Mark 7

Ri Fapuh Orek ke God

(Mt 15:1�9)

Foron Farasi ke fal e tom fafausum ini nagogon ae ri puh tinbae na Ierusalem, ri ka la usuf Iesu. Ke ri ka par fal e berberat na fafausum ke Iesu ri ien sau ini foron limri ae i duh, biil ri sofolim tah. Foron Farasi turan fan Iudaia tikii ri mi la tom na fafausum ken foron tubu tamat ri, biil rin ien male biil ri sofolim. Aunbiing ri tapiek la tina falifuh ae fanu ri kep foron tier una fifiil la lo, rin sofolim tom ke namih rik ien. Ma ri mi la tom na ifuun e matngan fafausum kiri aragii, rin gorse foron kap, foron sospen ke foron ketel.

Foron Farasi turan foron tom fafausum ini nagogon ri ka diik Iesu aragii, “Isi sanih ke berberat na fafausum kiam biil ri to mi na foron fafausum ken foron tubutamat kerer? Ri ien sau ini foron limri ae i duh.”

Iesu ka kiliis ri aragii, “Poropet Aisaia i orek tekentu tom, aunbiing i orek famu ta le gam foron tom gargaranmet, arae tom ka siit ta u le,

‘Fanu igii ri bulat sau lo iau ini ngusri,
isau le balri i tapak koseng iau.
Ri lotu foes la sau usuf iau,
wara le ri fausum fanu la sau ini nagogon foes ken fanu.’
7.7Par Aisaia 29:13

Gam ka la koseng ta foron nagogon ke God, ma gam ka mi mang namin foron fafausum sau ken fanu.”

Ke Iesu ka fas ri sabin aragii, “Gam usum rokap tom na sinangun ongen ufu nagogon ke God, isi gamek kep papte fafausum kimi tom. 10 Moses i use u aragii, ‘Bulat lo tamam ru e tinam,’ ke ka use u sabin aragii, ‘Male tikas i nes tama le tina, ke rin siimete u.’ 11 Isau le gam tara la aragii, in rokap male tikas in tara sing tama le tina le, ‘Tier ae le ian ta u sing kamuh, ia ka kale ta u le ian ta u usuf God.’ 12 Ke, gam ka tikale u isi biil mang in lupes tama ke tina. 13 Male gam tel u arae, gam fapuh orek ke God ma gam ka mi sau na foron fafausum ae gam kep ta u sing foron tubutamat gam. Ma i fuun tom e tier aragii gam tel u la.”

Foron Sinang ae i Faduh Fanu la na Mata God

(Mt 15:10�20)

14 Iesu ka kam pes gur na fanu sabin ae usuf i, ke ka fas ri aragii, “Gam tikii, gamen ongen iau, ke gamek malal na foron orek kiak. 15 Biil ti tier ae kaltu i kiim u, in faduh u na mata God, biil. Tier ae kaltu i fasuuh u tina wolwol kia, in faduh u na mata God.”
7.15-16Fale tom tasum na Buk na Gogoh ri wol le fal e orek sabin na rina igii, i arae: Seh i mel e balbalu, i rokap le in wong ini.


17 Na aunbiing ka kang koseng gur na fanu ae ma ka kau na fel, berberat na fafausum kia ri ka diik u isi foron orek fatoftof ae i use ta u. 18 Ke, Iesu ka fas ri sabin aragii, “Paklu gam i kutkut biitom? Arafah, biil gam usum le, tier ae kaltu i kiim u biil in faduh u na mata God? 19 Wara le biil i kau na wolwol kia, i kau sau una bala, ke namih ka pekes ufu.” Aunbiing Iesu i use u aragii, i famalal u le foron inen tikii i rokap na mata God.

20 Ka orek biitom ke ka use u aragii, “Sanih sau ae i suuh tina wolwol ken kaltu, i faduh kaltu la na mata God. 21 Wara le foron matngan sinang aragii i suuh la tina wolwol ken kaltu: foron wolwol laulau, sinangun fakekel na sal, sinangun suksukuum, sinangun siimete kaltu ke sinangun puur, 22 sinangun ier isi ifuun e tier, sinangun falaulau fanu, sinangun famfabal, sinangun mi na wolwol laulau na pununfo, sinangun ram na tier ke neng, sinangun orek laulau ulon neng, ke sinangun falaumet wo tom ke sinangun talos. 23 Foron sinang laulau tikii igii, ri tapiek tina wolwol ken kaltu ke ka faduh u na mata God.”

Unune ken Fifin tina Fonisia

(Mt 15:21�28)

24 Ke, Iesu ka kang tina maleh ae ma ka tapiek fatat isi tara maleh na Tair. Ka kau na nenge fel, ma biil i ier le tikas in usum lo le i ae na palgan fel, isau le biil tom ifasih le in mumun. 25 Aunbiing nenge fifin ae keleflik kia tanwa laulau i susuef ulo, ka ongen u le Iesu ae na fel, fanpil ka la ma ka ilepul na mata. 26 Fifin ae biil i fafnan Iudaia, i fafnan Fonisia tina nanal na Siria. Ka sising Iesu le in tel ufu tanwa laulau koseng keleflik kia.

27 Isau le Iesu ka fas u aragii, “Tier famu, ri fen famas berberat tabii. Biil i tortores le rin kep inen an berberat ma rik lin u an foron natun puul.”

28 Fifin ae ka kiliis u aragii, “I tekentu, Kumguui, isau le foron natun puul sabin ae na piklin luuf una ien, ri ien foron peksen inen la an berberat.”

29 Ke, Iesu ka fas fifin ae aragii, “Wara le o kiliis fakasi orek kiak, la mang, tanwa laulau ka suuh koseng ta kem keleflik.”

30 Aunbiing fifin ae ka fis una fel kia, ka par ke keleflik i borong na sala, ma tanwa laulau ka suuh koseng ta u.

Iesu i Faliu nenge Baut ma biil i Orek Rokap la

31 Iesu ka la tina Tair ke ka soleng maleh na Saidon ke ka tapiek na dan kawil na Galili, na baba na nanal na Dekapolis. 32 Ma nenge kaltu tinaiwa i baut ke biil i orek rokap la. Fal e fanu ri ka tangne u usuf Iesu ke ri ka sising Iesu le in luun lima na olo. 33 Iesu ka tangne u koseng gur na fanu ae, ke ka fakau iun katngan lima na iun balbalu. Ka ubis, ke ka sigil kermen kaltu ae. 34 Ke ka par una kukulii, ka mangeh ma ka fas kaltu ae aragii, “Efata!” kamtinan orek le, “Sapeng!” 35 Ke ka malal e balbalu, ke ka malalah e kerme, ma fanpil ka orek rokap.

36 Iesu ka tikale fanu aiwa le gong ri fas tikas ini tier ae. Isau le aunbiing i tikale ri la, ri ka lala fasararah ususe mang tom lo, usuf fanu. 37 Fanu ae ri ongen foron tier igii, ke ri ka lala bitit, ma ri ka tara aragii, “Iesu i tel fakasi foron tier tikii, i tel foron baut ke ri ka wong, ke foron tabilikut, ri ka orek.”

Copyright information for `TGG