i mel e malmaluu lo.”

33 Iesu i use ifuun e matngan orek fatoftof ae i fafasih usuf ri, ae i fasih na wolwol kiri. 34 Biil i fas ri la ini ti fal e orek sabin, biil, i fas ri la sau ini foron orek fatoftof. Isau le aunbiing i keskes mang turan berberat na fafausum kia, ke ik fas ri la mang ini foron kamtinan orek fatoftof tikii.

Iesu i Ti Kale Kif turan Panaf

(Mt 8:23�27; Lk 8:22�25)

35 Na efef tom lo e biing ae, Iesu ka fas berberat na fafausum kia aragii, “Kere mang una nenge bulin dan kawil.” 36 Ke ri ka la koseng tara gur na fanu aiwa, ma ri ka wof na mon ae Iesu tinaiwa mang lo, ke ri tikii ri ka la. Fal e mon sabin ri ka la turim tura ri. 37 Nenge tara kif ka aptih ke panaf ka tamket na palgan mon, ma fatat ik dom. 38 Iesu tinawii na min mon, i luun paklu na nenge koskosngoi, ma ka masun. Ke berberat na fafausum ri ka famat u, ma ri ka fas u aragii, “Tom fafausum! Arafah, biil o wol lo kerer? Fatat kerek kong!”

39 Iesu ka aptih ke ka tikale kif, ma ka fas panaf aragii, “Mangeh! Ma ok siaroh!” Ke ka met e kif ma ka siaroh.

40 Ke Iesu ka fas berberat na fafausum kia aragii, “Isi sanih gam ka lala sokeh? Arafah, biil biitom ti unune kimi?”

41 Ri ka lala sokeh ma ri ka fadiik faliu ini ri tom aragii, “Matngan kaltu arafah igii? Kif turan panaf ru wong sing i!”

Copyright information for `TGG