Philippians 3

Seh i Unune lo Karisito, i Tom Tortores Tekentu

Foron tuaklik, nenge tier sabin, i rokap le gamen laes na kiiskiis kimi lo Kumguui. Biil i tatawin usuf iau isi ian siit foron tier sabin igii usuf gam. Ia siit u sabin una lupes gam.

Gamen tumarang isi foron tom tel sinang laulau, ae ri kiit falaulau pununfon fanu la. Kerer ae kere lotu la unaisa God ini Tanwa, kere tom kere fanu tekentu ke God, ae ri kiit tu pununfo kerer. Biil kere unune na sanih ri tel u sau na pununfo kerer. Biil. Kere laes sau na foim ae Karisito Iesu i tel ta u usuf kere. Male imel e falupes tina sinangun kikiit, ke tina rakrakai ken fanu sau, iau tom i fasih ian unune lo.

Male tikas i wol le ifasih in unune na rakrakai ken fanu sau, foron tier ae i unune lo, ia rokap kanaka lo.
Wara le ri kiit ta pununfong na fawal u e biing. Ma ia nenge sikin Israel, tina mat ke Beniamin. Ia nenge sikin Ibru tutus. Ma ia nenge Farasi, pesu ia ka misuut la na nagogon ke Moses. Ia ta fangungut usuf fanu na lotu ke Karisito, wara le imel e rakrakai na wolwol kiak isi ian misuut na lotu ken fan Israel. Na nagogon ke Moses ia tortores, biil ifasih rin tiu iau ini ti tier.

Isau le foron tier ae ia par ta u le in farokap iau, igii ia ka par u arae foron tier foes, i wara lo Karisito. Tekentu, ia par foron tier tikii ae, arae foron tier foes sau, wara le ia iliim nenge tier ae i laumet kanaka. Tier ae, isi ian usum lo Karisito Iesu, Kumguui kiak. I e wara, ia ka sokufu foron tier tikii, ma ia ka par ri arae foron piin, isi iak somangat pes Karisito, ma iak patep u. Biil ia tapiek tom tortores, i wara le ian mi na nagogon. Biil. I wara sau na unune kiak lo Karisito. Tekentu, God i foteng kerer arae foron tom tortores, wara le kerer unune lo Karisito. 10 Ia ier le ian usum lo Karisito, ke na rakrakai kia ae i finngas ta u, aunbiing i aptih fis tah tina minet. Ke ia ka ier sabin le ian ti turim tura isi kalsakai fangungut arae i kalsakai ta u, isi iak fasih ini, na minet kia. 11 Male in tara arae, ke ia unune le God in faptih fafis iau tina minet.

Pol i Filau una Farfarop

12 Biil ia use u le foron tier igii ia kep ta u, le ia ka tapiek tah na farfarop lo, biil. Isau le ia totof rakrakai tom isi ian kep sanih ae Karisito Iesu i kale pes ta iau isi. 13 Foron tuaklik, biil ia use u le ia ka kep ta u. Isau le tier ia tel u, biil ia giliim fis, ia totof rakrakai tom isi kep tier ae na famu lo iau. 14 Ia filau rakrakai tom isi ian tafe farfarop, isi iak kep fifiil na filau kiak. Fifiil ae God i tawi pes ta iau isi, isi ian la ubae na kukulii, wara lo Karisito Iesu.

15 Pesu kerer tikii ae unune kirer ka matuk tah lo Karisito, in mel e matngan wolwol aragii sing kerer. Ke, male foron wolwol kimi i neng keskes na ti tier, God in famalal u usuf gam. 16 Isau le, keren mi tom na sal ae kere mi la lo papang igii.

17 Foron tuaklik, gamen mi na matngan sinangung. Ke gamen parpar rokap usuf fanseh ae ri liu fafasih ini matngan liu ae kemem finngas ta u usuf gam. 18 Wara le ifuun, sinangu ri i finngas u le ri ememse ta aupaket ke Karisito. Arae ia fas ta gam pakanini, ke igii sabin, ia use u ini danun matang. 19 Ma farfarop na liu kiri, rin fiu. Foron wolwol na pununfo i e god kiri. Ri got la ini foron sinang ae ifasih rin matlawen kuna. Ma ri luun wolwol kiri la tom na foron tier tinaga na piklinbat. 20 Isau le kerer, kerer fanu tutus tina kukulii, ma kerer nene isi Tom Fafaliu kirer, Kumguui, Iesu Karisito in fis tinbae. 21 Ma in sokiliis pununfo kerer igii ae biil ti memeh lo, isi ik fasih ini pununfo tom ae i fuun ini memeh. In luun foron tier tikii na piklin nagogon kia, ma in sokiliis pununfo kirer ini rakrakai sau ae.

Copyright information for `TGG